JAJI MKUU AZUNGUMZA NA UJUMBE WA MAHAKAMA KUTOKA UTURUKI

 

Magreth Kinabo na Innocent Kansha – Mahakama

Jaji Mkuu wa Tanzania, Mhe. Prof. Ibrahim Hamis Juma amekutana na Rais wa Mahakama inayoshughulikia migogoro na Katiba, wa Uturuki , Mhe .Muammer Topal, ambaye  aliambatana na  viongozi waandamizi wa    Mahakama  mbalimbali za nchi hiyo na kubadilisha uzoefu wa mifumo ya uendeshaji  wa shughuli za kimahakama baina ya nchi hizo mbili.

Viongozi hao wamefanya mazungumzo hayo, tarehe 18 Novemba, 2022 katika ofisi ya Jaji Mkuu iliyopo jijini Dar es Salaam, ambapo walizungumzia utendaji kazi wa shughuli za mahakama ikiwemo upatikanaji wa Majaji na Mahakimu, muundo wa Mahakama,nidhamu za maafisa wa Mahakama, uendeshaji wa mashauri kwa njia   ya Teknolojia ya Habari na Mawasiliano (TEHAMA) na Muundo wa  Tume ya Utumishi wa Mahakama.

Rais huyo, alitoa uzoefu wa mfumo wa kimahakama wa nchi yake ambao umegawanyika katika ngazi mbalimbali ambazo ni Mahakama ya Katiba, Mahakama ya Utawala, Mahakama Kuu, Mahakama ya Madai, Mahakama ya Jinai  Mahakama ya Kesi nyinginezo.

Alisema katika nchi yake kila kitu kinaendeshwa kwa mtandaoni na haimlazimu mtu kufika mahakamani, hivyo mtu hufungua kesi mahali popote alipo.

Rais huyo alisema kwa upande wa nchi yao Jaji anateuliwa kutoka Mahakama ya Utawala. Alisema pia kuwa katika nchi yake hutatua mashauri kwa njia ya usuluhishi, mbinu ambayo ni ya lazima kabla ya mwananchi kupeleka suala lake mahakamani.

Kwa upande wake Jaji Mkuu wa Tanzania, Prof. Juma aliuelezea ujumbe huo  kuwa Tanzania ina Mahakama ya Rufaa, Mahakama Kuu, Mahakama ya Hakimu Mkazi, Mahakama ya Wilaya na Mahakama ya Mwanzo.

Akizungumzia kuhusu matumizi ya teknolojia, Jaji Mkuu alisema Mahakama ya Tanzania imewekeza zaidi katika matumizi hayo‘’Hivi sasa kesi zinazofunguliwa mahakamani asilimia 100 zinafunguliwa kwa njia ya mtandao, na tulisikiliza kesi nyingi kwa kutumia TEHAMA wakati Covid 19 kuliko kipindi kingine, vifaa vya TEHAMA vilifungwa magerezani ili kuwezesha utumiaji huo.” alisema Jaji Mkuu.

Kuhusu upatikananji wa viongozi wa Mahakama, Prof. Juma alisema   kwa upande wa Tanzania, Jaji anapatikana baada kufanya kazi za kisheria   au Hakimu kwa kipindi   cha miaka 10. Pia jina lake liwe limepitishwa kwenye Tume ya Utumishi wa Mahakama. Hivyo majina yao yanapelekwa Tume ya Utumishi ya Mahakama kwa ajili ya kushauriana na Rais ambaye ndiye anayeteua kulingana na idadi inayotakiwa.

Akizungumzia kuhusu suala ya kutumia usuluhishi katika kutatua migogoro, Jaji Mkuu alisema kwa upande wa Tanzania si jambo lazima, ila huwa wanapenda kuwashauri wananchi kutatua migogoro yao kwa njia hiyo ambayo inamanufaa makubwa kwa pande zote mbili zinazohusika.

Jaji Mkuu wa Tanzania, Mhe. Prof. Ibrahim Hamis Juma, akizungumza  jana ofisini kwake jijini Dar es Salaam na Rais wa  wa Mahakama inayoshughulikia migogoro na Katiba wa Uturuki , Mhe .Muammer Topal, ambaye aliambatana na ujumbe wa viongozi waandamizi wa    Mahakama mbalimbali  za nchi hiyo.

Jaji Kiongozi wa Mahakama Kuu ya Tanzania, Mhe. Mustapher Siyani wa kwanza (kushoto) akiwa na viongozi waandamizi wa   Mahakama mbalimbali  za nchi ya Uturuki wakati wa mazungumzo hayo.

Rais wa Mahakama inayoshughulikia migogoro na Katiba wa Uturuki, Mhe. Muammer Topal (wa kwanza kulia aliyenyoosha mkono) akizungumza jambo kwenye mazungumzo hayo, mwingine ni Balozi wa Uturuki nchini Tanzania, Mhe. Dtk.Mehmer Gulluoglu.

Jaji Mkuu wa Tanzania, Mhe. Prof. Ibrahim Hamis Juma, akimkabidhi picha  wanyama Rais wa Mahakama inayoshughulikia migogoro na Katiba wa Uturuki, Mhe .Muammer Topal (kulia) baada ya kufanya mazungumzo kuhusu shughuli za Mahakama jana.

Rais wa Mahakama inayoshughulikia migogoro na Katiba wa UturukiMuammer Topal (kulia) akimkabidhi Jaji Mkuu wa Tanzania, Mhe. Prof, Ibrahim Hamis Juma zawadi ya picha ya saa baada ya kufanya mazungumzo kuhusu shughuli za Mahakama jana.

Jaji Mkuu wa Tanzania, Mhe. Prof. Ibrahim Hamis Juma (katikati) akiwa katika picha ya pamoja na Rais wa Mahakama inayoshughulikia migogoro na Katiba wa Uturuki, Mhe .Muammer Topal wa (wa tatu kushoto), wa pili kulia ni Jaji Kiongozi wa Mahakama Kuu ya Tanzania, Mhe. Mustapher Siyani, wa tatu kulia ni Balozi wa Uturuki nchini Tanzania, Mhe. Dtk.Mehmer Gulluoglu, wengine baadhi viongozi waandamizi wa    Mahakama mbalimbali za nchi hiyo.

(Picha na Innocent Kansha- Mahakama)