KUWENI WABUNIFU KUBORESHA MAZINGIRA YA KAZI

Na Francisca Swai, Musoma

Jaji Mfawidhi wa Mahakama Kuu ya Tanzania, Kanda ya Musoma, Mhe. Fahamu Mtulya amewaasa watumishi katika Kanda hiyo kuwa wabunifu katika maeneo yao ya kazi kwa kuboresha na kuyatunza mazingira jambo linaloongeza tija katika mchakato mzima wa utoaji haki kwa wakati na huduma bora kwa mteja.

Mhe.Mtulya ameyasema hayo jana tarehe 25 Octoba, 2022 alipofanya ziara ya ukaguzi wa Mahakama ya Mwanzo Nansimo iliyoko wilayani Bunda kufuatilia maelekezo yake aliyokuwa ameyatoa hapo awali. Tarehe 18 Machi 2022, Jaji Mfawidhi huyo alielekeza kufikia mwezi Aprili 2022 Mahakama hiyo ianze kufanya kazi kwenye chumba ambacho kilitengwa katika jengo la Ofisi ya Tarafa ya Nansimo kutokana na uchakavu wa jengo la Mahakama hiyo.

Hata hivyo, baada ya kufika katika Mahakama hiyo wakati wa ukaguzi, Mhe. Mtulya alishtushwa na ubunifu uliyofanywa na Hakimu Mkazi Mfawidhi wa Mahakama ya Mwanzo Nansimo, Mhe. Chana Mhembe ulioleta mabadiliko makubwa katika kuboresha mazingira ya jengo hilo.

Kwa upande wake Naibu Msajili Kanda ya Musoma, Mhe. Frank Moshi alimpongeza Mhe. Chana kwa kuwa mfano wa kuigwa na watumishi wote kwani kila anapoingia hutoka pakiwa na mabadiliko makubwa, hasa upande wa mazingira na katika kasi ya usikilizwaji wa mashauri. Alitolea mfano wa Mahakama ya Mwanzo Tarime Mjini ambako Mhe. Chana alikuwa akifanya kazi vizuri kabla ya kuhamishiwa katika Mahakama ya Mwanzo Nansimo.

Naye Mtendaji wa Mahakama Kanda ya Musoma, Bw. Festo Chonya alisema alipokuwa akikabidhi ndoo ya rangi kwa ajili ya kupaka bati la Mahakama hiyo kuwa uongozi wa Kanda hautasita kutambua, kupongeza na kuunga mkono jitihada zozote njema zitakazofanywa na watumishi katika kuboresha mazingira kwani ni jambo la kuigwa.

Akizungumza katika hafla hiyo, Mtendaji wa Kijiji cha Nansimo, Bw. Bwire Manumbu ameushukuru uongozi wa Mahakama Kanda ya Musoma kwa kuelekeza Mahakama ya Nansimo kuanza kutoa huduma baada ya kufungwa kwa muda mrefu.

Amekiri Mahakama hiyo imekuwa na msaada mkubwa katika kusuluhisha mashauri mbalimbali ya wananchi, hivyo kupunguza mzigo wa kazi kwake kwani sasa wananchi wanapata suluhisho la migogoro yao katika Mahakama hiyo iliyoko karibu.

Alisema hatua hiyo imewapunguzia wananchi adha iliyokuwepo awali ya gharama, kupoteza muda wa shughuli za maendeleo na uzalishaji mali na kukata tamaa ya kupata haki zao kwa kufuata huduma ya Mahakama umbali wa kilometa 30.

Mahakama ya Mwanzo Nansimo ambayo imeanza kazi tarehe 25 Aprili, 2022, inahudumia Kata tano zilizoko katika Kijiji cha Nansimo ambazo ni Nansimo, Kibara, Chitengule, Igundu na Kisorya. Hadi tarehe 24 Oktoba, 2022, Mahakama hiyo imepokea jumla ya mashauri 144.

Mahakama hiyo ilifungwa mwaka 2014 kutokana na wananchi kutishia usalama wa watumishi, hivyo kulazimika kufuata huduma za kimahakama katika Mahakama ya Mwanzo Kenkombyo iliyopo umbali wa kilometa 30 kutoka Nansimo.

Katika ukaguzi huo, Jaji Mfawidhi aliambatana na Naibu Msajili Mahakama Kuu Musoma, Mhe. Frank Moshi, Mtendaji wa Mahakama Bw, Festo Chonya, pamoja na Afisa Utumishi Bi. Francisca Swai ambapo walikagua pia Mahakama ya Mwanzo Bunda Mjini pamoja na Mahakama ya Wilaya Bunda.

Viongozi hao kwa pamoja waliwapongeza watumishi kwa utendaji kazi mzuri, kwa usafi wa kuridhisha na utunzaji mzuri wa jengo kwani umetimia mwaka mmoja tangu kuanza kutumia jengo jipya la Mahakama ya Wilaya Bunda na bado liko katika unadhifu wake. Jengo hilo lilianza kutumika tarehe 25 Oktoba, 2021.

Pamoja na hayo, viongozi hao waliwasisitiza watumishi kuzingatia sheria, kanuni, taratibu na miongozo mbalimbali katika utumishi wa umma na kwamba uongozi wa Kanda hautamvumilia yeyote anayekwenda kinyume na taratibu za kiutumishi.

Muonekano mpya wa Mahakama ya Mwanzo Nansimo baada ya ukarabati uliofanywa na Hakimu Mkazi wa Mahakama hiyo, Mhe. Chana Mhembe.

Jengo la Mahakama ya Mwanzo Nansimo lililojengwa na Mkoloni mwaka 1928, kabla ya ukarabati. 

Jaji Mfawidhi wa Mahakama Kuu ya Tanzania, Kanda ya Musoma, Mhe. Fahamu Mtulya (wa tatu kulia) akiwa katika picha ya pamoja na Naibu Msajili Kanda ya Musoma, Mhe. Frank Moshi (wa pili kulia), Mtendaji wa Mahakama Bw. Festo Chonya (wa nne kulia), Hakimu Mkazi Mfawidhi Bunda, Mhe. Mulokozi Kamuntu (wa kwanza kulia), Mhe, Chana Chana (wa nne kushoto), Afisa Utumishi Bunda Bi. Rose Millinga (wa tatu kushoto), Bw. Lameck Salah, Mlinzi Nansimo (wa kwanza kushoto) na Mtendaji Kijiji cha Nansimo Bw. Bwire Manumbu Bwire (wa pili kushoto).

Mhe. Chana Mhembe Chana (aliyesimama) akisoma taarifa ya utendaji kazi wa Mahakama ya Mwanzo Nansimo mbele ya viongozi waliofika katika kituo hicho kwa ajili ya ukaguzi wa Mahakama hiyo.

Mhe. Mtulya, akimkabidhi Mhe. Chana ndoo ya rangi kwa ajili ya kupaka bati la Mahakama ya Mwanzo Nansimo.

Hakimu Mkazi Mfawidhi Mahakama ya Mwanzo Bunda Mjini, Mhe. Stella Shayo, (aliyesimama) akisoma taarifa ya utendaji kazi wa kituo hicho mbele ya Mhe. Jaji Mtulya (mwenye tai nyeusi) wakati wa ukaguzi wa Mahakama hiyo.

 Jaji Mtulya akikagua mazingira ya jengo la Mahakama ya Wilaya Bunda ambapo aliwapongeza watumishi kwa utunzaji mzuri wa mazingira ya ndani nan je ya jengo.