MAHAKAMA KUSHUGHULIKIA CHANGAMOTO YA KUTEMBEA UMBALI MREFU KUTAFUATA HAKI; MSAJILI MKUU

 Na Mwandishi wetu

Mahakama ya Tanzania inaendelea na mchakato wa kutatua changamoto ya baadhi ya wakazi wa Wilaya ya Kilolo ya kutembea umbali mrefu kwa ajili ya kutafuta huduma za haki.

Kauli hiyo imetolewa jana tarehe 15 Oktoba, 2022 na Msajili Mkuu wa Mahakama ya Tanzania Mhe. Wilbert Chuma wakati wa ziara yake ya kikazi Wilayani Kilolo, hii ni kutokana na baadhi ya wananchi wa Wilaya hiyo kutembea zaidi ya kilomita 80 kufuata huduma hizo za kimahakama.

Alisema Mpango Mkakati wa Mahakama ya Tanzania ni kuhakikisha kuwa wananchi wanapata huduma za upatikanaji wa haki katika mazingira ya karibu na kwa gharama nafuu.

Mhe. Chuma aliongeza kuwa katika awamu ya pili ya utekelezaji wa uboreshaji wa huduma za kimahakama inakusudia kuhakikisha kuwa wanapeleka huduma ya upatikanaji wa haki kwa wananchi wale wanaoishi katika mazingira ambayo ni magumu kufikika.

Aidha, Msajili Mkuu huyo aliahidi kuwa Mahakama ya Tanzania inahakikisha inahimiza matumizi ya mfumo ufunguaji na uendeshaji wa mashauri kwa njia ya Teknolojia ya Habari na Mawasiliano (TEHAMA).

Awali, Hakimu Mkazi Mfawidhi wa Wilaya ya Kilolo Mhe. Tumaini Geoffrey alisema, kuna vituo vitatu vya Mahakama za Mwanzo na hivyo kuwalazimisha wananchi kutembea zaidi ya kilometa 80 kutafuta huduma za Haki.

"Mhe Msajili Mkuu, Wilaya hii ya Kilolo ina Mahakama za Mwanzo tatu na hivyo wanannchi wanatembea kilometa 80 kutafuta huduma hizo katika maeneo ya Kilolo, Mahenge na Mazombe na kutumia gharama kubwa kutafuata huduma za kimahakama" alisema.

Msajili Mkuu wa Mahakama ya Tanzania, Mhe. Wilbert Chuma (kulia) akipokea maelezo kutoka kwa Hakimu Mkazi Mfawidhi wa Wilaya ya Kilolo Mhe. Tumaini Geoffrey (kushoto) wakati alipowasili Mahakama ya wilaya ya Kilolo kwa ziara ya kikazi na kusaini Kitabu cha Wageni, jana tarehe 15 Oktoba, 2022

Msajili Mkuu wa Mahakama ya Tanzania, Mhe. Wilbert Chuma (kushoto) akipokea maelezo kutoka kwa Hakimu Mkazi Mfawidhi wa Wilaya ya Kilolo Mhe. Tumaini Geoffrey (wa pili kulia) wakati alipokuwa akioneshwa eneo la Mahakama ya wilaya ya Kilolo alipokuwa kwenye ziara ya kikazi jana tarehe 15 Oktoba, 2022

Msajili Mkuu wa Mahakama ya Tanzania, Mhe. Wilbert Chuma (kulia) akitia saini kitabu cha wageni mara alipowasili Mahakama ya wilaya ya Kilolo kwa ziara ya kikazi, kushoto ni Hakimu Mkazi Mfawidhi wa Wilaya ya Kilolo Mhe. Tumaini Geoffrey