Na Lydia Churi- Tume ya Utumishi wa Mahakama- Singida
Jaji Kiongozi wa Mahakama
Kuu ya Tanzania na Kamishna wa Tume ya Utumishi wa Mahakama Mhe. Mustapher
Siyani ametoa rai kwa Viongozi wa Umma kutoingilia mchakato wa utekelezaji wa
hukumu zinazotolewa na Mahakama.
Akizungumza kwenye Mkutano
wa Tume na wadau wa utoaji haki uliofanyika jana mkoani Singida, Jaji Siyani alisema
kumekuwa na matukio ya viongozi wa Umma wakiwemo wakuu wa mikoa na wilaya
kuingilia au kuzuia utekelezaji wa amri na tuzo za Mahakama.
Alisema kuwa baadhi ya
Viongozi hao wa Umma wamekuwa wakitaka hata amri za wito zinazotolewa na
Mahakama zipitie kwenye ofisi zao, jambo ambalo ni kinyume na utaratibu wa
Mahakama.
“Kuzuia kwa namna yoyote
utekelezaji wa amri za Mahakama ni kukiuka matakwa ya utawala bora”, alisisitiza
Jaji Kiongozi.
Alisema endapo kuna mazingira
yanayoashiria uhitaji wa kusimamisha utekelezaji wa amri za Mahakama, Viongozi
wa Mahakama ngazi ya wilaya, mkoa na Mahakama Kuu wajulishwe na wahusika
washauriwe kufuata utaratibu wa kisheria.
Alisema matarajio ya Tume
na Mahakama ni kuona viongozi wa Umma hawawi kikwazo katika mfumo wa utoaji
haki na badala yake ushirikiano wenye tija uimarishwe na kuhakikisha
waliotambuliwa na Mahakama kuwa wenye haki wanafaidi matumda ya haki zao.
Jaji Kiongozi pia
aliwashauri wadau wa utoaji haki kujibidisha kufahamu vyombo mbalimbali vinavyohusika
katika kutatua changamoto za wananchi ili kurahisisha mchakato wa upatikanaji
wa haki.
Wakati huo huo,
Jaji Kiongozi amewataka wananchi kuondoa dhana ya kuwa hawawezi kupatiwa huduma
mahakamani bila ya kutoa rushwa.
Alisema dhana hiyo ya
rushwa iliyojengeka kwa miaka mingi haina budi kuondolewa kwa kuwa Mahakama
hivi sasa inayo mifumo mbalimbali ya TEHAMA ambayo imerahisisha kazi na kuleta
uwazi katika suala zima la upatikanaji wa haki.
“Hatuwezi kusema rushwa
imeondoka mahakamani kwa asilimia 100, lakini mifumo ya udhibiti iliyopo inatuthibitishia
kuwa tuhuma nyingi za rushwa na ukosefu wa maadili zinazoelekezwa kwa Mahakama
zinatokana na dhana”, alisema Jaji Siyani.
Alisema suala la tuhuma
nyingi za rushwa kutokana na dhana au kutofahamika kwa taratibu ni jambo
lililofanyiwa utafiti na tafiti zinaonesha wenye dhana hizi hawajawahi kufika
mahakamani au hawajawahi kuwa na shauri mahakamani.
Jaji Kiongozi alisema
wananchi wanapaswa kufahamu kuwa Mhimili huu haukumbatii vitendo vya rushwa na badala
yake watumie huduma za Mahakama bila hofu. Aliongeza kuwa matarajio ya Tume na Mahakama
ni wananchi kama wadau muhimu wanaisemea Mahakama kwa uzuri ili kuiondoa dhana
hiyo ya rushwa.
Alisema dhana ya kuwepo
kwa rushwa mahakamani itaondoka ikiwa wadau watashirikiana ipasavyo, maadili ya
watumishi yatasimamiwa na mazuri yanayofanywa na Mahakama yatazungumzwa.
Tume ya Utumishi wa Mahakama imemaliza ziara yake ya siku nne katika mikoa ya Dodoma na Singida iliyokuwa na lengo la kuitangaza Tume hiyo pamoja na kutoa elimu kwa watumishi, wajumbe wa kamati za Maadili ya Afisa wa Mahakama na wadau wa utoaji haki.
Wadau wa Utoaji haki mkoani Singida wakiwa kwenye Mkutano wa Tume ya Utumishi wa Mahakama uliofanyika jana kwenye ofisi ya Mkuu wa Mkoa wa Singida.
Hakuna maoni:
Chapisha Maoni