KAMATI TENDAJI MAHAKAMA SPORTS YAWEKA MAMBO SAWA

·Yahimiza mchakamchaka kila kona kujiwinda na mashindano Mei Mosi

Na Faustine Kapama-Mahakama, Dar es Salaam

Kamati Tendaji ya Timu ya Mahakama ya Tanzania (Mahakama Sports) hivi karibuni ilikutana ili kujadili na kutathmini maendeleo ya Timu hiyo na pia kujiandaa na kuweka mikakati namna itakavyoshiriki katika mashindano ya Mei Mosi yanayotarajiwa kufanyika mkoani Morogoro kuanzia tarehe 14 Aprili, 2023 hadi tarehe 01 Mei, 2023.

Katika taarifa iliyotolewa na Katibu wa Mahakama Sports Taifa Robert Tende iliwanukuu Mwenyekiti Wilson Dede pamoja na Afisa Michezo Nkurumah Katagira wakiwahimiza viongozi wawakilishi mikoani wahakikishe wanasimamia mazoezi ipasavyo kwa ajili ya kupata timu nzuri itakayoiwakilisha Mahakama katika mashindano hayo.

“Washindi wa kwanza wote hupewa zawadi siku ya kilele cha Mei Mosi ambayo mgeni rasmi hutoa vikombe na mara nyingi huwa Rais wa Jamhuri ya Muungano wa Tanzania, hii ni heshima kubwa. Wanamichezo wa Mahakama wachukulie mashindano haya kwa umuhimu unaostahili, kwani ni sehemu pekee na kubwa ambayo Mahakama itajidhihirisha katika ukubwa wake katika utoaji haki” sehemu ya taarifa hiyo ilieleza ikimnukuu Dede akisema.

Naye Katibu wa Mahakama Sports alieleza katika taarifa hiyo kuwa kila mara watumishi wa Mahakama kwa kushirikiana na wadau wengine wamekuwa wakishiriki katika mazoezi na kufanya mabonanza mbalimbali ndani na nje ya Mahakama, hivyo kujenga mahusiano mazuri na jamii inayowazunguka. Alisema mazoezi hayo pia yanajenga afya, kujikinga na magonjwa yasiyoambukiza na kuleta hamasa kwenye akili, hivyo kupelekea uwepo wa tija katika taasisi.

“Mei Mosi ni michezo ambayo inashirikisha wafanyakazi wa taasisi zote na washiriki wa michezo hii ni wafanyakazi halali wa taasisi, mashirika, wizara na makampuni binafsi, hivyo tunatakiwa kujiandaa vizuri na kuweka mikakati thabiti ya kuweza kuhimili mashindano hayo ili kuweza kuibuka washindi,” Katibu huyo alieleza kwenye taarifa hiyo. 

Viongozi hao walitumia nafasi hiyo kuushukuru uongozi wa Mahakama ya Tanzania kwa ushirikiano wanaowapatia, kwani umekuwa chachu ya Timu hiyo katika kufanya vizuri kila mwaka.

Kwa mujibu wa taarifa hiyo, mashindano hayo ya Mei Mosi yatashirikisha timu kutoka mashirikisho ya SHIMIWI, SHIMUTA, SHIMISHEMITA na BAMMATA, ambayo huratibiwa na TUCTA, ambapo timu shiriki zinatakiwa kufika kwenye kituo cha michezo kuanzia April 14, 2023. 

Michezo itakayochezwa kwenye mashindano hayo ni mpira wa miguu, netiboli, mpira wa wavu, riadha, karata, baiskeli, drafti, bao, karata na mpira wa wavu.

Katika kilele cha mashindano hayo ambayo pia ni Siku ya Wafanyakazi Duniani, Rais wa Jamhuri ya Muungano wa Tanzania Mhe. Dkt. Samia Suruhu Hassan anatarajiwa kuwa mgenmi rasmi na atatoa zawadi kwa washindi wa kwanza.

Viongozi wengine waliohudhuria ni Fidelis Choka (Makamu Mwenyekiti), Theodosia Mwangoka (Naibu Ktibu Mkuu), Shaibu Kanyochole (Mjumbe SHIMIWI), Rhoida Makasi (Mjumbe), Spear Mbwembwe (Mwalimu wa Timu) na Joyce Nkoliala (Mwalimu wa Timu).

Kamati Tendaji ya Mahakama Sports(juu na chini) kwenye kikao kizito kuweka mambo sawa kuelekea mashindano ya Mei Mosi.