‘EPUKENI MATUMIZI YA MITANDAO YA KIJAMII KUTUMA TAARIFA ZA UMMA’

 Na Tiganya Vincent-Mahakama, Lushoto

Afisa Mawasiliano Mkuu kutoka Ofisi ya Rais, Menejimenti ya Utumishi wa Umma na Utawala Bora na Idara ya Usimamizi wa Maadili Rocky Setembo amewaasa waajiriwa wapya wa Mahakama ya Tanzania kuepuka matumizi ya mitandao ya kijamii kutuma taarifa mbalimbali za uendeshaji wa shughuli za kiutumishi kwa kuwa bado njia hiyo sio rasmi na haijaidhinishwa.

Setembo amesema hayo leo tarehe 21 Julai, 2022 mjini hapa alipokuwa akitoa mada kuhusu misingi na kanuni za maadili ya utendaji katika utumishi wa umma kwenye mafunzo elekezi kwa Mahakimu na Wasaidizi wa Kumbukumbu yanayoendelea katika Chuo cha Uongozi wa Mahakama Lushoto.

Amesema hadi sasa hakuna Waraka ambao umetolewa kuruhusu mitandao ya kijamii kama vile WhatsApp , Instragrum na Twiter kutumika katika utumaji wa nyaraka muhimu za Serikali kama vile barua, waraka na madokezo.

Setembo ameongeza kuwa hadi sasa njia ambayo watumishi wa umma wanapaswa kutuma barua za kiutumishi ni kupitia Posta na barua pepe ya Serikali ambayo ina jina la taasisi husika na kuendelea ikiwa na maneno ya  @go.tz na sio kwa kutumia barua pepe nyingine ambayo wamiliki wa chombo cha kutunzia kumbukumbu(Server) wako nje ya Tanzania.

Aidha, Setembo amewataka watumishi hao wapya kutumia muda wa Serikali kwa ajili ya kutoa huduma nzuri kwa wananchi badala ya kusoma na kujibu ujumbe  katika makundi mbalimbali ya mitandao ya kijamii ambayo hayana tija kwa umma.

 “Utakuta mtumishi mmoja wa umma amejiunga na makundi ya Whatsapp  na twiter mbalimbali, mfano anaweza kuwa na kundi la aliosoma nao Sekondari, Chuoni na  katika makundi yote anataka kujibu kila ujumbe unaoandikwa, hali hiyo wakati mwingine inasababisha kutumia muda wa Serikali jambo ambalo ni makosa,”amesema.

Katika hatua nyingine, Afisa Mawasiliano huyo Mkuu amewataka watumishi hao watakapokuwa katika vituo vyao vya kazi kutumia lugha nzuri na yenye staha wanapotoa huduma kwa wateja wa ndani na wa nje ili kuepuka kuwaathiri na kuchafua jina la taasisi ambayo watakuwa wakiitumikia.

 Afisa Mawasiliano Mkuu kutoka Ofisi ya Rais, Menejimenti ya Utumishi wa Umma na Utawala Bora, Idara ya Usimamizi wa Maadili, Bw. Rocky Setembo akitoa bango linaloonyesha mavazi yasiyoruhusiwa na yanayoruhusiwa kwa watumishi wa umma wakati akitoa mada kwenye mafunzo elekezi kwa Mahakimu na Wasaidizi wa Kumbukumbu yanayoendelea katika Chuo cha Uongozi wa Mahakama Lushoto.

Waaajiriwa wapya wa Mahakama ya Tanzania wakisiliza mada kuhusu misingi na kanuni za maadili ya utendaji katika utumishi wa umma kwenye mafunzo hayo elekezi.

Afisa Mawasiliano Mkuu kutoka Ofisi ya Rais, Menejimenti ya Utumishi wa Umma na Utawala Bora, Idara ya Usimamizi wa Maadili Rocky Setembo akitoa mada kuhusu misingi na kanuni za maadili ya utendaji katika utumishi wa umma kwenye mafunzo hayo.

 (Picha na Tiganya Vincent-Mahakama, Lushoto)