BENKI YA DUNIA ROHO NYEUPE UBORESHAJI MIUNDOMBINU MAHAKAMANI

Na Tiganya Vincent-Mahakama ya Tanzania

Ujumbe wa Benki ya Dunia umeipongeza Mahakama ya Tanzania kwa utekelezaji mzuri wa mradi wa uboreshaji wa miundombinu inayotumika katika utoaji wa haki katika maeneo mbalimbali nchini.

Pongezi hizo zimetolewa hivi karibuni mjini Arusha na Kiongozi wa Ujumbe kutoka Benki hiyo, Bi. Christine Owuor katika kikao cha majumuisho ya ziara ya wiki mbili kukagua utekezaji wa awamu ya kwanza na maandalizi ya utekelezaji wa miradi ya uboreshaji wa miundombinu ya Mahakama nchini awamu ya pili.

Kiongozi huyo alisema miradi iliyotekelezwa katika awamu ya kwanza imesaidia kusogeza huduma za utoaji haki karibu na wananchi katika maeneo yao.

“Tumetembelea miradi katika maeneo mbalimbali hapa nchini Tanzania …tumefurahishwa na utekelezaji wake kwa kuwa miradi mingine imesaidia kusogeza karibu huduma za upatikajini wa haki kwa wanyonge wakiwemo wanawake,” amesema.

Akizungumza katika kikao hicho, Mtendaji Mkuu wa Mahakama ya Tanzania, Prof. Elisante Ole Gabriel aliuhakikishia Ujumbe huo kuwa katika awamu ya pili watahakikisha wanatumia fedha za mkopo zilizotengwa kupeleka huduma ya upatikanaji haki hasa kwa wananchi walio mbali kama walivyofanya wakati wa utekelezaji wa awamu ya kwanza.

Alisema hakuna fedha yoyote itakayotumika kinyume cha matumizi iliyopangiwa ambapo lengo la Mahakama ni kuhakikisha kuwa fedha hiyo inasaidia kuongeza idadi ya huduma za kimahakama kuanzia Mahakama za Mwanzo hadi Mahakama Kuu.

Prof. Ole Gabriel alisema katika awamu ya kwanza walipata mkopo wa Dola za Kimarekani milioni 65, sawa na bilioni 160 za Kitanzania ambazo zimesaidia kujenga Vituo Jumuishi vya Utoaji Haki sita katika Mikoa ya Dar es Salaam, Morogoro, Mwanza , Dodoma  na Arusha na Mahakama za Wilaya na zile za Mwanzo katika maeneo mbalimbali hapa nchini.

Alibainishsha pia kuwa katika awamu ya pili wamepata mkopo wenye masharti nafuu wa Dola za Kimarekani milioni 90, sawa na bilioni 200 za Kitanzania ambazo watazitumia kujenga Vituo Jumuishi vya Utoaji Haki zaidi na Mahakama za chini katika maeneo ambayo bado hayana huduma hizo za kimahakama.

Prof. Ole Gabriel alisema lengo la Mahakama ya Tanzania ni kuhakikisha mwananchi anapata huduma ya upatikanaji wa haki katika maeneo ya karibu na anatumia muda mfupi ili sehemu iliyobaki aitumie katika uzalishaji wa mali.

Mtendaji Mkuu wa Mahakama ya Tanzania, Prof. Elisante Ole Gabriel akizungumza na Ujumbe wa Benki ya Dunia na watumishi wa Mahakama ya Tanzania hivi karibuni mjini Arusha mara baada ya ziara ya wiki mbili kutembelea miradi inayotekelezwa na Mahakama kwa mkopo nafuu wa Benki hiyo.

Kiongozi wa Ujumbe wa Benki ya Dunia, Bi. Christine Owuor akieleza jambo katika kikao cha majumuisho ya ziara ya wiki mbili ya kukagua utekezaji wa awamu ya kwanza na maandalizi ya utekelezaji wa miradi ya uboreshaji wa miundombinu ya Mahakama nchini awamu ya pili.

Sehemu ya wakuu wa Idara, Vitengo na Watumishi wa Mahakama ya Tanzania (juu na chini) wakiwa katika kikao cha majumuisho ya ziara ya Ujumbe wa Benki ya Dunia kukagua utekelezaji wa miradi ya uboreshaji wa miundombinu ya Mahakama nchini Tanzania.

Mtendaji Mkuu wa Mahakama ya Tanzania, Prof. Elisante Ole Gabriel (kulia) akifuatilia mada ya majumusiho kutoka kwa kiongozi wa Ujumbe wa Benki ya Dunia na watumishi wa Mahakama ya Tanzania hivi karibuni mjini Arusha.

Mtendaji Mkuu wa Mahakama ya Tanzania, Prof. Elisante Ole Gabriel (kushoto) akijaandaa kupiga picha ya pamoja na Ujumbe wa Benki ya Dunia na watumishi wa Mahakama ya Tanzania hivi karibuni mjini Arusha mara baada ya kikao cha majumuisho.

 (Picha na Tiganya Vincent-Mahakama ya Tanzania)