KAMATI YA TATHMINI YA MAHAKAMA YAHIMIZWA KUZINGATIA USIRI, UADILIFU

Na Faustine Kapama-Mahakama, Arusha

Mtaalamu wa Manunuzi kutoka Chuo cha Elimu ya Biashara (CBE), Bw. Jackson Musiba ameisihi Kamati ya Tathmini iliyochaguliwa kuchambua maombi ya Wazabuni 138 kwenye miradi mipya ya Mahakama ya Tanzania kuzingatia uadilifu na usiri wa hali ya juu wanapotekeleza jukumu hilo ili kufikia uamuzi sahihi.

Bw. Musiba ametoa ushauri huo leo tarehe 4 Januari, 2023 katika Ukumbi wa Kituo Jumuishi cha Utoaji Haki jijini hapa alipokuwa anawasilisha mada katika siku ya pili ya mafunzo ya siku tatu ya namna ya kufanya tathmini za zabuni za wataalam washauri wa usanifu majengo na usimamimizi wa miradi ya ujenzi.

Amewaeleza watumishi hao wa Mahakama kutoka maeneo kadhaa nchini wenye kada mbalimbali kuwa kazi wanayoenda kuifanya ni muhimu ambayo itaacha alama katika historia nzima ya Mahakama ya Tanzania, hivyo hawana budi kuongeza umakini wanapotekeleza jukumu hilo waliloaminiwa kulifanya.

“Tujitahidi kufanya uamuzi ambao ni sahihi. Tuongeze umakini kwenye kazi hii ili tuisaidie nchi yetu. Kamati za Tathmini huwa zinatafutwa sana na makampuni, nawaomba msiingie kwenye mtego wao wa aina yoyote. Tekelezeni wajibu wenu kwa kuzingatia uadilifu na kutunza siri,” amesema.

Kadhalika, Bw. Musiba amewaomba watumishi hao wanapotekeleza jukumu walilopewa kujiamini, huku akiwakumbusha kuwa kuna gharama hasi kwa wao kuwa mawakala wa makampuni kama wataamua kujiingiza kwenye mtego huo.

“Nawaomba mzidishe umakini kwenye kazi hii, kama kuna ujanja ujanja hapa siyo mahali pake. Naomba muelewe kuwa kuna maslahi ya nchi kwenye majengo yatakayojengwa. Tuonyeshe ubora kwenye uamuzi tutakaofanya ili tuisaidie nchi yetu,” alisema.

Mtaalamu huyo amewapitisha watumishi hao kwenye vipengele kadhaa muhimu wanavyoenda kufanyia kazi, ikiwemo kuzingatia jukumu kuu na uzoefu wa miaka wa kampuni, uwezo wa kiufundi na usimamizi wa kampuni na sifa na uzoefu wa wataalamu muhimu katika kampuni inayohusika.

“Msije na mawazo wengine, zingatieni vipengele hivi muhimu. Nyinyi ndio mnaoenda kutoa uamuzi kwa Wazabuni walioomba kazi. Ebu fikiria utajisikiaje kama jengo ambalo wewe umehusika kupitisha uamuzi likianguka baada ya miaka mitano, sita ijayo. Tuongeze umakini,” alisema.

Mahakama ya Tanzania, kupitia Kitengo cha Maboresho, imeandaa mafunzo maalumu kwa watumishi wa kada mbalimbali wakiwemo Wahandisi, Wasanifu majengo, Maafisa Ugavi, Mahakimu, Wasajili, Wahasibu, Wachumi na Watakwimu kuwajengea uwezo katika masuala yanayohusu ufanyaji wa tathmini za zabuni.

Hatua hiyo inafuata baada ya kupata maombi 138 kutoka kwenye makampuni ambayo yanataka kutoa ushauri kuhusu masuala ya usanifu majengo pamoja na usimamizi wa miradi ya ujenzi.

Baada ya mafunzo hayo, Kamati hiyo ya Tathmini itajichimbia kwa siku kadhaa kufanya zoezi la tathmini kujua wazabuni wapi wanafaa kufanya kazi hizo.

Mtaalamu wa Manunuzi kutoka Chuo cha Elimu ya Biashara (CBE), Bw. Jackson Musiba (juu na chini) akisisitiza jambo alipokuwa anawasilisha mada kwenye mafunzo ya namna ya kufanya tathmini za zabuni za wataalam washauri wa usanifu majengo na usimamimizi wa miradi ya ujenzi.

Sehemu ya watumishi wanaohudhuria mafunzo hayo (juu na chini) ikifuatilia uwasilishaji wa mada hiyo.

Sehemu nyingine ya watumishi wanaohudhuria mafunzo hayo (juu na chini) ikifuatilia uwasilishaji wa mada kutoka kwa Mtaalamu wa Manunuzi kutoka Chuo cha Elimu ya Biashara (CBE), Bw. Jackson Musiba.

Sehemu nyingine ya tatu ya watumishi wanaohudhuria mafunzo hayo (juu na  picha mbili chini) ikifuatilia uwasilishaji wa mada  hiyo.