MSAJILI MKUU WA MAHAKAMA AWATAKA WATUMISHI WAPYA KUJIHESHIMU

 Na Tiganya Vincent-Mahakama, Lushoto

Msajili Mkuu wa Mahakama ya Tanzania, Mhe. Wilbert Chuma amewataka watumishi wapya wa Mahakama kuzingatia uadilifu, maadili mema na kuepuka kufanya vitendo vinavyoweza kuwavunjia heshima kwa  jamii wanayoitumikia.

Mhe. Chuma ametoa wito huo leo tarehe 18 Julai, 2022 mjini Lushoto wakati akifungua mafunzo elekezi kwa Mahakimu Wakazi na Wasaidizi wa Kumbukumbu walioajiriwa hivi karibuni na Mahakama ya Tanzania.

Amesema waajiriwa wapya wanatakiwa kujenga tabia ya kujifunza na kujua utamaduni wa Mahakama (judicial culture) na kuuishi huku wakizingatia mipaka ya kazi zao na kila mmoja akiheshimu na kulinda mipaka ya wengine.

Mhe. Chuma amesisitiza kuwa nidhamu ya kazi inaendana pia na kuheshimu watumishi wengine na kutumia muda wa mwajiri ili kuifanya Mahakama iendelea kukubalika kwa jamii inayowatumikia ili kufikia malengo na dira yake.

Amesisitiza majukumu yao kwa mujibu wa sheria za nchi  kwa ngazi mbalimbali katika kufikia azma ya kutenda na kutoa haki kwa mujibu wa sheria na wasiwe chanzo cha malalamiko au kusababisha uvunjifu wa amani kutokana na utendaji kazi wa baadhi yao ambao unakiuka misingi ya utu na katiba.

Aidha, Mhe. Chuma amewataka waajiriwa hao wapya kufanya kazi kwa  ushirikiano na watumishi watakaowakuta katika maeneo ya kazi ili kuhakikisha Mahakama inandelea kutoa huduma nzuri ya utoaji haki kwa wananchi.

Amesema ushirikiano huo utasaidia kufanikisha jitihada zinazoendelea kuhusu uboreshaji ndani ya Mahakama ya Tanzania, utekelezaji wa Dira ya Taifa ya Maendeleo na usogezaji wa utoaji za haki karibu na wananchi.

Kwa upande wa Mahakimu, Msajili Mkuu huyo amewasihi kuzingatia maadili ambayo kimsingi yanawataka kupunguza marafiki na kujitoa kwenye makundi ya kijamii kama vile Whatsapp, washirika wa kibiashara na kuachana na starehe ambazo zinaweza kutia doa taswira ya Mahakama.

Mhe. Chuma ameongeza kuwa Mahakimu lazima watambue kuwa wao pia ni viongozi wa umma ambao wanapaswa kuhakikisha wanapokuwa mahakamani hawavunji heshima, kuwadhalilisha watu bila kujali ni wakili, shahidi, mshtakiwa, mtumishi wa Mahakama na hata Hakimu mwenzake.

Watumishi hao wapya watapata fursa ya kujifunza mada zinazogusa maisha yao binafsi, mfano kujilinda na msongo wa mawazo na kuwa na nidhamu binafsi ya matumizi ya fedha pamoja na mambo mengine.

Vilevile watafundishwa mada mahususi zinazohusu taaluma zao ambazo ni pamoja na usikilizaji wa mashauri ya madai ya kawaida, ndoa, jinai, talaka, mirathi, uandishi wa hukumu na utoaji wa adhabu.

Msajili Mkuu wa Mahakama ya Tanzania, Mhe. Wilbert Chuma akizungumza wakati akifungua mafunzo elekezi kwa Mahakimu Wakazi wapya na Wasaidizi wa Kumbukumbu ambayo yanafanyika katika Chuo cha Uongozi wa Mahakama Lushoto.

Hakimu Mkazi Mfawidhi wa Mahakama ya Wilaya ya Lushoto, Mhe. Rose Ngoka akitoa maelezo ya utangulizi kabla ya kumkaribisha Msajili Mkuu wa Mahakama ya Tanzania, Mhe. Wilbert Chuma kufungua mafunzo hayo.

Naibu Katibu wa Tume ya Utumishi wa Mahakama, Bi. Enziel Mtei akitoa salamu wakati wa ufunguzi huo.

Msajili Mkuu wa Mahakama ya Tanzania. Mhe. Wilbert Chuma (katikati waliokaa) akiwa katika picha ya pamoja na Mahakimu Wakazi wapya mara baada ya kufungua mafunzo hayo leo katika Chuo cha Uongozi wa Mahakama Lushoto.

Msajili Mkuu wa Mahakama ya Tanzania, Mhe. Wilbert Chuma (katikati waliokaa) akiwa katika picha ya pamoja na Sekretarieti ya maandalizi ya mafunzo kutoka Mahakama ya Tanzania na Chuo cha Uongozi wa Mahakama Lushoto mara baada ya  kufungua mafunzo hayo.

Msajili Mkuu wa Mahakama ya Tanzania, Mhe. Wilbert Chuma (katikati waliokaa) akiwa katika picha ya pamoja na Wasaidizi wa Kumbukumbu mara baada ya kufungua mafunzo hayo leo katika Chuo cha Uongozi wa Mahakama cha Lushoto.

Sehemu ya Mahakimu Wakazi wapya na Wasaidizi wa Kumbukumbu (juu na picha mbili chini) ambao wameajiriwa hivi karibuni wakiwa katika mafunzo elekezi katika Chuo cha Uongozi wa Mahakama cha Lushoto.

(Picha na Tiganya Vincent-Mahakama, Lushoto)