Na Evelina Odemba – Mahakama Morogoro
Mahakama mkoani hapa imeanza kushirikiana na Jeshi la Polisi
kutoa elimu ya sheria kwa wananchi ili kukabiliana na ongezeko la matukio ya
uhalifu.
Hayo yamejidhihirisha hivi karibuni baada ya Jaji
Mfawidhi wa Mahakama Kuu ya Tanzania, Kanda ya Morogoro, Mhe. Paul Ngwembe kumwalika
Kamishna Msaidizi wa Polisi Mkoa wa Morogoro Hassan Omary kutoa elimu kwa
wananchi waliofika katika Kituo Jumuishi cha Utoaji Haki kuhudhuria mashauri
mbalimbali.
Kamishna Hassan aliwaelimisha wananchi juu ya namna
walivyojiandaa kukabiliana na matukio ya uhalifu kwa kuanzisha mradi ujulikanao
kama “Familia yangu haina uhalifu” ambapo umelenga kutoa elimu kuanzia ngazi ya
familia ambako matukio mengi ya uhalifu huanzia.
Aidha, Kamishna Hassan alitoa pongezi kwa uongozi wa
Mahakama Kanda ya Morogoro kwa elimu ya sheria wanayoitoa kwa wananchi, hatua
ambayo imesaidia kwa kiwango kikubwa kupunguza uhalifu. Ameahidi Jeshi la Polisi
Morogoro litatoa ushirikiano wa kutosha ili kuwafikishia wananchi elimu hiyo.
Akizungumza mara baada ya kipindi cha elimu, Jaji
Mfawidhi Ngwembe alisema kuwa elimu inayotolewa imekuwa na matokeo chanya kwani
imechangia kupungua kwa matukio mengi ya uhalifu.
Mhe. Ngwembe aliongeza kuwa uelewa mdogo wa sheria ni
chanzo kinachopelekea ongezeko la uhalifu katika jamii, ndio maana Mahakama imeamua
kuungana na Jeshi la Polisi mkoani hapa kutoa elimu hiyo kwa wananchi ili
kukabiliana na suala hilo.
Alisema kuwa kwa mwaka 2021 pekee takwimu zinaonesha kesi
zaidi ya 300 zilifikishwa mahakamani zikihusisha ubakaji wa watoto chini ya
miaka 18, kesi zaidi ya 280 zinazohusu bangi na madawa ya kulevya, kesi za
mauaji zikiwa 280 na ulawiti wa watoto ukihusisha kesi 50.
Hakuna maoni:
Chapisha Maoni