MTENDAJI MKUU WA MAHAKAMA AKAGUA UJENZI WA MAHAKAMA SONGWE

 Na Mohamed Kimungu- Mahakama, Songwe

Mtendaji Mkuu wa Mahakama ya Tanzania, Prof Elisante Ole Gabriel jana terehe 21 Julai, 2022 alikagua ujenzi wa Mahakama ya Hakimu Mkazi Songwe na Mahakama ya Wilaya ya Songwe na kuelezea kuridhishwa na maendeleo ya miradi hiyo.

Katika ziara yake ya siku moja mkoani hapa, Mtendaji Mkuu alitembelea miradi hiyo miwili ambapo ameridhishwa na ubora wa majengo na kuagiza kazi ya kusawazisha eneo la nje lifanyike haraka na kwa ubora unaokubalika.

Prof. Ole Gabriel ametoa siku sita kwa Mkandarasi, kwa maana hadi kufikia tarehe 27 Julai, 2022 kazi hiyo ya kusawazisha uwanja wa Mahakama ya Wilaya Songwe uwe umekamilika. Amesema zoezi hilo litaenda sambamba na uwekaji samani na kupiga vanishi vizimba vya Mahakama na kumwagiza Afisa Utumishi kupiga kambi eneo la ujenzi na kutoa taarifa ya maendeleo kila siku kwake.

Aidha, Mtendaji Mkuu amemshukuru Mkurugenzi wa Halmashauri ya Wilaya Songwe kwa kuunganisha bomba la maji katika eneo la mradi na kumwagiza Mtendaji wa Mahakama wa Mkoa wa Songwe, Bw Sostenes Mayoka kuhakikisha Mahakama inachimba kisima chake ndani ya miezi mitatu.

Kwa upande wake, Msimamizi wa mradi toka Kampuni ya Moladi Construction Limited ya Dar es salaam, Mhandisi James Jackson ameahidi kutekeleza kwa wakati kazi iliyobaki.       

Mtendaji Mkuu wa Mahakama ya Tanzania, Prof Elisante Ole Gabriel (kulia) akikagua maendeleo ya ujenzi katika Mahakama ya Wilaya Songwe.

Mtendaji Mkuu wa Mahakama ya Tanzania, Prof Elisante Ole Gabriel (wa pili kushoto) akipokea taarifa ya mradi wa Mahakama ya Wilaya Songwe kutoka kwa Mtendaji wa Mahakam Songwe. Bw Sostenes Mayoka (wa pili kulia).

Mtendaji Mkuu wa Mahakama ya Tanzania, Prof Elisante Ole Gabriel (wa pili kulia) akikagua vizimba mahakamani.