HABARI NJEMA KWA WANACHAMA WA TUGHE MAHAKAMA SINGIDA

Na Eva Leshange, Mahakama Singida

Mwenyekiti wa Chama cha Wafanyakazi wa Serikali Kuu na Afya (TUGHE) Mkoa wa Singida, Dkt. Athumani Bunto jana tarehe 14 Aprili, 2023 alitembelea wanachama wa TUGHE wa Mahakama ya Hakimu Mkazi Singida na kuwapa habari njema kuhusu fedha zinazokatwa kwenye mishahara yao.

Dkt. Bunto ambaye aliambatana na Katibu Msaidizi wa TUGHE, Bi Hadija Kapiligi aliwaeleza watumishi kuwa kwa sasa fedha zao walizokuwa wanakatwa zimeshaanza kuingizwa kwenye akaunti za matawi.

“Fedha zilizokuwa zinakatwa zimeanza kuingizwa kwenye akaunti za matawi, hivyo viongozi wa tawi hili hakikisheni akaunti inafunguliwa. Fedha hizi zitasaidia kuendesha shughuli mbalimbali za tawi, ikiwemo kuendesha vikao vya TUGHE na kufanya malipo mbalimbali,” alisema.

Aliwasisitiza watumishi kuendelea kujiunga na vyama vya wafanyakazi kwani vipo kisheria na vimekuwa na faida nyingi, ikiwemo kutetea maslahi yao na kuwa mdhamini wa mwanachama anapokuwa na mashauri ya kinidhamu.

“Vile vile vyama hivi vya wafanyakazi vinasaidia kuunganisha watumishi wote wa juu, wa kati na wa chini” Mwenyekiti huyo aliwaambia watumishi hao wa Mahakama katika ziara yake ya pili kutembelea tawi hilo.

Dkt. Bunto alisisitiza Dunia inapoelekea kuadhimisha maadhimisho ya Siku ya Wafanyakazi na kwakuwa kutakuwa na uchaguzi wa kutafuta wafanyakazi hodari ni vyema kuzingatia kuchagua watumishi wenye sifa.

Akizungumza katika tukio hilo, Katibu Msaidizi wa TUGHE alibainisha sifa hizo, ikiwemo kuwa mwanachama wa TUGHE, anayetimiza wajibu wake kazini, anayependa na kuthamini kazi, hodari na jasiri na mwenye kusikiliza ushauri wa wengine.

Mwenyekiti wa TUGHE Mkoa wa Singida, Dkt. Athumani Bunto (aliyeketi kulia) akifafanua jambo katika kikao hicho. Pembeni yake ni Katibu wa Tawi la TUGHE katika Mahakama ya Hakimu Mkazi Singida, Bw. Idd Yange.

Kitibu Msaidizi wa TUGHE Mkoa wa Singida, Bi Hadija Kapiligi (aliyeshika karatasi) akisoma sifa za mfanyakazi Hodari. Pembeni yake ni Mwenyekiti Tawi la TUGHE Mahakama ya Hakimu Mkazi, Bi Mwanahamis Hussein.

Sehemu ya watumishi wa Mahakama wakisikiliza kwa makini.

(Habari hii imehaririwa na FAUSTINE KAPAMA-Mahakama, Mwanza)