MAANDALIZI MKUTANO MAHAKAMA YA RUFANI MOROGORO YAKAMILIKA

Na Faustine Kapama-Mahakama, Morogoro

Maandalizi ya Mkutano wa Mwaka wa Mahakama ya Rufani ya Tanzania unaotarajiwa kuanza kesho tarehe 27 Julai, 2023 mjini hapa chini ya Mwenyekiti wake, Jaji Mkuu wa Tanzania, Mhe. Prof. Ibrahim Hamis Juma, yamekamilika.

Msajili wa Mahakama ya Rufani, Mhe. Sylvester Kainda amesema kuwa tayari Viongozi Wakuu wa Mahakama, Majaji wa Mahakama ya Rufani na wajumbe wengine wameshaanza na wanaendelea kuwasili.

“Maandalizi ya Mkutano wetu yameshakamilika. Tayari tumeshampokea Jaji Mkuu wa Tanzania, Mhe. Prof. Ibrahim Hamis Juma, Majaji wa Mahakama ya Rufani na wajumbe wengine wameshaanza kuwasili kwenye eneo la Mkutano,” amesema.

Amemtaja Kiongozi mwingine ambaye ameshawasili katika eneo la Mkutano utakaofanyika katika Hoteli ya Nashera mjini hapa kuwa Jaji Kiongozi wa Mahakama Kuu ya Tanzania, Mhe. Mustapher Mohamed Siyani, ambaye ni miongoni mwa Viongozi wa Mahakama ya Tanzania ambao wamealikwa kwenye Mkutano huo.

Viongozi wengine waalikwa ni Mtendaji Mkuu wa Mahakama ya Tanzania, Prof. Elisante Ole Gabriel, Msajili Mkuu wa Mahakama ya Tanzania, Mhe. Wilbert Chuma na Msajili wa Mahakama Kuu, Mhe. Sharmillah Sarwatt.

Wajumbe wengine wa Mkutano huo ni Naibu Wasajili wa Mahakama ya Rufani, baadhi ya Wakuu wa Idara na watumishi wa Mahakama ya Rufani ambao nao wameshawasili.

Kwa mujibu wa ratiba iliyotolewa leo tarehe 26 Julai, 2023, taarifa na mada mbalimbali zitawasilishwa katika Mkutano huo wa siku mbili unaotarajiwa kumalizika tarehe 28 Julai, 2023. Katika siku ya kwanza, taarifa kadhaa zitawasilishwa, ikiwemo inayohusu mashauri kwa kipindi cha Januari-Disemba, 2022.

Miongoni mwa taarifa zitakazowasilishwa siku ya pili ya Mkutano ni ile inayohusu hatua iliyofikiwa ya Mpango Mkakati wa Mahakama na hatua ya utekelezaji wa awamu ya pili ya mradi wa maboresho na kupata taarifa ya hali ya mifumo ya Teknolojia ya Habari na Mawasiliano (TEHAMA), maboresho yanayoendelea na safari ya kuelekea Mahakama mtandao.

Pia kutakuwepo na uwasilishaji wa mada mbalimbali kutoka kwa wawezeshaji wabobezi, wakiwemo Majaji wa Mahakama ya Rufani wastaafu, Mhe. Edward Rutakangwa na Mhe January Msoffe.

Jaji Mkuu wa Tanzania, Mhe. Prof. Ibrahim Hamis Juma (katikati) akizungumza na Majaji wa Mahakama Kuu ya Tanzania, akiwemo Jaji Kiongozi, Mhe. Mustapher Mohamed Siyani (kushoto kwa Jaji Mkuu) baada ya kuwasili katika Hoteli ya Nashera mjini Morogoro.

Jaji Mkuu wa Tanzania, Mhe. Prof. Ibrahim Hamis Juma akiwasili katika Hoteli ya Nashera mjini Morogoro kwa ajili ya Mkutano wa mwaka wa Mahakama ya Rufani unaotarajiwa kuanza kesho tarehe 27 Julai, 2023.

Jaji Kiongozi wa Mahakama Kuu ya Tanzania, Mhe. Mustapher Mohamed Siyani akipokelewa na Jaji Mfawidhi Mahakama Kuu ya Tanzania, Kanda ya Morogoro, Mhe. Paul Ngwembe baada ya kuwasili katika Hoteli ya Nashera mjini Morogoro kwa ajili ya Mkutano wa mwaka wa Mahakama ya Rufani.

Jaji Kiongozi wa Mahakama Kuu ya Tanzania, Mhe. Mustapher Mohamed Siyani (katikati) akizungumza na Majaji na Viongozi wengine waliompokea baada ya kuwasili katika Hoteli ya Nashera mjini Morogoro.

Jaji Kiongozi wa Mahakama Kuu ya Tanzania, Mhe. Mustapher Mohamed Siyani (wa pili kushoto) akisalimiana na Jaji wa Mahakama ya Rufani, Mhe. Omar Makungu baada ya kuwasili katika Hoteli ya Nashera mjini Morogoro.

Majaji wa Mahakama ya Rufani wakibadilishana mawazo  baada ya kuwasili katika Hoteli ya Nashera mjini Morogoro. Kutoka kulia ni Mhe. Rehema Mkuye, Mhe. Rehema Kerefu,  Mhe. Dkt. Lilian Mashaka na Mhe. Abraham Mwampashi.

Jaji wa Mahakama ya Rufani, Mhe. Ferdinand Wambali (katikati) akiwasili katika Hoteli ya Nashera mjini Morogoro.

Jaji wa Mahakama ya Rufani, Mhe. Mwanaisha Kwariko akipandisha ngazi baada ya akiwasili katika Hoteli ya Nashera mjini Morogoro.

Jaji wa Mahakama ya Rufani, Mhe. Winfrida Korosso akiwasili katika Hoteli ya Nashera mjini Morogoro.

Jaji wa Mahakama ya Rufani, Mhe. Barke Sahel akishuka kwenye gari baada ya akiwasili katika Hoteli ya Nashera mjini Morogoro.

Jaji wa Mahakama ya Rufani, Mhe. Panterine Kente akiteta jambo na Naibu Wasajili wa Mahakama hiyo baada ya akiwasili katika Hoteli ya Nashera.

Vijana wapo kazini kuweka mambo sawa.