WILAYA 28 HAZINA MAHAKAMA KATIKA MAENEO YAO: PROF. JUMA

Na Tiganya Vincent-Mahakama ya Tanzania

Wananchi katika Wilaya 28 kati ya 139 Tanzania Bara wanalazimika kusafiri umbali mrefu kupata huduma ya Mahakama katika Wilaya zilizopo jirani.

Kauli hiyo imetolewa tarehe 15 Novemba, 2022 na Jaji Mkuu wa Tanzania, Mhe. Prof. Ibrahim Hamis Juma wakati wa hafla ya uzinduzi wa majengo mawili ya Mahakama ya Wilaya ya Mwanga na Mahakama ya Wilaya ya Same.

Alisema kabla ya uzinduzi huo Wilaya 111 za Tanzania bara zilikuwa zinapata huduma katika ngazi ya Mahakama za Wilaya moja kwa moja.

Mhe. Prof. Juma aliongeza kuwa katika Wilaya zote nchini, Wilaya zenye majengo yao ya Mahakama za Wilaya zilikuwa ni 37, zilizobaki zimehifadhiwa katika majengo ya Serikali za Mitaa, Ofisi za Wakuu wa Wilaya na nyingine zinatumia majengo ya kukodi.

Alisema juhudi zinazoendelea kupitia Mpango Mkakati wa Mahakama ya Tanzania zitasaidia huduma za miundombinu ya Mahakama za Wilaya kuwa bora hadi kufikia mwisho wa mwaka huu.

Mhe. Prof. Juma aliongeza kuwa uzinduzi wa majengo ya Mahakama ya Same na Mwanga utafuatiwa na uzinduzi majengo mengine 18 ya Mahakama za Wilaya ikiwemo jengo la Mahakama ya Wilaya ya Busega.

Alisema baada ya uzinduzi huo Mwezi Desemba mwaka huu, Jaji Kiongozi wa Mahakama Kuu ya Tanzania naye atazindua majengo mapya ya Mahakama za Hakimu Mkazi Mpanda, Songwe na Lindi na kumalizia na majengo ya Mahakama za Wilaya za Namtumbo (Ruvuma), Nanyumbu (Mtwara) na Tandahimba (Mtwara).

Mhe. Prof. Juma alisema pamoja na uboreshaji ndani ya Mahakama unaoendelea hapa nchini bado mahitaji ya miundombinu ni makubwa ili kusogeza huduma karibu na wananchi.

Katika hatua nyingine, Jaji Mkuu aliwataka maeneo yote ambayo yamepata bahati ya miundombinu hiyo kuitunza ili yawe vitovu vya utoaji wa huduma bora kutoka kwa watumishi wa Mahakama na kwa wadau katika mnyororo wa utoaji haki.

Mhe. Prof. Juma alisema hategemei kuwa majengo hayo yajenge sifa ya ucheleweshwaji, mlundikano wa mashauri, uahirishwaji wa mashauri pasipo sababu za msingi, vitendo vya rushwa au utovu wa maadili.

Aidha Jaji Mkuu huyo aliwataka wananchi kushiriki katika kulinda na kutunza miundombinu ya Mahakama zilizopo na zinazojengwa kwa kuwa zimetokana na fedha kutoka katika kodi zao.

Jaji Mkuu wa Tanzania, Mhe. Prof. Ibrahim Hamis Juma akitoa hotuba ya uzindizi wa majengo ya Mahakama za Wilaya ya Same na Mwanga tarehe 15 Novemba, 2022.

Jaji Mkuu wa Tanzania, Mhe. Prof. Ibrahim Hamis Juma (katikati waliokaa) akiwa katika picha ya pamoja na viongozi mbalimbali mara baada ya hafla ya uzindizi wa majengo ya Mahakama za Wilaya ya Same na Mwanga.

Jaji Mkuu wa Tanzania, Mhe. Prof. Ibrahim Hamis Juma(katikati waliokaa) akiwa katika picha ya pamoja na Kamati ya Usalama ya Mkoa wa Kilimanjaro. 

Jaji Mkuu wa Tanzania Mhe. Prof. Ibrahim Hamis Juma (katikati waliokaa) akiwa katika picha ya pamoja na viongozi wa dini mbalimbali.

Jaji Mkuu wa Tanzania, Mhe. Prof. Ibrahim Hamis Juma(katikati waliokaa) akiwa katika picha ya pamoja na Menejiementi ya Mahakama ya Tanzania.

Jaji Mkuu wa Tanzania Mhe. Prof. Ibrahim Hamis Juma(aliye piga magoti) akishiriki zoezi la upandaji miti  mbalimbali mara baada ya hafla ya uzindizi wa majengo ya Mahakama za Wilaya ya Same na Mwanga.

(Picha na Tiganya Vincent).