WATUMISHI WA MAHAKAMA SERENGETI WAPATA MATUMAINI MAPYA

Na Francisca Swai, Musoma

Watumishi wa Mahakama ya Mwanzo Mugumu Mjini wameonesha tabasamu la matumaini mapya kufuatia habari njema ya ujenzi wa Mahakama hiyo kwani kwa sasa wanatumia jengo la Halmashauri ya Wilaya ya Serengeti.

Katika siku yake ya pili kukaguzi shughuli mbalimbali za kimahakama, Jaji Mfawidhi wa Mahakama Kuu ya Tanzania, Kanda ya Musoma, Mhe. Fahamu Mtulya aliwaambia watumishi hao jana tarehe 26 Octoba, 2022 kuwa ujenzi wa Mahakama hiyo utaanza hivi karibuni.

Amesema tayari kiwanja kwa ajili ya shughuli hiyo kimeshapatikana. Mhe. Mtulya amewaasa watumishi hao kuendelea kufanya kazi kwa moyo licha ya ufinyu wa jengo wanalotumia kwa sasa kwani muda si mrefu watapata jengo la kisasa kwa ajili ya Mahakama hiyo.

Naye Mtendaji wa Mahakama Kuu Kanda ya Musoma, Bw. Festo Chonya alisema Mahakama ya Mwanzo Mugumu Mjini ni moja kati ya Mahakama zinazotarajiwa kujengwa kwa ufadhili wa Benki ya Dunia na utakuwa ni mradi utakaojengwa kwa muda wa miezi sita.

Kwa upande wao, watumishi wa Mahakama ya Mwanzo Mugumu Mjini wameushukuru uongozi wa Mahakama kwa kutambua changamoto walizonazo, hasa hiyo ya ufinyu wa jengo na kuweka hitaji hilo katika mpango wa ujenzi wa Mahakama mpya.

Mhe. Mtulya pamoja na msafara wake pia walikagua Mahakama ya Mwanzo Natta ili kufuatilia maelekezo yake ya ukaguzi wa mwezi Machi ambapo amewapongeza viongozi wa Mahakama ya Wilaya Serengeti kwa kutekeleza maelekezo yake, ikiwemo kununua tanki la lita 2,000 kwa ajili ya kuhifadhi maji ya mvua katika Mahakama hiyo kutokana na changamoto ya maji iliyopo katika eneo la Natta.

Viongozi hao wamewapongeza watumishi wa Mahakama ya Wilaya Serengeti kwa utendaji kazi mzuri wa kuigwa licha ya uchache wao ambapo wameweza kufanikisha azimio la kumaliza mashauri ya mrundikano 48 yaliyokuwepo mwezi Machi 2022 na kuwaasa kuendelea na kasi hiyo ili kutotengeneza tena mashauri ya aina hiyo.

Kwa upande wake, Naibu Msajili, Mhe. Frank Moshi alisisitiza wananchi ambao hawana uwezo wa kumudu gharama za kesi kufuata utaratibu unaotakiwa ili waweze kupata msaada wanaohitaji. Kadhalika, amewaasa watumishi kujiendeleza kwa manufaa ya taasisi.

Jaji Mfawidhi wa Mahakama Kuu ya Tanzania, Kanda ya Musoma, Mhe. Fahamu Mtulya, (katikati) akisisitiza jambo wakati wa ukaguzi wa Mahakama ya Mwanzo Natta. Amewapongeza viongozi wa Mahakama hiyo kwa ununuzi wa tanki la maji linaloonekana nyuma yao.

Jaji Mfawidhi wa Mahakama Kuu ya Tanzania, Kanda ya Musoma, Mhe. Fahamu Mtulya akisisitiza jambo wakati wa kikao na watumishi wa Mahakama ya Mwanzo Mugumu Mjini.

Picha ya pamoja ya watumishi wa Mahakama ya Mwanzo Mugumu Mjini pamoja na viongozi wa Kanda ya Musoma.

Afisa Tawala wa Mahakama ya Wilaya Serengeti Bi. Faraja Barakazi akionesha eneo litakalotumika katika ujenzi wa Mahakama ya Mwanzo Mugumu Mjini. Wengine katika picha ni Jaji Mfawidhi Fahamu Mtulya (wa tatu kushoto), Naibu Msajili, Mhe. Frank Moshi (wa kwanza kushoto), Hakimu Mkazi Mfawidhi Mahakama ya Wilaya Serengeti, Mhe. Jacob Ndira (wa pili kushoto), Mtendaji Kanda ya Musoma, Bw. Festo Chonya (wa tatu kulia) na Hakimu Mkazi Mahakama ya Wilaya Serengeti, Mhe. Adelina Mzalifu (wa kwanza kulia).

Watumishi wa Mahakama ya Wilaya Serengeti wakifuatilia kwa makini maelekezo ya Naibu Msajili, Mhe. Frank Moshi (aliyenyoosha mkono) wakati wa kikao cha kuhitimisha ukaguzi.

Picha ya pamoja ya viongozi wa Kanda ya Musoma na watumishi wa Mahakama ya Wilaya Serengeti.