ALIYEKUWA NAIBU KATIBU MKUU CHAMA CHA WALIMU TANZANIA APUMUA

 Na FAUSTINE KAPAMA-Mahakama

Mahakama Kuu ya Tanzania (Masijala Kuu) Dar es Salaam imempa kibali aliyekuwa Naibu Katibu Mkuu wa Chama cha Walimu Tanzania (CWT), Bw. Ezekiah Oluoch, kupinga uamuzi wa Rais wa Jamhuri ya Muungano wa Tanzania ambaye amethibitisha adhabu ya kufukuzwa kazi kwenye utumishi wa umma.

Jaji Sekela Moshi amefikia uamuzi huo baada ya kuyakubali maombi, ambayo maelezo na mawasilisho yake hayakupingwa mahakamani, yaliyowasilishwa na Mwalimu Oluoch, mwombaji, dhidi ya wajibu maombi wawili, Katibu Mkuu Kiongozi na Mwanasheria Mkuu wa Serikali.

“(….) nimeona kuwa maelezo yake (mwombaji) yanajitosheleza kumpa kibali cha kufungua shauri la msingi la mapitio ya Mahakama (judicial review) kwani kuna shauri la msingi kuhusu utaratibu uliotumika kumwachisha kazi, pia ana maslahi kwa kuwa yeye ndiye aliyeachishwa kazi,”amesema.

Aidha, Mhe. Moshi amebainisha kuwa maombi hayo ya kibali yamaletwa ndani ya muda kwa mujibu wa Kanuni ya 6 ya sheria ya Law Reform Fatal Accident Provisions Miscellaneous Provision (Judicial Review Procedure & Fees) 2014 ambayo ni ndani ya miezi sita.

Kabla ya kufikia uamuzi huo, Jaji Moshi alisema kuwa  mwombaji anatakiwa athibitishe mbele ya Mahakama hiyo mambo makuu matatu ya kisheria kabla ya kupewa kibali cha kufungua shauri la mapitio ya Mahakama.

“Kwanza kabisa anatakiwa aonyeshe kuwa kuna kesi ya msingi, pili anatakiwa kuonyesha kuwa shauri lakelimefunguiiwa ndani ya miezi sita na miezi hiyo inaanza kuhesabika tangu chanzo cha mgogoro ulivyoanza, na tatu anatakiwa aonyeshe kuwa ana maslahi muhimu katika maombi ya msingi,” alisema.

Baada ya kuangalia aya ya 51, 52, 41,44,45,42,46,47,3,35,39,21, na 23 ya maelezo ya mwombaji na mawasilisho yake hayakupingwa hapa mahakamani, Jaji huyo aliona kuwa maelezo hayo yanajitosheleza kumpa kibali cha kufungua shauri la msingi la mapitio ya Mahakama.

“Kwa hiyo, maombi haya yamekubaliwa baada ya kuzinqatia mambo yote yaliyojadiliwa katika uamuzi huu. Inaamriwa hivyo,” Jaji Moshi amesema.

Mwombaji aliajiriwa kwenye utumishi wa umma tangu tarehe 01 Julai, 1993 na mwajiri wake alikuwa ni Katibu Mkuu wa iliyokuwa Wizara ya Elimu na Utamaduni ambayo kwa sasa ni Wizara ya Elimu, Sayansi na Teknolojia.

Tangu awe mtumishi wa umma, hakuwahi kujulishwa kuwa mwajiri wake alibadilika na kuwa ni Manispaa ya Ilala kwa sasa ni Jiji la Dar es Salaam. Mwombaji akiwa ni mtumishi wa umma, alijiunga na Chama cha Walimu Tanzania (CWT) ambacho ni Chama cha Wafanyakazi.

 Akiwa kama mwanachama wa CWT, aligombea na kuchaguliwa kuwa Naibu Katibu Mkuu wa CWT kwa muda wa vipindi vinne mfululizo kuanzia Mei, 2000 (2000-2005), Mei 2005(2005-2010), Mei 2010(2010-2015) na Mei 2015(2015-2020).

Tarehe 20 Februari, 2017, Katibu Mkuu, Ofisi ya Rais Menejimenti ya Utumishi wa Umma alimwandikia barua ya kumtaka aidha aache nafasi yake ya Naibu Katibu Mkuu wa CWT ili arudi kwenye utumishi wa umma au aajiriwe na CWT.

Katiba ya CWT hairuhusu kiongozi wa kuchaguliwa kwenye nafasi ya Naibu Katibu Mkuu kuajiriwa na CWT katika masharti ya kudumu. Kwa kuwa yote yalikuwa hayatekelezeki, mwombaji hakufanya uchaguzi wowote ule.

Matokeo yake, Katibu Mkuu, Ofisi ya Rais Menejimenti ya Utumishi wa Umma alimwandikia barua ya kumwondoa kazini tarehe 16 Machi, 2017 bila kuwa na mamlaka.

Mwombaji  hakuridhika na uamuzi huo na alifungua shauri katika Mahakama Kuu kuomba kibali na baada ya kibali kutolewa, alifungua shauri la mapitio ya Mahakama kupinga kuondolewa kwenye utumishi wa umma.

Hata hivyo, maombi hayo yalitupiliwa mbali na Mahakama.  Kwa kuwa hakuridhika na uamuzi huo, mwombaji alikata rufaa Mahakama ya Rufaa.

Tarehe 06 Januari, 2020 Mahakama ya Rufani ya Tanzania ilifuta mchakato wote uliomwondoa mwombaji kwenye utumishi wa umma kwa sababu alihukumiwa bila ya kusikilizwa na aliyefanya uamuzi ya kumwondoa hakuwa na mamlaka.

Baada ya Mahakama ya Rufani kufuta mchakato huo, Katibu Mkuu Ofisi ya Rais, Menejimenti ya Utumishi wa Umma hakuridhika na uamuzi ya Mahakama ya Rufani, hivyo alianzisha upya mchakato wa kumfukuza kazi mwombaji kwenye utumishi wa umma.

Kwa kuanzishwa upya kwa mchakato huo, mwombaji alifukuzwa tena kazi na Kamati ya Nidhamu ya Tume ya Utumishi wa Walimu ya Manispaa ya Ilala tarehe 22 Mei, 2020.

Mwombaji hakuridhika na kufukuzwa kwake kazi na alikata rufaa kwenye Tume ya Utumishi wa Walimu kama sheria inavyoelekeza lakini rufaa yake ilitupiliwa mbali.

Kufuatia uamuzi huo wa Tume, mwombaji alikata rufaa kwa Rais wa Jamhuri ya Muungano wa Tanzania kama Mamlaka ya mwisho ya Rufaa.

Tarehe 06 Januari, 2022, Katibu Mkuu Kiongozi alimjulisha mwombaji kwa barua kuwa Rais wa Jamhuri ya Muungano wa Tanzania ametupilia mbali rufaa yake na ameridhia adhabu ya kufukuzwa kazi kwenye utumishi wa umma.

Mwombaji, kwa mara nyingine tena, hakuridhika na aliamua kuwasilisha maombi katika Mahakama Kuu ili kupata kibali cha kumwezesha kufungua shauri la mapitio ya Mahakama kupinga uamuzi ya Rais wa Jamhuri ya Muungano wa Tanzania.

Jaji Sekela Moshi.

Nyundo ya Mahakama.

Jengo la Mahakama Kuu Dar es Salaam.