MAHAKAMA SPORTS YAUNGANA NA WATANZANIA KUADHIMISHA SIKU YA NYERERE

Na Faustine Kapama-Mahakama, Tanga

Timu ya Mahakama ya Tanzania (Mahakama Sports) kwa kushirikiana na washiriki mbalimbali wa mashindano ya Shirikisho la Michezo ya Wizara na Idara za Serikali (SHIMIWI) leo tarehe 14 Octoba, 2022 wameungana na Watanzania kote nchini kuazimisha Siku ya Nyerere kwa kufanya matendo ya huruma kwenye vituo vitatu vya wahitaji vilivyopo jijini hapa.

Uongozi wa SHIMIWI Taifa chini ya Katibu Mkuu Alex Temba uliongoza shughuli hiyo, huku Mahakama Sports ikiwakilishwa na wajumbe watano, akiwemo Naibu Katibu Mkuu Theodosia Mwangoka. Vituo vilivyotembelewa ni Chuo cha Ufundi na Marekebisho kwa Watu Wenye Ulemavu Masiwani, Kituo cha Wazee Mwanzange pamoja na Kituo cha Kulelea Watoto Wadogo, Casa Della Gidia.

Shughuli ya kutembelea vituo hivyo ilianza majira ya saa tatu na nusu hivi asubuhi kutokea katika Bwalo la Polisi Tanga kuelekea katika kituo cha kwanza cha Chuo cha Ufundi ambapo ujumbe wa SHIMIWI ulipokelewa na Kaimu Mkuu wa Chuo Mwantum Zeyumba ambaye, pamoja na mambo mengine, aliwaeleza namna chuo hicho kinavyofanya kazi na kutoa masomo mbalimbali kwa wanachuo.

Alisema kuwa Chuo hicho kina jumla ya wanafunzi 120 ambao wanahudhuria masombo mbalimbali, ikiwemo kushota viatu, kujifunza ushonaji nguo, yaani chelehani na uselema kwa kipindi cha miaka miwili kabla ya mwanafunzi kuhitimu. Kaimu Mkuu wa Chuo aliushukuru kwa msaada uliotolewa kwa wananfunzi wake.

Mjumbe Mratibu wa SHIMIWI Itika Mwankeja alivitaja baadhi ya zawadi walizotoa katika kituo hicho kama unga wa sembe, mchele, sabuni za kuongea, sabuni za kufulia, mafuta ya kula, mafuta ya kupakaa, sukari, maji ya kunywa na shillingi millioni moja za Kitanzania pamoja na vitu vingine.

Baada ya kutembelea kituo hicho, msafara mrefu wa magari ya washiriki wa SHIMIWI ulielekea katika kituo cha pili ambacho ni Kituo cha Wazee Mwanzange na kupokelewa na Afisa Ustawi wa Jamii Emmanuel Joseph ambaye alitoa maelezo mafupi kuhusu kituo hicho chenye jumla ya wahitaji 17.

Kama ilivyokuwa katika kituo cha kwanza, Itika alielezea baadhi ya zawadi walizozitoa kwa wazee hao, ambao walizipokea kwa furaha na kuwatakia wote walioshiriki baraka tele kutokwa kwa Mwenyezi Mungu. Mama mmoja katika kituo hicho aliwashirikisha wana SHIMIWI wimbo mmoja wa kumsifu Mungu, hatua iliyopokelewa kwa shangwe kutoka kwa wanamichezo hao.

Kivutio kikubwa wakati wanamichezo wakiwa katika kituo hicho kilitoka kwa mzee mmoja aliyewasalimia kwa kusema, “Yanga Oyeee” hatua iliyowafanya wanamichezo hao kulipuka kwa vicheko na kuanza kumtania mzee huyo.

Baada ya hapo, msafara ulielekea katika kituo cha tatu cha kulelea watoto wadogo kinachosimamiwa na Masista wanane wa Kanisa Katoliki, akiwemo Sista Irene Kafuka, ambaye naye alichukua muda mchache kuelezea jinsi kituo hicho kinanvyofanya kazi.

Kitu kilichowashangaza wanamichezo hao ni pale watoto walivyoupokea msafara huo kwa kuimba, “Simba, Simba, Simba” huku wakizunguka zunguka katika viwanja vya kituo hicho wakichagiza wimbo huo. Sista Irene aliwaambia viongozi wa SHIMIWI na wanamichezo hao kuwa kituo chake kinahudumia watoto takribani 70 wenye changamoto mbalimbali, ikiwemo kutelekezwa na wazazi wao na yatima.

Kama ilivyo katika vituo vingine, Itika alielezea zawadi mbalimbali walizotoa katika kituo hicho ikiwemo maji, unga wa sembe, mchele, mafuta ya kula, mafuta ya kupakaa, sabuni za vipande, sabuni za kuongea, sabuni za kufulia, mafuta ya kula, mafuta ya kupakaa, vinywaji laini pamoja na shillingi millioni moja na laki tatu za Kitanzania.

Uongozi wa Kituo hicho uliwashukuru wanamichezo wote kwa kujitolea na kuwapa zawadi hizo na kuwatakiwa mafaniko mema katika shughuli zao. Naye Katibu Mkuu wa SHIMIWI aliwashukuru wanamichezo wote kwa jinsi walivyojitoa na kuamua kuchangia zawadi hizo.

Wajumbe wa Mahakama Sports wakiongozwa na Naibu Katibu Mkuu Theodosia Mwangoka wakiwa katika kituo kimojawapo walichokitembelea.

Chuo cha Ufundi na Marekebisho kwa Watu Wenye Ulemavu Masiwani, moja ya kituo kilichotembelewa.

Naibu Katibu Mkuu Theodosia Mwangoka akieleza jambo akiwa katika Chuo hicho wakati wa kukabidhi zawadi mbalimbali.

Mjumbe Mratibu wa SHIMIWI Itika Mwankeja akikabidhi baadhi ya zawadi kwa wanachuo. Anayeshuhudia kushoto ni Kaimu Mkuu wa Chuo Mwantum Zeyumba. 

Wanachuo wakishangilia baada ya kupata zawadi hizo kwa kutumia Mkalimani wao (kulia aliyenyanyua mikono).

Wajumbe wa Mahakama Sports wakiongozwa na Naibu Katibu Mkuu Theodosia Mwangoka (wa nne kulia) wakiwa katika picha ya pamoja na sehemu ya Uongozi wa SHIMIWI, akiwemo Katibu Mkuu Alex Temba (wa pili kushoto).

Wajumbe wa Mahakama Sports wakiwa katika Kituo cha Wazee Manzange.

Katibu Mkuu wa SHIMIWI Alex Temba akieleza jambo wakati wa kukabidhi zawadi mbalimbali kwenye kituo hicho. Chini Katibu Mkuu huyo akikabidhi shillingi millioni moja kwa wazee hao.

Mama mmoja akiwashirikisha wanamichezo wimbo wa kumsifu Mungu huku mzee wa Yanga kwa nyuma akianikiza wimbo huo. 

Wajumbe wa Mahakama Sports wakiongozwa na Naibu Katibu Mkuu Theodosia Mwangoka wakiwa katika Kituo cha Kulelea Watoto wadogo.

Mjumbe Mratibu wa SHIMIWI Itika Mwankeja akikabidhi zawadi hizo kwa watoto, huku mlezi wao, Sista Irine Kafuka (kushoto) akishuhudia.