MAKATIBU MAHSUSI WAPYA WA MAHAKAMA WANOLEWA

 Na Mary Gwera, Mahakama

Mkurugenzi wa Utawala na Rasilimali Watu wa Mahakama ya Tanzania, Bi. Beatrice Patrick leo tarehe 02 Agosti, 2022 amefungua Mafunzo elekezi kwa Makatibu Mahsusi wapya wa Mahakama na kuwataka Watumishi hao kuwa tayari kufanya kazi katika vituo watakavyopangiwa.

Akizungumza kwa niaba ya Mtendaji Mkuu wa Mahakama ya Tanzania, Prof. Elisante Ole Gabriel wilayani Lushoto, Bi. Beatrice amesema kumekuwa na tabia ya baadhi ya Watumishi kuwasilisha sababu au malalamiko mbalimbali kuomba uhamisho kutoka mahali walipopangiwa kwakuwa mhusika hajapenda eneo alilopangiwa.

“Kumekuwa na tabia ya baadhi ya Watumishi mara wanapoona kuwa wamepangiwa vituo wasivyopenda, wanaleta sababu lukuki na nyingine za uongo ili tu aweze kupata uhamisho,” amesema.

Ameongeza kwa kuwataka Watumishi hao kufanya kazi kwa kuzingatia maadili na weledi ili kufanya kazi kwa amani.

Mafunzo hayo ya siku tano (5) yameandaliwa na Mahakama ya Tanzania kwa kushirikiana na Chuo cha Uongozi wa Mahakama (IJA) Lushoto ambacho ndio kinaendesha mafunzo hayo, washiriki wa mafunzo ni Watumishi wa Kada za Afisa Utumishi/Tawala, Wahasibu, Wakaguzi wa Ndani, Maafisa TEHAMA, Maafisa Ugavi pamoja na Madereva.

 Aidha; mafunzo ya namna hii ambayo yanafanyika kwa mara ya kwanza ni mwendelezo wa Mafunzo yaliyotolewa kwa kundi la Mahakimu na Wasaidizi wa Kumbukumbu wapya yaliyomalizika tarehe 29 Julai, 2022.

Mada zinazotarajiwa kutolewa katika Mafunzo hayo ni pamoja na Muundo na tamaduni za kimahakama, Mpango Mkakati wa Mahakama na Mpango wa Uboreshaji Huduma za Mahakama, Huduma kwa wateja, Maadili ya Utumishi wa Umma na wa Mahakama, Ubunifu katika kazi na nyingine.

MATUKIO KATIKA PICHA HAFLA YA UFUNGUZI WA MAFUNZO ELEKEZI KWA MAKATIBU MAHSUSI

Mkurugenzi wa Utawala na Rasilimaliwatu wa Mahakama ya Tanzania, Bi. Beatrice Patrick (aliyeketi katikati) akiwa kwenye picha ya pamoja na Makatibu Mahsusi wapya wa Mahakama walioajiriwa hivi karibuni. Bi. Beatrice amefungua Mafunzo elekezi kwa Watumishi hao leo tarehe 02 Agosti, 2022 kwa niaba ya Mtendaji Mkuu wa Mahakama ya Tanzania, Prof. Elisante Ole Gabriel. Aliyeketi kulia ni Hakimu Mkazi Mfawidhi wa Mahakama ya Wilaya Lushoto, Mhe. Rose Ngoka na kushoto ni Mkurugenzi Msaidizi wa Mafunzo-Mahakama ya Tanzania, Bi. Patricia Ngungulu.

Mkurugenzi wa Utawala na Rasilimaliwatu wa Mahakama ya Tanzania, Bi. Beatrice Patrick akizungumza na Makatibu Mahsusi (hawapo katika picha) alipokuwa akifungua Mafunzo elekezi kwa Watumishi hao kwa niaba ya Mtendaji Mkuu wa Mahakama ya Tanzania, Prof. Elisante Ole Gabriel. Mafunzo hayo yanafanyika katika Chuo cha Uongozi wa Mahakama (IJA) Lushoto.

Sehemu ya Washiriki wa Mafunzo Elekezi wakimsikiliza mgeni rasmi (hayupo katika picha).

Hakimu Mkazi Mfawidhi wa Mahakama ya Wilaya Lushoto, Mhe. Rose Ngoka (aliyesimama) akizungumza jambo wakati wa hafla ya ufunguzi wa Mafunzo Elekezi kwa Makatibu Mahsusi wapya 80 walioajiriwa hivi karibuni.

(Picha na Ibrahim Mdachi, IJA-Lushoto)