MAAFISA WA MAHAKAMA KIGOMA WAPIGWA MSASA

Na Festo Sanga-Mahakama, Kigoma

Jaji wa Mahakama Kuu ya Tanzania, Kanda ya Kigoma, Mhe. Jaji Fredrick Manyanda amewasihi maafisa wa Mahakama katika Kanda hiyo kuwa na uelewa wa kutosha wa kazi zao wanazozifanya wanapotekeleza jukumu la utoaji haki kwa wananchi.

Mhe. Manyanda alitoa rai hiyo hivi karibuni alipokuwa akifungua mafunzo ya siku mbili kwa maafisa hao yaliyoanza tarehe 22 Julai 2022 kuwajengea uwezo ili kuweza kumudu utekelezaji wa majukumu yao kwa ufanisi. Aidha aliwaasa kushiriki kikamilifu mafunzo yanayotolewa kwa njia ya mtandao na Chuo cha Uongozi wa Mahakama(IJA) Lushoto.

“Jifunzeni, jisomeeni, shirikini mafunzo mbalimbali yatakayowaongezea maarifa ya kazi zenu mkiwa kama Mahakimu,’’ alisema na kuongeza kuwa mafunzo hayo yanaongozwa na sera ya mafunzo (Training policy 2019) ambayo ni sehemu ya utekelezaji wa Mpango Mkakati wa Mahakama ambao, pamoja na mambo mengine, umelenga kukuza uelewa wa misingi ya taaluma ya kisheria na kuongeza ujuzi kwa watumishi wa Mahakama.

Washiriki wa mafunzo walijengewa uwezo katika mada za Ulinzi wa Wakimbizi, Uwepo wa Wakili katika Mahakama za Mwanzo, Marekebisho ya hivi karibuni kwenye Sheria za Kiutaratibu, Mahakama Mtandao, Kanuni za Maadili za Maafisa wa Mahakama na Mpango Mkakati awamu ya pili (2020/2021-2024/2025).

Wawezeshaji wa mafunzo hayo walikuwa ni Jaji Mfawidhi wa Mahakama Kuu ya Tanzania, Kanda ya Kigoma, Mhe. Lameck Mlacha, Naibu Msajili Mhe. Gadiel Mariki, Mtendaji wa Mahakama Kanda, Bw. Moses Mashaka, Hakimu Mkazi Mfawidhi wa Mahakama ya Hakimu Mkazi Kigoma, Mhe Rose Kangwa, Peter Muriyuki na Rehema Msami kutoka shirika linalohudumia wakimbizi Kigoma(UNHCR).

Wakati huo huo, Chama cha Majaji na Mahakimu(JMAT) Kigoma kilifanya mkutano wake ambapo, pamoja na agenda zingine, kulikuwa na uchaguzi wa viongozi wa chama. Katika uchaguzi huo, Mhe. Chiza Kabwebwe alichaguliwa kuwa Mwenyekiti na Mhe. Venance Mwakitalu alichaguliwa kuwa Katibu huku Mhe. Rajabu Mtuli akishika nafasi ya Mtunza Hazina ambapo Mhe. Misana Majula alifanikiwa kuwa Mwakilishi Kamati Tendaji Taifa.

Jaji wa Mahakama Kuu ya Tanzania, Kanda ya Kigoma, Mhe. Jaji Fredrick Manyanda akitoa nasaha wakati wa ufunguzi wa mafunzo ya siku mbili kwa Mahakimu Kanda ya Kigoma yaliyoanza tarehe 22 Julai. 2022.

Jaji Mfawidhi wa Mahakama Kuu ya Tanzania Kanda ya Kigoma, Mhe. Jaji Lameck Mlacha akitoa mada kwa washiriki waliohudhuria mafunzo hayo (hawapo pichani) tarehe 23 Julai 2022.

Hakimu Mkazi Mfawidhi wa Mahakama ya Hakimu Mkazi Kigoma, Mhe Rose Kangwa akiwasilisha mada ya Maadili kwa maafisa wa Mahakama waliohudhuria mafunzo hayo.

Mshiriki wa Mafunzo ambaye ni Mhe. Chiza Jacob Kabwebwe kutoka Mahakama ya Mwanzo Kakonko akiuliza swali katika mafunzo hayo.

Sehemu ya Wanachama wa Chama cha Majaji na Mahakimu Mkoa wa Kigoma wakimsikiliza kwa makini Mwenyekiti wa chama hicho (hayupo pichani) wakati wa mkutano ulioketi tarehe 23 Julai 2022.

Jaji wa Mahakama Kuu Kigoma, Mhe. Fredrick Manyanda (katikati) akiwa katika picha ya pamoja na washiriki na wawezeshaji wa Mafunzo. Wengine ni Naibu Msajili wa Mahakama Kuu Kigoma, Mhe. Gadiel Mariki (wa pili kushoto), Hakimu Mkazi Mfawidhi wa Mahakama ya Hakimu Mkazi Kigoma, Mhe. Rose Kangwa (wa kwanza kulia), Hakimu Mkazi Mfawidhi wa Mahakama ya Wilaya Kasulu, Mhe. Imani Batenzi ( wa kwanza kushoto) na  Bw Peter Muriyuki ( wa pili kulia) kutoka shirika linalohudumia wakimbizi(UNHCR) Kigoma.