MAHAKAMA KUU KANDA YA MANYARA YAANZA KAZI

Na Angel Meela-Mahakama, Arusha

Kanda mpya ya Mahakama Kuu ya Tanzania, Manyara iliyoanzishwa na Jaji Mkuu wa Tanzania, Mhe. Prof. Ibrahim Hamis Juma kupitia Tangazo la Serikali Namba 632, 2022 ili kusogeza huduma karibu na wananchi imeanza kufanya kazi rasmi na itatoa huduma zake ikiwa katika jengo la Mahakama ya Hakimu Mkazi Manyara.

Makabidhiano ya rasilimali watu na vitu yalifanyika jana terehe 15 Novemba, 2022 kati ya Jaji Mfawidhi wa Mahakama Kuu ya Tanzania, Kanda ya Arusha, Mhe. Joachim Tiganga na Jaji Mfawidhi wa Kanda hiyo mpya, Mhe. John Kahyoza ambaye awali alikuwa Jaji Mfawidhi wa Mahakama Kuu ya Tanzania, Kanda ya Mwanza.

Kabla ya kuanza kwa Kanda ya Manyara, kulifunguliwa Masjala ndogo katika Kituo Jumuishi cha Utoaji Haki Arusha ambayo ilikuwa chini ya Mhe. Tiganga. Tayari Masijala hiyo imeshapokea mashauri 16 tangu ilipoanzishwa ambapo mashauri matano kati ya hayo yamekwisha sajiliwa kwa njia ya kielektroniki na yataanza kusikilizwa, huku mengine yakisubiri uwasilishwaji wa nyaraka ngumu na malipo.

Akizungumza katika hafla ya makabidhiano hayo, Mhe. Tiganga alimkaribisha Jaji Mfawidhi Kahyoza pamoja na Jaji mwingine wa Mahakama Kuu ya Tanzania, Mhe. Gladys Barthy ambaye atahudumu katika Kanda ya Manyara ambapo ameahidi kuendelea kuwapa ushirikiano na wakutosha pindi watakapohitaji.

Jaji Mafawidhi huyo wa Arusha aliungana na Msajili wa Mahakama Kuu katika Kanda hiyo, Mhe. Judith Kamala kuwapongeza Mahakimu wote wa Manyara kwa kazi nzuri ya uondoshaji wa mashauri yaliyosajiliwa katika kipindi cha mwezi Agosti na Octoba, 2022 kwa takribani asilimia 99 katika Mahakama zao. Aliwaomba watumishi hao kuendelea kuongeza kasi katika utendaji kazi kama walivyokubaliana kwenye kikao walichokifanya mwezi Julai jijini Arusha.

Mhe. Tiganga akiwakabidhi wanachama wote wa Chama cha Majaji na Mahakimu Tanzania (JMAT) Mkoa wa Manyara ambao alikuwa mlezi wao kwa Jaji Mfawidhi mpya ambapo amewaeleza kuwa kama yeye alikuwa Paroko, basi sasa amewaacha kwenye mikono ya Askofu kwani Jaji Khayoza ndiyo atakuwa mlezi wao mpya.

Katika hafla hiyo, viongozi hao walipokea taarifa ya utendaji, rasilimali watu na vitu ya Mahakama zote za Mkoa wa Manyara kutoka kwa Hakimu Mkazi Mfawidhi wa Mahakama ya Hakimu Mkazi Manyara, Mhe. Mariam Lusewa ambaye, pamoja na mambo mengine, alisema wamejipanga kikamilifu kutoa ushirikiano kwa Majaji hao na wanafurahi kuanza kupata huduma za Mahakama Kuu.

Akizungumza na watumishi wa Mahakama na wadau mbalimbali kutoka ofisi ya Mwendesha Mashtaka, Usatwi wa Jamii na Mawakili wa Kujitegemea katika makabidhiano hayo, Mhe. Kahyoza aliwasihi kila mmoja wao kuwajibika katika maeneo yao ya kazi na kuwa na lengo moja la kumhudumia wananchi ili waweze kupata haki zao kwa wakati.

"Watu wenye lengo moja wakikaa pamoja hakuna jambo linaloharibika, lengo letu hapa sote ni moja, kuhakikisha kuwa wananchi wanapata haki na wanaipata kwa wakati. Sote tupo kwenye basi moja na tunasafiri safari moja, sasa abiria ni wale wale, basi ni lile lile na safari ni ile ile, ila tu dereva ndiyo amebadilika,” alisema.

Naye Mhe. Barthy alipokua akiwasalimu watumishi na wadau hao amesema amefurahi kufika Manyara na anawashukuru kwa mapokezi mazuri aliyoyapata na kwa ahadi ya ushirikiano waliyoitoa.

Pamoja na makabidhiano hayo, viongozi hao walipata nafasi ya kutembelea jengo zima la Mahakama Kuu Manyara ambalo linabeba Mahakama ya Hakimu Mkazi Manyara na Mahakama ya Wilaya Manyara.

Jaji John Kahyoza akisalimiana na watumishi alipowasili katika Mahakama Kuu Manyara.

Naibu Msajili wa Mahakama Kuu ya Tanzania, Kanda ya Arusha, Mhe. Judith Kamala akimkaribisha Jaji Mfawidhi wa Mahakama Kuu ya Tanzania, Kanda ya Arusha, Mhe. Joachim Tiganga kufanya makabidhiano na Jaji Mafawidhi wa Mahakama Kuu ya Tanzania, Kanda ya Manyara, Mhe. John Kahyoza.

Jaji Mfawidhi wa Mahakama Kuu ya Tanzania, Kanda ya Manyara, Mhe. John Kahyoza akizungumza katika hafla ya makabidhiano hayo.

Hakimu Mkazi Mfawidhi wa Mahakama ya Hakimu Mkazi Manyara, Mhe. Mariam Lusewa (wa pili kulia) akimuonyesha Jaji Kahyoza mazingira ya jengo la Mahakama hiyo.

Jaji Mfawidhi wa Mahakama Kuu ya Tanzania, Kanda ya Manyara, Mhe. John Kahyoza (katikati) akiwa katika picha ya pamoja na viongozi wa Mahakama na wadau.