MAHAKAMA SPORTS YAZOA NDOO SABA SHIMIWI

·Kamba Wanawake watawazwa mabingwa kwa kuwabinua Uchukuzi

·Figisu figisu zaibeba Ikulu Kamba Wanaume

Na Faustine Kapama-Mahakama, Tanga

Timu ya Mahakama ya Tanzania (Mahakama Sports) imezoa makombe saba baada ya kuibuka washindi katika mashindano ya Shirikisho la Michezo ya Wizara na Idara za Serikali (SHIMIWI) ambayo yamehitimishwa leo tarehe 15 Octoba, 2022 jijini hapa.

Michezo ambayo Mahakama Sports imepata medali na makombe ni Kamba Wanawake walioibuka mshindi wa kwanza, Riadha Wanawake mita 3,000 mshindi wa kwanza, Tufe Wanawake mshindi wa kwanza, Kamba Wanaume walioshika nafasi ta pili, Mpira wa Miguu Wanaume walioshika nafasi ya pili na Bao Wanaume mshindi wa tatu.

Kwa kuwa Mahakama ilikuwa na vikombe vingi ilitakiwa ikabidhiwe kombe la mshindi wa jumla. Lakini cha kushangaza, viongozi wakawa na kigugumizi na wakawatangaza Uchukuzi, ambao safari hii wameangukia pua baada ya kukosa ushindi kwenye michezo kadhaa kwa sababu ya mamluki walipewa kombe kwa kuleta washiriki wengi kwenye mashindano hayo, jambo lililozua minong’ono kutoka kwa washiriki wengine.

Hata hivyo, Mahakama Sports ilikabidhiwa makombe manne tu kwa kisingizio kuwa timu zingine zilizoshiriki hazikurudisha baadhi ya makombe waliyochukua mwaka uliopita. Katika mechi ya fainali ya Kamba Wanawake iliyochezwa katika Uwanja wa Mkwakwani majira ya saa tisa alasiri, Timu ya Mahakama Sports iliwabwaga Uchukuzi na kuiwezesha kunyakua ubingwa katika mashindano hayo.

Uchukuzi waliingia uwanjani kwa mbwembwe wakitaka kuwaonyesha kazi ya Mandonga kwenye mechi hiyo ambayo imeshukudiwa na viongozi kadhaa wa Mahakama ya Tanzania, akiwemo Jaji Mfawidhi wa Mahakama Kuu ya Tanzania, Kanda ya Tanga, Mhe. Latifa Mansour, Mkurugenzi Msaidizi wa Utawala wa Mahakama Stephen Magoha, Mtendaji wa Mahakama Kuu, Divisheni ya Ardhi Anatory Kagaruki na Mtendaji wa Mahakama Kuu, Kanda ya Tanga Humprey Paya. 

Hata hivyo, Mahakama Sports ilikaa imara na kuwasambaratisha wapinzani hao katika mzunguko wa kwanza. Katika mzunguko wa pili, Timu ya Mahakama haikuwa na huruma na mtu ambapo Uchukuzi walikiona cha mtema kuni baada ya kuchakazwa vibaya, kitendo kilichowanyamazisha mashabiki wao na kuibua furaha na shangilia shangilia kwa watumishi wa Mahakama waliokuwa wamefurika katika viwanja hivyo.

Kabla ya mchezo huo, kulikuwepo na mechi nyingine ya fainali iliyowashirikisha Kamba Wanaume kutoka Ikulu na Mahakama. Katika mzunguko wa kwanza, uwanja ambao ulikuwa unateleza uliweza kuwasaidia Ikulu kupata ushindi.

Hata hivyo, baada ya kuzoea uwanja huo, vijana wa Mahakama waliweza kuwasimamisha Ikulu katika mzunguko wa pili na kuweza kuwakalisha chini wapinzani hao kwa muda mrefu.

Kanuni za mashindani zinaelekeza mchezaji akianguka chini anatakiwa kuachia kamba ili aweze kunyanyuka. Lakini cha kushangaza, Ikulu waling’ang’ania kamba wakiwa wamekaa chini bila mwamuzi kuchukua hatua yoyote.

Baada ya muda kupita wa dakika moja, ikasikika sauti kutoka jukwaa kuu kuwa Ikulu wameshinda, jambo lililowashangaza wengi. Kutokana na hali hiyo, mwamuzi hakuwa na la kufanya zaidi ya kuamuru mchezo huo kumalizika kwa sare, kitendo kilichozua malalamiko kutoka kwa wachezaji wa Mahakama.

Akizungumza baada ya michezo hiyo miwili, Katibu wa Mahakama Sports Robert Tende amesema watawaandikia viongozi wa SHIMIWI kuelezea masikitiko yao kwa jinsi walivyofanyiwa, ikiwemo kutokukabidhiwa makombe waliyostahili kupata.

Aliwapongeza wanamichezo wote kwa kujituma na kushiriki katika mashindano hayo kwa nidhamu ya hali ya juu. “Vijana wetu wamepambana sana, wanastahili pongezi. Figisu figisu tulizofanyiwa zililenga kututoa katika mchezo, lakini wachezaji wetu walibaki kuwa watulivu. Mashindano yamemalizika, hatujamalizana na Ikulu, tukutane mwakani,” alisema.

Wachezaji wa Kamba Wanawake walioiwakilisha Mahakama walikuwa ni Zahara Abdallah, Beatrice Dibogo, Judith Mwakyalagwe, Melina Mwinuka, Dotto Mlandula, Rebecca Mwakabuba, Salma Mwamende, Sarafina Mkumbo, Mariam Mayala, Zawadi Amir, Namweta Mcharo, Valeria Ntyangili, Anna Hebron, Lucy Mbwaga, Rose Mwalongo na Tumaini Kizito. 

Katika mchezo wa Kamba Wanaume, Mahakama Sports inawakilishwa na Leonard Kazimzuri, Yuda Mgalla, Patrick Mundwe, Denis Kipeta, Joseph Chokela, Mjuni Denis, Komba Mussa, Mochiwa Marko, Abdul Mumini, Mushi Martin, Magesa Phabian, Emmanuel Datsan, Robert Oguda, Rajab Mwaliko, Fidelis Choka na Exavery Kasembe.

Viongozi ambao waliambatana na Timu ni Mwenyekiti Wilson Dede, Makamu Mwenyekiti Fidelis Choka, Katibu Mkuu Robert Tende, Katibu Mkuu Msaidizi Theodosia Mwangoka, Mweka Hazina Rajab Ally, Timu Meneja Antony Mfaume, Afisa Michezo Nkrumah Katagile na Mjumbe Mwakilishi wa SHIMIWI Taifa Shaibu Kanyochole.

Mashindano ya SHIMIWI ambayo yalianza tarehe 1 Octoba, 2022 na kufunguliwa rasmi tarehe 5 Octoba, 2022 yalifanyika katika viwanja tofauti tofauti ikiwemo Viwanja vya Mkwakwani, Shule ya Sekondari Popatlal, Galanos Sekondari, Bandari, Shule ya Tanga, Polisi Chumbageni na Viwanja vya Gymkhana kwa kuhusisha michezo kadhaa.

Wakati wa sherehe za kufunga mashaindano hao, Mwakilishi kutoka Wizara ya Utamaduni, Sanaa na Michezo Ema Lyimo alisema kuwa Wizara ilipokea taarifa za mashindano ya mwaka huu kughubikwa na figisu figisu zalizozua malalamiko kutoka kwa washiriki.

Alisema Wizara iliyafanyia kazi baadhi ya malalamiko na kuwezesha mashindano kuendelea. Mwakilishi huyo wa Wizara alitoa angalizo kuwa Serikali imewekeza rasilimali fedha nyingi kwa watumishi kuweza kushiriki katika mashindano hayo.

"Kuendelea kwa malalamiko hayo kutayafanya mashindano yasiwe na maana," alisema na kuitaka SHIMIWI kushirikiana na Baraza la Michezo la Taifa (BMT) ili kuwezesha mashindano kufanyika kwa amani na salama.

Mahakama Sports iliyoshiriki katika michezo mbalimbali SHIMIWI ikiwa katika picha ya pamoja na makombe iliyokabidhiwa ya ushindi.

Mahakama Sports Kamba Wanawake wakiwa na viongozi wa Mahakama.

Mahakama Sports Netiboli wakiwa na viongozi wa Mahakama na makombe ya ushindi.

Mahakama Sports Kamba Wanawake na makombe ya ushindi.

Miamba ya Kamba Wanawake hiyo.

Majabali ya Kamba Wanaume, hata Ikulu wanalijua hilo.

Shamrashamra za kuanikiza ushindi. Mahakama Sports (juu na chini) wakijimwaga uwanjani kusherekea ushindi huo mnono.

Mahakama Sports Mpira wa Miguu (juu na chini) wakishangilia kombe lao.

Nahodha Msaidizi wa Mahakama Sports Kamba Wanaume Yuda Mgalla akipokea kombe kutoka kwa Mkuu wa Mkoa wa Tanga Omary Mgumba.

Mahakama Sports Kamba Wanaume na kombe lao.

Nahodha Msaidizi wa Timu ya Mahakama Sports Kamba Wanawake Beatrice Dibogo akipokea kombe kutoka kwa Mkuu wa Mkoa wa Tanga Omary Mkumba.

Mchezaji nguli wa Bao wa Mahakama Hashim Rashid akinyanyua kwapa.

Mfukuza upepo hatari wa Mahakama Justa George akipongezwa na Mkuu wa Mkoa.

Mshindi wa kurusha Tufe wa Mahakama Akanganyila Theophil akipongezwa na Mkuu wa Mkoa.

Mahakama Sports Kamba Wanaume wakiwa katika picha ya pamoja na viongozi.

Mahakama Sports Mpira wa Miguu wakiwa katika picha ya pamoja na viongozi.

Viongozi wa Mahakama Sports na makombe yao.