MAAFISA TAWALA SHINYANGA WAPONGEZWA KWA USIMAMIZI MZURI WA RASILIMALI

Emmanuel Oguda – Mahakama, Shinyanga

Jaji Mfawidhi wa Mahakama Kuu ya Tanzania, Kanda ya Shinyanga, Mhe. Athumani Matuma, amewapongeza Maafisa Tawala kwa kusimamia vizuri rasilimali chache wanazopewa na Mahakama.

Mhe. Matuma ametoa pongezi hizo jana tarehe 26 Agosti, 2022 katika hafla ya kuwakabidhi vyeti Mahakimu wakazi walioshiriki zoezi la kumaliza mlundikano wa mashauri.

“Nilipofanya ukaguzi hivi karibuni kuzunguka Mahakama za Mwanzo 70 Kanda ya Shinyanga, kuna maeneo nimepita na kujionea mwenyewe kazi nzuri zilizofanywa na Maafisa hawa, zikiwemo kujenga vyoo vya kisasa, kuweka madirisha maarufu kama Aluminium, kuweka vigae na kupaka rangi kwenye baadhi ya Mahakama za Mwanzo kwa kutumia rasilimali chache wanazopewa,” alisema.

Jaji Mfawidhi huyo alisema usimamizi mzuri wa rasilimali hizo umeleta tija ya kazi kubwa iliyofanyika, akamtaja Hakimu wa Mahakama ya Mwanzo Isungang’holo, Kishapu ambaye pia ni miongoni mwa watumishi waliosimamia rasilimali vizuri. “Najivunia sana kuwa na maafisa hawa katika Kanda ya Shinyanga,’’ alisema.

Miongoni mwa maafisa waliopokea pongezi hizo na kisha kutunukiwa vyeti maalum walikuwa Afisa Tawala wa Mahakama ya Wilaya Kahama, Bw. Boniface Fumbe, Afisa Tawala wa Mahakama ya Wilaya Kishapu, Bi. Dotto Mabula na Hakimu wa Mahakama ya Mwanzo Isungang’holo Kishapu, Mhe. Sayi Mabondo.

Jaji Matuma amewataka Maafisa Tawala na Utumishi wengine kuiga mfano kwa maafisa hao kwa kusimamia vyema rasilimali chache wanazopewa kufanikisha Mpango Mkakati wa Mahakama ya Tanzania wa miaka mitano.

 Afisa Tawala wa Mahakama ya Wilaya Kahama, Bw. Boniface Fumbe akipokea cheti cha pongezi katika usimamizi wa Rasilimali kutoka kwa Jaji Mfawidhi wa Mahakama Kuu ya Tanzania, Kanda ya Shinyanga, Mhe. Athumani Matuma.

Afisa Tawala wa Mahakama ya Wilaya Kahama, Bw. Boniface Fumbe (wa kwanza kulia) katika picha ya pamoja na Mahakimu waliotunukiwa vyeti vya pongezi katika hafla hiyo.

Mkurugenzi wa Upelelezi wa Makosa ya Jinai nchini (DCI) Ramadhani Kingai akimpongeza Afisa Tawala wa Mahakama ya Wilaya Kahama, Bw. Boniface Fumbe wakati wa hafla hiyo.