JAJI AMOUR ATOA USHAURI KUHUSU USHUGHULIKIAJI MASHAURI YA WANYAMAPORI

Na Mwandishi wetu, Mahakama

Jaji Mfawidhi wa Mahakama Kuu Kanda ya Tabora, Mhe. Amour Khamis ametoa rai kwa washiriki wa Mafunzo ya namna bora ya ushughulikiaji wa mashauri ya makosa dhidi ya wanyamapori na makosa yanayohusiana na hayo kutoa elimu na uzoefu walioupata kwa watumishi na wadau waliobaki maeneo yao ya kazi ili kuongeza ufahamu na tija katika kushughulikia mashauri ya aina hiyo.

Akizungumza na Washiriki wa mafunzo hayo yaliyofanyika jijini Arusha wakati akifunga mafunzo hayo hivi karibuni, Mhe. Khamis alisema kuwa, uelewa wa pamoja ni muhimu sana kwa kila mdau wa mnyororo wa usimamizi wa haki jinai hususani kwa mashauri yanayohusu makosa ya wanyamapori, mazao ya misitu na makosa yanayofanana na hayo.

“Hakuna shaka kuwa uelewa wa pamoja ni muhimu sana kwa kila mdau wa mnyororo wa usimamizi wa haki jinai hususani kwa mashauri yanayohusu makosa ya wanyamapori, mazao ya misitu na makosa yanayofanana na hayo.Hivyo basi, ni vizuri na vema kama washiriki wa mafunzo haya kujenga mtandao wa mawasiliano na kubadilishana uzoefu katika majukumu yetu ya kila siku na zaidi kuyafanyia kazi yale yote tuliyojifunza hapa ili kuwepo na thamani ya fedha ya mafunzo (value for money) kwa kuboresha utendaji kazi wetu,” alisema Jaji Amour.

Aliwakumbusha washiriki kuwa, vita ya wanyamapori ni ya wote, hivyo; kila mmoja kwa nafasi yake ana jukumu la kulinda wanyamapori pamoja na rasilimali na kwamba ni muhimu kuendelea kushirikiana kama wadau katika harakati za mapambano dhidi ya makosa hayo.

Jaji Mfawidhi huyo aliongeza kwa kufafanua kwamba, hapa nchini, taarifa ya Tanzania Wildlife Research Institute (TAWIRI), inaonesha kuwa kati ya 2009 na 2014, idadi ya tembo pekee ilipungua kutoka 109,051 mpaka kufikia 43,521 sawa na asilimia sitini (60%).

Mhe Jaji Amour alisema, takwimu hizi zinaonesha kuwa uhifadhi wa wanyamapori na misitu yetu ya asili vipo hatarini na hivyo inahitajika mipango na hatua madhubuti za kukabiliana na hali hii. Mafunzo haya yanawahusu wadau wa haki jinai katika vita dhidi ya makosa ya wanyamapori, mazao ya misitu na makosa yanayoendana au kufanana na hayo.

Alisema kupungua kwa wanyamapori hapa nchini kulichagizwa na udhaifu wa usimamizi wa mipaka yetu, sheria dhaifu za kusimamia wanyamapori, adhabu ndogo zilizokuwa zinatolewa kwa makosa ya wanyamapori, udhaifu wa vyombo vya kusimamia sheria za wanyamapori na uwepo wa rushwa.

Aidha; Jaji Amour aliwapongeza waandaji wote walioshirikiana kuandaa mafunzo hayo wakiwemo Chuo cha Uongozi wa Mahakama Lushoto (IJA) na kusema kuwa, kazi walioifanya ni kubwa.

"Niwahakikishie kuwa Chuo chetu cha IJA kimeendelea kufanya vizuri katika utoaji wa mafunzo ya namna hiyo na yale ya mtandao na hivyo kukitumia Chuo hicho, tutapata ubora kama tulioshuhudia katika mafunzo haya," alisisitiza.

Katika kipindi cha siku tano za mafunzo hayo, washiriki walipata mada mbalimbali pamoja na kujadili changamoto zilizopo katika kusimamia uhifadhi ya wanyamapori na misitu ya asili.

Mada zilizofundishwa ni pamoja na Sheria za wanyamapori kitaifa na kimataifa, Sera za wanyamapori nchini, athari za ujangili, athari za rushwa katika vita dhidi ya ujangili, upelelezi wa makosa yanayohusu wanyamapori, Sheria ya Uhujumi Uchumi na athari za mabadiliko ya sheria hiyo, taratibu za ukamataji, upekuzi na ukamataji wa vielelezo vya makosa ya wanyamapori na mazao ya misitu, utayarishaji wa hati za mashitaka na namna ya kutoa, kupokea na kusimamia vielelezo katika makosa ya wanyamapori.

Nyingine ni uendeshaji wa mashauri kwa njia ya kielektroniki (Remote Proceedings), Sheria za Ushahidi na Taratibu zake, Uendeshaji wa Makosa ya Uhujumu Uchumi, Suluhu Katika Makosa ya Jinai (Plea Bargain), Uandishi wa hukumu, utoaji wa adhabu, maadili kwa majaji, mahakimu na maofisa wa Mahakama, utekelezaji wa Amri za Mahakama, na Mahusiano baina ya nchi na nchi katika kushughulikia makosa ya jinai na Usimamizi Bora wa Mashauri ya Makosa ya Wanyamapori.

Kundi la kwanza la washiriki wa Mafunzo hayo lilijumuisha Majaji wa Mahakama Kuu, Waendesha Mashtaka Waandamizi na Wapelelezi Waandamizi pekee ambao walishiriki mafunzo hayo kwa siku tano kuanzia tarehe 10 hadi 14 Oktoba 2022, wakifuatiwa na kundi la pili la Mahakimu, Waendesha Mashtaka na Wapelelezi ambao watashiriki mafunzo hayo kuanzia tarehe 17 hadi 21 Oktoba 2022. Kundi la mwisho la Mahakimu, Waendesha Mashtaka na Wapelelezi litashiriki mafunzo hayo katika Chuo cha Uongozi wa Mahakama Lushoto kuanzia tarehe 24 hadi 28 Oktoba 2022.

Jaji Mfawidhi wa Mahakama Kuu Kanda ya Tabora, Mhe. Amour Khamis akifunga Mafunzo ya namna bora ya ushughulikiaji wa mashauri ya makosa dhidi ya wanyamapori na makosa yanayohusiana na hayo yaliyofanyika jijini Arusha kuanzia tarehe 10 Oktoba, 2022 hadi tarehe 14 Oktoba, mwaka huu.

Sehemu ya Washiriki wakifuatilia hotuba ya mgeni rasmi ambaye ni Jaji Mfawidhi wa Mahakama Kuu Kanda ya Tabora, Mhe. Amour Khamis (hayupo katika picha) alipokuwa akifunga mafunzo ya namna bora ya ushughulikiaji wa mashauri ya makosa dhidi ya wanyamapori na makosa yanayohusiana na hayo yaliyofanyika hivi karibuni.

Jaji Mfawidhi wa Mahakama Kuu Kanda ya Arusha, Mhe. Joachim Tiganga akizungumza na washiriki (hawapo katika picha) wakati wa hafla ya kufunga mafunzo iliyofanyika hivi karibuni.

Mmoja wa Washiriki wa Mafunzo ambaye ni Jaji wa Mahakama Kuu Kanda ya Arusha, Mhe. Devotha Kamuzora akipokea cheti cha ushiriki wa mafunzo hayo kutoka kwa Jaji wa Mahakama ya Rufani, Mhe. Stella Mugasha (katikati).

(Picha na Angel Meela, Mahakama-Arusha)