KIONGOZI MWANDAMIZI BENKI YA DUNIA AIMIMINIA SIFA MAHAKAMA UTEKELEZAJI MIRADI

Na Faustine Kapama – Mahakama

Meneja Mwendeshaji na Utawala (Governance Practicing Manager) kutoka Benki ya Dunia, Bi Nicola Smithers ameipongeza Mahakama ya Tanzania kwa kutekeleza kwa ubora wa hali ya juu miradi mbalimbali inayofadhiliwa na taasisi hiyo ya fedha hapa nchini.

Bi. Smithers ametoa pongezi hizo leo tarehe 14 Juni, 2022 alipokutana na Mtendaji  Mkuu wa Mahakama ya Tanzania, Prof. Elisante Ole Gabriel ofisini kwake katika jengo la Mahakama ya Rufani jijini Dar es Salaam.

Kiongozi huyo Mwandamizi wa Benki ya Dunia ameeleza kuridhika jinsi Mahakama ya Tanzania inavyotekeleza miradi hiyo na kueleza jinsi  inavyofanya vizuri ukilinganisha na taasisi zingine. Ameahidi kuufahamisha ulimwengu kuja kujifunza Tanzania.

Bi. Smithers ambaye aliambatana na viongozi wengine kutoka Benki hiyo, Bw. Benjamin Mtesigwa na Bi Diana Mwaipopo alibainisha kuwa kuna mambo mazuri alikuwa anayaona kwenye meza na hakuamini kama Mahakama ya Tanzania ingeweza kufanya hivyo mara baada ya kufika nchini kujionea utekelezaji wa miradi hiyo unavyofanyika.

Kwa upande wake, Mtendaji Mkuu wa Mahakama ya Tanzania ameonyesha furaha yake ya kupokea ugeni huo ambao alikuwa akiusubiri kwa muda mrefu. “Ni furaha yangu kuwaona hapa. Hatimaye June 14 imefika, karibuni sana mjisikie mko nyumbani,” aliwaambia wageni wake wakati akiwakaribisha ofisini kwake.

 Amemhakikishia kiongozi huyo kuwa Mahakama ya Tanzania itaendeleza kutoa huduma za utoaji wa haki kwa wananchi kwa kasi, usahihi na ufanisi zaidi kwa vile kauli mbiu yao ni kwamba kutofaulu sio na haitakuwa chaguo lao.

Baada ya mazungumzo hayo mafupi, ujumbe wa kiongozi huyo wa Benki ya Dunia ulielekea kwenye Kituo Jumuishi cha Utoaji Haki Temeke kinachojihusisha na mashauri ya Familia, Ndoa na Talaka kujionea jinsi kinavyofanya kazi.

Akiwa katika Kituo hicho, Bi. Smithers alipata nafasi ya kukutana na viongozi mbalimbali, akiwemo Jaji Mfawidhi wa Kituo hicho, Mhe. Ilvin Mgeta na Msajili wa Mahakama Kuu ya Tanzania, Mhe. Sharmillah Sarawatt na baadaye kutembelea maeneo mbalimbali.

Kiongozi huyo alionyesha wazi kushangazwa na uzuri wa Kituo hicho hasa baada ya kupitishwa kwenye vyumba mbalimbali vya kusililizia mashauri na wadau mbalimbali wakiwemo Mawakili wa Kujitegemea, Usitawi wa Jamii, Dawati la Jinsia na ilimchukua muda mrefu kuzungumza na wadau alipofika kwenye chumba maalum wanachotumia wanawake kunyonyeshea watoto.

Kadhalika, Bi. Smithers alitembelea Mahakama Inayotembea ambayo kwa bahati nzuri ilikuwa katika maeneo hayo ikisikiliza mashauri na kupata maelezo ya kina kutoka kwa Mkurugenzi Msaidizi na Msimamizi wa Mahakama hiyo, Mhe. Moses Ndelwa wa namna inavyofanya kazi.

Katika maelezo yake, Mhe. Ndelwa amemweleza kiongozi huyo kuwa Mahakama Inayotembea imebadilisha utoaji wa haki kwa wananchi kwa kiasi kikubwa ambapo kwa sasa shauri linachukua chini ya siku 30 wakati katika Mahakama za kawaida shauri hilo hilo linachukua miezi sita.

Akizunguza baada ya ziara hiyo, Mkuu wa Kitengo cha Uboreshaji cha Mahakama ya Tanzania, Mhe. Dkt. Angelo Rumisha amesema kuwa ujio wa kiongozi huyo ni nafasi nzuri kwa vile Mahakama ya Tanzania inajiandaa kwenye mradi unaofuata ambao utahusisha upanuzi mkubwa wa huduma za kimahakama kwenye mikoa yote Tanzania Bara ambayo haina Mahakama Kuu.

“Tunatarajia kujenga Vituo Jumuishi vingine katika mikoa hiyo. Katika mradi unaoisha tumejenga Vituo sita na mradi unaokuja tunajenga vingine tisa na ikiwezekana 12 kutegemea na uwepo wa fedha, lakini pia kutakuwepo na nyongeza ya Mahakama zinazotembea sita kwenda mikoa mbalimbali,” alisema.

Meneja Mwendeshaji na Utawala (Governance Practicing Manager) kutoka Benki ya Dunia, Bi Nicola Smithers (kulia) akiwa katika picha ya pamoja na Mtendaji Mkuu wa Mahakama ya Tanzania, Prof. Elisante Ole Gabriel. Bi. Nicola amemtembelea Mtendaji Mkuu wa Mahakama leo tarehe 14 Juni, 2022 ambapo amefanya mazungumzo na Mkuu huyo na kuipongeza Mahakama ya Tanzania kwa kutekeleza kwa ubora wa hali ya juu miradi mbalimbali inayofadhiliwa na Benki hiyo.

 Mtendaji Mkuu wa Mahakama ya Tanzania, Prof. Elisante Ole Gabriel akizungumza na Meneja Mwendeshaji na Utawala (Governance Practicing Manager) kutoka Benki ya Dunia, Bi Nicola Smithers (hayupo katika picha) wakati Meneja huyo alipomtembelea Mtendaji Mkuu ofisini kwake Mahakama ya Rufani jijini Dar es Salaam.  

Mtendaji Mkuu wa Mahakama ya Tanzania, Prof. Elisante Ole Gabriel (wa pili kulia) akiwa katika picha ya pamoja na
Meneja Mwendeshaji na Utawala (Governance Practicing Manager) kutoka Benki ya Dunia, Bi Nicola Smithers (wa pili kushoto). Pamoja nao ni Maafisa walioambatana na Meneja huyo kutoka Benki ya Dunia.

Mtendaji Mkuu wa Mahakama ya Tanzania, Prof. Elisante Ole Gabriel (wa pili kulia) akiwa katika picha ya pamoja na
Meneja Mwendeshaji na Utawala (Governance Practicing Manager) kutoka Benki ya Dunia, Bi Nicola Smithers (wa tatu kushoto). Pamoja nao ni Mkuu wa Kitengo cha Maboresho, Mahakama ya Tanzania, Mhe. Dkt. Angelo Rumisha (wa kwanza kulia), wa kwanza kushoto ni Mtendaji wa Mahakama Kuu ya Tanzania, Bw. Leonard Magacha, wa pili kushoto ni Bw. Benjamin Mtesigwa, Afisa Kutoka Benki ya Dunia aliyeambatana na Bi. Nicola na wa pili kulia ni Bi. Diana Mwaipopo kutoka Benki ya Dunia.

 

Mtendaji Mkuu wa Mahakama ya Tanzania, Prof. Elisante Ole Gabriel (kulia)  akimkabidhi zawadi Meneja Mwendeshaji na Utawala (Governance Practicing Manager) kutoka Benki ya Dunia, Bi Nicola Smithers (kushoto).

Meneja Mwendeshaji na Utawala (Governance Practicing Manager) kutoka Benki ya Dunia, Bi Nicola Smithers  (kushoto) akiwa katika picha ya pamoja na baadhi ya Maafisa kutoka Mahakama wakati alipotembelea Kituo Jumuishi cha Utoaji Haki (IJC) Temeke. Wa pili kushoto ni Msajili wa Mahakama Kuu ya Tanzania, Mhe. Sharmillah Sarwatt, wa tatu kushoto ni Naibu Msajili wa Kituo hicho, Mhe. Mary Moyo na wa kwanza kulia ni Mtendaji wa Mahakama Kuu ya Tanzania, Bw. Leonard Magacha.

Jaji Mfawidhi wa Kituo Jumuishi cha Utoaji Haki-Temeke, Mhe. Ilvin Mugeta akizungumza na Bo. Nicola (hayupo katika picha) wakati Meneja huyo kutoka Benki ya Dunia alipotembelea Kituo hicho.

Meneja Mwendeshaji na Utawala (Governance Practicing Manager) kutoka Benki ya Dunia, Bi Nicola Smithers  ( wa pili kulia) akipata maelezo kutoka kwa Mratibu wa Mahakama inayotembea (Mobile Court), Mhe. Moses Ndelwa.

Msajili wa Mahakama Kuu ya Tanzania, Mhe. Sharmillah Sarwatt (wa nne kushoto) akiwa katika picha ya pamoja na Meneja Mwendeshaji na Utawala (Governance Practicing Manager) kutoka Benki ya Dunia, Bi Nicola Smithers (wa nne kulia) pamoja na Maafisa wa Mahakama na Benki ya Dunia.

Picha ya pamoja katika Kituo Jumuishi cha Masuala ya Familia-Temeke.

 

(Picha na Mary Gwera, Mahakama)