JAJI MATUMA KUSAMBARATISHA MLUNDIKANO WA MASHAURI TABORA

·Apokea ofisi rasmi kutoka kwa Jaji Amour

Na Amani Mtinangi- Mahakama. Tabora

Jaji Mfawidhi wa Mahakama Kuu ya Tanzania, Kanda ya Tabora, Mhe. Athuman Matuma jana terehe 17 Mei, 2023 amekabidhiwa rasmi ofisi na aliyekuwa Jaji Mfawidhi wa Mahakama katika Kanda hiyo, Mhe. Amour Khamis na kuahidi kuelekeza nguvu kubwa kuhakikisha mashauri ya mlundikano yanamalizika.

Mhe. Matuma alisema uwiano wa mashauri anaoachiwa ni mzuri ukilinganisha na idadi ya Majaji na Mahakimu waliopo. Alitolea mfano wa Mahakama Kuu yenye Majaji watatu ambayo kuna mashauri 393 ukilinganisha na Mahakama Kuu Shinyanga yenye takriban mashauri 600.

“Kituo hiki kina mashauri machache ukilinganisha na nilipotoka katika Mahakama Kuu Shinyanga. Kwa mujibu wa taarifa zilizopo, hapa kuna mashauri 393 ukilinganisha na takriban mashauri 600 ya Shinyanga,” alisema.

Mhe. Matuma alionyesha kuridhishwa na ushirikiano alioupata kwa kipindi kifupi alichokaa Tabora na kuahidi kuendeleza mazuri yote aliyoyakuta.

Akizungumza wakati wa kukabidhi ofisi hiyo, Mhe. Amour alishukuru ushirikiano alioupata kwa watumishi na wadau wote katika kipindi alichokuwa akihudumu katika kituo hicho.

Alimhakikishia Jaji Matuma kuwa watumishi wanaohudumu katika kituo hicho wana ari, moyo na juhudi ya kufanya kazi na kusifu hatua mbalimbali na ubunifu uliofanywa na viongozi.

“Watumishi wa kituo hiki ni wachapakazi, weledi na wana ari ya kufanya kazi, ni watendaji wasiohitaji kusimamiwa. Naamini watakuwa msaada sana kwako kwenye utekelezaji wa majukumu yako,” alisema.

Kwa upande wake, Naibu Msajili wa Mahakama Kuu ya Tanzania, Kanda ya Tabora, Mhe. Niku Mwakatobe alimshukuru Mhe. Amour kwa uongozi wake mzuri na wa kuigwa, huku akimkaribisha Mhe. Matuma katika Kanda ya Tabora.

Naye Mtendaji wa Mahakama Kanda ya Tabora, Bw. Ginaweda Nashon alisema Jaji Amour alikuwa mwalimu na msaada kwake tangu alipofika katika Kanda hiyo, alimpokea na kufanya naye kazi vizuri.

Jaji Amour Khamis akizungumza wakati anawasilisha taarifa ya makabidhiano ya Ofisi ya Jaji Mfawidhi wa Mahakama Kuu ya Tanzania, Kanda ya Tabora.

Jaji Mfawidhi wa Mahakama Kuu ya Tanzania, Kanda ya Tabora, Mhe. Athuman Matuma (aliyesimama) akisema neno wakati wa hafla ya makabidhiano ya ofisi hiyo.

Naibu Msajili wa Mahakama Kuu Kanda ya Tabora, Mhe. Niku Mwakatobe akitoa neno la shukrani katika hafla ya makabidhiano.

Baadhi ya watumishi wa Mahakama Kuu Kanda ya Tabora wakimsikiliza Jaji Amour Khamis (katikati) katika hafla hiyo.

Hakimu Mkazi Mfawidhi wa Mahakama ya Wilaya Uyui, Mhe. Tausi Mongi (aliyesimama) akisema neno wakati wa makabidhiano hayo.

(Habari hii imehaririwa na FAUSTINE KAPAMA-Mahakama)