JUDICIARY OF TANZANIA: SHIRIKISHENI WANANCHI KATIKA MNYORORO WA UTOAJI HAKI: JAJI MKUU

Na Tiganya Vincent-Mahakama ya Tanzania

Jaji Mkuu wa Tanzania, Mhe. Prof. Ibrahim Hamis Juma amewataka watumishi wa Mahakama kuhakikisha wanawashirikisha wananchi kwenye mnyororo mzima wa utoaji haki.

Ametoa kauli hiyo leo tarehe 15 Novemba, 2022 wakati wa hafla ya uzinduzi wa majengo mawili ya Mahakama ya Wilaya ya Mwanga na Mahakama ya Wilaya ya Same.

Mhe. Prof. Juma alisema kuwa faida ya uboreshaji wa miundombinu ya Mahakama itakuwa na tija ikiwa utoaji haki utawashirikisha ipasavyo wadau na wananchi kwenye kujenga ubora, ufanisi na uwazi.

“Mathalan, Mahakama haitafanikiwa katika wajibu wake wa utoaji wa haki kwa wakati iwapo, kwa mfano Jeshi la Polisi halitaweza kupeleleza mashauri ya jinai kwa haraka,” alisisitiza.

Aidha, Mhe. Prof Juma alisema anaunga mkono mabadiliko ya sheria yaliyofanywa hivi karibuni kuzuia Jeshi la Polisi kuwakamata na kuwazuia watuhumiwa kabla ya upelelezi kukamilika.

Jaji Mkuu alisema marekebisho hayo yakitekelezwa ipasavyo suala la kuwepo kwa mlundikano wa Mahabusu wanaosubiri upelelezi wa kesi zao kukamilika utaisha.

Aidha, Jaji Mkuu huyo alisema mbinu ya kutumia usuluhishi katika kutatua migogoro ina faida ya kudumisha udugu pamoja na kurudisha mahusiano ya kijamii na hata ya kibiashara.

Aliwataka viongozi wa Mahakama za Wilaya za Mwanga na Same kuhakikisha kuwa huduma zao zinajumuisha usuluhishi, utoaji wa elimu ya sheria na utaratibu wa kimahakama.

Naye Mkuu wa Mkoa wa Kilimanjaro Nurdin Babu aliipongeza Mahakama ya Tanzania kwa uboreshaji wa miundombinu inayoendelea hapa nchini ambayo imetoa mazingira mazuri kwa watumishi wake kutekeleza majumuku yao kwa ufanisi.

Aliwataka Wabunge kuendelea kuiombea Mahakama kuongezewa bajeti yake ili iweze kuendelea na jukumu lake la kuhakikisha wananchi wanapata huduma ya upatikanaji haki katika mazingira ya karibu na rafiki.

Katika hatua nyingine, Jaji Mkuu wa Tanzania ameishukuru Serikali kwa uwezeshaji ambao umewasaidia kwenye tekelezaji wa Mpango Mkakati wake wa miaka mitano uliboresha miundombinu ya Mahakama mbalimbali hapa nchini.

“Leo hii tunashuhudia matunda ya uwezeshwaji uliofanywa na Serikali, usimamizi na utekelezaji wa Mpango wa Miaka Mitano wa Ujenzi na Ukarabati wa Miundombinu wa Mahakama uliofanywa na watumishi wa Mahakama ya Tanzania,”alisema.

Alisema katika utekelezaji wa Mpango Mkakati huo kwa ngazi ya Mahakama Kuu majengo mapya ya Mahakama Kuu Musoma na Kigoma, kukamilika kwa ukarabati wa Mahakama Kuu Mbeya na Mahakama Kuu Sumbawanga umefanyika.

Mhe. Prof. Juma alisema katika kipindi cha 2016 hadi 2021 cha utekelezaji wa Mpango Mkakati wa Miaka Mitano wa Ujenzi na Ukarabati wa Miundombinu wa Mahakama, Mahakama za Hakimu Mkazi saba, Mahakama za Wilaya 28 na Mahakama za Mwanzo 25 zilijengwa.

Jaji Mkuu wa Tanzania, Mhe. Prof. Ibrahim Hamis Juma (katikati) akikata utepe kuashiria uzinduzi wa majengo mawili ya Mahakama ya Wilaya ya Mwanga na Mahakama ya Wilaya ya Same. Hafla hiyo imefanyika leo tarehe 15 Novemba, 2022 katika jengo la Mahakama ya Wilaya Mwanga. Viongozi wengine walioshuhudia ni Naibu Waziri wa Katiba na Sheria, Mhe. Geofrey Pinda( watatu kushoto), Mkuu wa Mkoa wa Kilimanjaro, Mhe. Nurdin Babu (wa pili kulia), Jaji Kiongozi wa Mahakama Kuu ya Tanzania, Mhe. Mustapher Siyani (kushoto), Jaji Mfawidhi wa Mahakama Kuu ya Tanzania, Kanda ya Moshi, Mhe. Dkt. Juliana Masabo (wa pili kushoto) na Mtendaji Mkuu wa Mahakama ya Tanzania, Prof. Elisante Ole Ganriel (aliyeshika kipaza sauti).

Jaji Mkuu wa Tanzania, Mhe. Prof. Ibrahim Hamis Juma akiwasili katika viwanja vya Mahakama ya Wilaya Mwanga kwa ajili ya ufunguzi huo. Kushoto kwake ni Mtendaji Mkuu wa Mahakama ya Tanzania, Prof. Elisante Ole Gabriel. Kulia ni Mkurugenzi Msaidizi wa Utawala wa Mahakama ya Tanzania, Bw. Stephen Magoha.