MAHAKAMA SPORTS YAWEKA HISTORIA MPYA SHIMIWI

·Yashika nafasi ya pili mpira wa miguu wanaume baada ya miaka 18

Na Faustine Kapama-Mahakama, Tanga

Timu ya Mahakama ya Tanzania (Mahakama Sports) Mpira wa Miguu Wanaume leo tarehe 15 Octoba, 2022 imeandika historia mpya baada ya kunyakua ushindi wa pili wa mchezo huo tangu ianze kushiriki mwaka 2004 kwenye mashindano ya Shirikisho la Michezo ya Wizara na Idara za Serikali (SHIMIWI).

Mchezo huo wa fainali uliohudhuriwa na viongozi mbalimbali wa SHIMIWI ambao umechezwa katika Uwanja wa Mkwakwani majira ya saa mbili asubuhi umewawezesha Timu ya Hazina kuchukua ubingwa baada ya kubahatisha goli moja dhidi ya timu ngumu ya Mahakama ambayo imetisha katika mashindano hayo.

Mechi hiyo ilianza kwa kasi ambapo timu zote mbili zilishambuliana kwa zamu, huku kukiwa na kosa kosa za hapa na pale za magoli. Timu ya Mahakama ilicheza kwa tahadhali kubwa katika kipindi cha kwanza na iliwachukua hadi dakika ya 20 kwa Timu ya Hazina kuandika bao la kwanza na la ushindi kufuatia mabeki wa Mahakama Sports kujichanganya.

Hata hivyo, vijana wa Mahakama walitulia na kuanza kusakata kabumbu safi huku wakilishambulia goli la wapinzani wao mara kwa mara. Wachezaji wa Timu hiyo walishindwa kuzitumia nafasi kadhaa walizopata katika kipindi hicho na kufanya hadi timu zinaenda kwenya mapumziko ikiwa Hazina inaongoza kwa bao moja.

Katika kipindi cha pili, makocha wa timu zote mbili walifanya mabadiliko ya wachezaji ambayo kwa kiasi fulani yaliisaidia Timu ya Mahakama na kuzidisha mashambulizi kwenye lango la Timu ya Hazina. Baada ya kuelemewa, timu hiyo iliaza kucheza mpira wa kujihami na kubutua butua mipira hovyo, mbinu iliyowasaidia hadi dakika ya 60 na kuweza kuibuka washindi.

Akizungumza baada ya mchezo huo, Mwenyekiti wa Mahakama Sports Wilson Dede amewapongeza sana vijana wake kwa kazi nzuri waliyoifanya na kuiwakilisha Mahakama vizuri katika mashindano hayo. Alisema vijana wake wameonyesha upinzani mkubwa kwenye mashindano na kutokana na ubora wake ilikuwa imegeuka kuwa timu tishio kwa timu pinzani

“Hawa jamaa zetu wametubahatisha kagoli kamoja wakaamua kupaki basi. Vijana wetu wamepambana sana na wamecheza vizuri muda wote. Tulikosa utulivu kwenye safu ya ushambuliaji ambayo imekosa magori ya wazi katika kipindi cha kwanza. Nafikiri ilikuwa presha ya mchezo na kukosekana kwa mshambuliaji wetu hatari Martin Mapinduzi aliyepewa kadi nyekundu kwenye mchezo wa nusu fainali kumewasaidia wapinzani. Lakini tuwapongeze wachezaji wetu kwa kupambana,” alisema.

Kwa upande wake Mwalimu wa Mahakama Sports Spear Mbwembwe, ambaye anasaidiwa na Said Alubea amesema vijana wake wameweka hisoria mpya katika mashindano haya kwa kufika katika hatua ya fainali. “Hatujawahi kufika fainali kwenye mashindano haya tangu mwaka 2004 tulipoanza kucheza mpira wa miguu. Kufika katika hatua hii ni jambo la kupongeza. Nawashukuru sana vijana wangu, wamepambana tangu mechi ya mwanzo hadi siku hii ya fainali,” alisema.

Kabla ya kufikia hatua hiyo, Mahakama Sports ilishiriki kwenye mechi za makundi na ilianza kwa kukutana na Timu ya Utumishi na kuisanua mabao mawili kwa nunge na baadaye ikakutana na Hazina katika mechi ya pili na kupoteza kwa taaaabu kwa mabao mawili kwa moja.

Katika mechi yake ya tatu, Mahakama ilimenyana na Ukaguzi na kuwafumua kwa bao moja kwa yai na baadaye ilifanya mauaji kwa kuishindilia timu ya Maendeleo ya Jamii kwa mabao sita kwa moja.

Baada ya kuingia 16 bora, Mahakama ilikutana na Timu ya Maji na kuisambaratisha kwa mabao 5:3 kwa mikwaju ya matuta baada ya timu zote mbili kushindwa kufungana katika muda wa kawaida. Hatua hiyo iliiwezesha Mahakama Sports kutinga katika hatua ya robo fainali.

Mahakama Sports ilikutana na Timu ya RAS Simiyu robo fainali na kuizabua mabao 5:1 baada ya kutandaza kabumbu safi na la kuvutia. Hatua hiyo iliivusha Timu ya Mahakama katika hatua ya nusu fainali ambapo ilikutana na Timu na Ulinzi na kutoa kwa mikwaju ya matuta 5:4, hivyo kutinga fainali.

Wachezaji wa Mpira wa Miguu walioiwakilisha Mahakama katika michezo hiyo walikuwa Fahamu Kibona; Iman Patson; Gisbert Chentro; Akida Mzee; Emmanuel Mwamole; Selemani Magawa; Frank Obadia; Gabriel Tabana; Martin Mpanduzi; Mwinjuma Bwanga, Shamte Seif, Hassan Aufi; Nassoro Mwampamba; Kelvin Rutalemwa; Shabiru Hood; David Mnubi; Beatus Simwanza na Timoth Mwakisambwe.

Viongozi ambao waliambatana na Timu ni Mwenyekiti Wilson Dede, Makamu Mwenyekiti Fidelis Choka, Katibu Mkuu Robert Tende, Katibu Mkuu Msaidizi Theodosia Mwangoka, Mweka Hazina Rajab Ally, Timu Meneja Antony Mfaume, Afisa Michezo Nkrumah Katagile na Mjumbe Mwakilishi wa SHIMIWI Taifa Shaibu Kanyochole.

Mashindano ya SHIMIWI ambayo yalianza tarehe 1 Octoba, 2022 na kufunguliwa rasmi tarehe 5 Octoba, 2022 yalifanyika katika viwanja tofauti tofauti ikiwemo Viwanja vya Mkwakwani, Shule ya Sekondari Popatlal, Galanos Sekondari, Bandari, Shule ya Tanga, Polisi Chumbageni na Viwanja vya Gymkhana kwa kuhusisha michezo kadhaa.

Mashabiki wa Timu ya Mahakama ya Tanzania (Mahakama Sports) Mpira wa Miguu Wanaume wakiserebuka baada ya timu yao kunyakua ushindi wa pili kwenye mchezo huo.

Timu ya Mahakama ya Tanzania (Mahakama Sports) Mpira wa Miguu Wanaume kabla ya mchezo.

Wachezaji wa akiba wa Timu ya Mahakama ya Tanzania (Mahakama Sports) Mpira wa Miguu Wanaume.

Timu ya Hazina iliyonusulika kupata kichapo baada ya kubahatisha kigoli kimoja.

Timu ya Mahakama ya Tanzania (Mahakama Sports) Mpira wa Miguu Wanaume ikiwa tayari kwa ukaguzi.

Timu ya Mahakama ya Tanzania (Mahakama Sports) Mpira wa Miguu Wanaume ikikaguliwa.

Kipa wa Timu ya Hazina akiokoa moja ya mipira ya hatari iliyoelekezwa kwake na Timu ya Mahakama ya Tanzania (Mahakama Sports) Mpira wa Miguu Wanaume.

Timu ya Hazina ikilizengea lango la Timu ya Mahakama.