TUME YA UTUMISHI WA MAHAKAMA KUANZA ZIARA MIKOA YA SHINYANGA NA SIMIYU

 Na Lydia Churi- Tume ya Utumishi wa Mahakama

Tume ya Utumishi wa Mahakama inaendelea na mikakati yake ya kujitangaza ambapo kesho tarehe 21 Novemba, 2022 wajumbe wa Tume hiyo wakiongozwa na Mwenyekiti wake Jaji Mkuu wa Tanzania Mhe. Prof. Ibrahim Hamis Juma wataanza ziara katika mikoa ya Shinyanga na Simiyu.

Katika ziara hiyo itakayoanzia mkoani Shinyanga, wajumbe wa Tume watakutana na watumishi wa Mahakama ya Tanzania Kanda ya Shinyanga wakiwemo Mahakimu na kufanya mazungumzo yanayohusu masuala mbalimbali ya utendaji kazi na baadaye watakutana na wadau wa utoaji haki wa mkoa huo kwa lengo la kuimarisha shughuli za utoaji haki mkoani humo.

Aidha, katika kutekeleza jukumu lake la usimamizi wa nidhamu na maadili ya watumishi wa Mahakama ya Tanzania, Wajumbe ya Tume hiyo pia watapata nafasi ya kukutana na wajumbe wa Kamati za Maadili ya Maafisa wa Mahakama ngazi ya Mkoa na wilaya wakiwemo wakuu mikoa na wilaya za mikoa ya Shinyanga na Simiyu ili kujadiliana namna ya kuimarisha utendaji kazi wa kamati hizo.  

Mkoani Simiyu, wajumbe wa Tume ya Utumishi wa Mahakama pia watakutana na watumishi wa Mahakama ya Hakimu Mkazi, wajumbe wa Kamati za Maadili ya Maafisa wa Mahakama ngazi ya mkoa na wilaya pamoja na wadau wa utoaji haki mkoani humu katika mikutano inayotarajiwa kufanyika Novemba 23 na 24 mwaka huu.

Wajumbe wa Tume ya Utumishi wa Mahakama ni pamoja na Jaji Mkuu wa Tanzania, Mwanasheria Mkuu wa Serikali, Jaji mmoja wa Mahakama ya Rufani anayeteuliwa na Rais, Jaji Kiongozi wa Mahakama Kuu ya Tanzania, na wajumbe wawili wanaoteuliwa na Rais.   

Tume ya Utumishi wa Mahakama imeundwa na Ibara ya 112 (1) ya Katiba ya Jamhuri ya Muungano wa Tanzania ya mwaka 1977. Aidha, majukumu ya Tume yameelezwa kwenye katiba hiyo katika Ibara ya 113 (1) ikisomwa pamoja na kifungu cha 29 cha Sheria ya Uendeshaji wa Mahakama Na. 4 ya mwaka 2011. Tume ya Utumishi wa Mahakama ni chombo cha Kikatiba kilichopewa jukumu la kusimamia uendeshaji wa Mahakama ya Tanzania.

Jaji Mkuu wa Tanzania na Mwenyekiti wa Tume ya Utumishi wa Mahakama Mhe. Prof. Ibrahim Hamis Juma akisalimiana na Watumishi wa Mahakama Kanda ya Shinyanga mara baada ya kuwasili leo mkoani humo tayari kwa kuanza ziara ya Tume. 

Jaji wa Mahakama ya Rufani ya Tanzania ambaye pia ni Mjumbe wa Tume ya Utumishi wa Mahakama Mhe. Dkt. Gerald Ndika akisalimiana na Watumishi wa Mahakama Kanda ya Shinyanga mara baada ya kuwasili leo mkoani humo tayari kwa kuanza ziara ya Tume. 

Jaji Kiongozi wa Mahakama Kuu ya Tanzania Mhe. Mustapher Siyani ambaye pia ni Mjumbe wa Tume ya Utumishi wa Mahakama akisalimiana na Watumishi wa Mahakama Kanda ya Shinyanga mara baada ya kuwasili leo mkoani humo tayari kwa kuanza ziara ya Tume. Anayefuata ni Mwanasheria Mkuu wa Serikali na Mjumbe wa Tume Mhe. Dkt. Eliezer Feleshi akifuatiwa na Mjumbe wa Tume Mhe. Bundala Kalolo.