MSAJILI MKUU AHIMIZA UBORESHAJI WA MTAALA WA MAFUNZO KUHUSU MASHAURI YA WATOTO

Na Tiganya Vincent-Mahakama ya Tanzania

Msajili Mkuu wa Mahakama ya Tanzania, Mhe. Wilbert Chuma amehimiza Mtaala ulioandaliwa na Chuo cha Uongozi wa Mahakama Lushoto kuboreshwa ili uweze kutumika kwenye mafunzo yatakayotolewa kwa Wasaidizi wa Kumbukumbu wa Mahakama katika kushughulikia mashauri ya watoto.

Mhe. Chuma alitoa wito huo hivi karibuni alipokuwa anafungua Warsha ya siku moja iliyowaleta pamoja baadhi ya Majaji, Naibu Wasajili, Mahakimu na Wasaidizi wa Kumbukumbu ili kujadili Mtaala huo ambao Shirika la Umoja wa Mataifa la Kuhudumia Watoto (UNICEF– Tanzania) lilishiriki pia katika kuuandaa.

Msajili Mkuu huyo alitumia fursa hiyo kuwasihi washiriki wa Warsha hiyo kutoa maoni ambayo yatasaidia kupata Mtaala unaozingatia mambo muhimu yatakayowawezesha Wasaidizi wa Kumbukumbu wa Mahakama katika mashauri ya watoto kutekeleza majukumu yao kwa ufanisi na uweledi.

“Natambua makarani mliopo hapa ni wabobevu katika eneo hili. Hivyo, kuweni huru na wazi katika kuchangia sababu mna uzoefu mkubwa. Hivyo, ninawatakia majadiliano mema katika kufanikisha azma hii,” Mhe. Chuma alisema.

Niimani yake kuwa mapendekezo yao yataboresha Mtaala huo na kuwezesha mafunzo yatakayotolewa kuwajengea uwezo Wasaidizi wa Kumbukumbu wa Mahakama katika mashauri ya watoto na kufikia adhima ya Serikali ya Jamhuri ya Muungano ya Tanzania na jumuiya ya kimataifa ya kuhakikisha haki ya mtoto inalindwa.

Mhe. Chuma aliwahakikishia washiriki wa Warsha hiyo kuwa Mahakama ya Tanzania itaendelea kutekeleza vema jukumu lake la utoaji haki ikiwepo utoaji wa haki mtoto kwa kuzingatia kanuni, taratibu, sheria na miongozo iliyopo

Aliwakumbusha kuwa Wasaidizi wa Kumbukumbu wa Mahakama ni wadau muhimu katika utunzaji wa kumbukumbu mbalimbali za Mahakama, ikiwemo zinazohusu mashauri ya watoto na ndio wanaoita mashauri na kupanga Mahakama na pengine hata kukutana na Watoto hawa kabla hata shauri halijaanza mahakamani.

Alisema Wasaidizi wa Kumbukukumbu za Mahakama ndio Wadau wa kwanza wanaopokea nyaraka zote zinazohusu Mashauri ya Watoto zinazoletwa Mahakamani na kwamba wao ndio wanaotunza Kumbukumbu hizo na kwa sehemu kubwa ndio wanaoandaa baadhi ya nyaraka hizo.

Alibainisha pia kuwa Wasaidizi wa Kumbukumbu ndio wanafanya kazi kwa karibu na wadau wa mashauri ya watoto wakiwepo Majaji na Mahakimu katika mashauri ya watoto mahakamani, hivyo, ni muhimu watumishi hao wakapewa mafunzo ya namna bora ya utekelezaji wa majukumu yao katika mashauri ya watoto ili kuwa na ufanisi katika uendeshaji wake. 

Msajili Mkuu wa Mahakama ya Tanzania, Mhe. Wilbert Chuma akifungu Warsha kujadili Mtaala wa mafunzo kwa Wasaidizi wa Kumbukumbu wa Mahakama iliyofanyika tarehe 18 Novemba, 2022 katika ukumbi wa Shule ya Sheria.

Msajili Mkuu wa Mahakama ya Tanzania, Mhe. Wilbert Chuma (katikati) akiwa katika picha ya pamoja na viongozi mbalimbali mara baada ya kufungua Warsha hiyo.

Msajili Mkuu wa Mahakama ya Tanzania, Mhe. Wilbert Chuma (katikati) akiwa katika picha ya pamoja na washiriki (juu na chini) baada ya kufungua Warsha hiyo.

(Picha na Ofisi ya Msajili Mkuu wa Mahakama ya Tanzania)