MAJAJI MAHAKAMA YA RUFANI WANACHAPA KAZI

 ·Bado asilimia saba tu kufikia 100 umalizaji mashauri

Na Faustine Kapama-Mahakama, Morogoro

Kasi ya kumalizika kwa mashauri (clearance rate) katika Mahakama ya Rufani ya Tanzania imepanda kutoka asilimia 73 kwa mwaka 2021 mpaka kufikia asilimia 93 kwa mwaka 2022.

Hayo yamebainishwa na Msajili wa Mahakama ya Rufani, Mhe. Sylvester Kainda alipokuwa akiwasilisha taarifa ya mashauri kwenye Mkutano wa Mwaka ambao umefunguliwa leo tarehe 27 Julai, 2023 na Jaji Mkuu wa Tanzania, Mhe. Prof. Ibrahim Hamis Juma.

“Kiwango cha kumaliza mashauri kwa kipindi cha mwezi Januari-Disemba 2022 kilikuwa ni asilimia 93. Hivyo Mahakama ya Rufani kwa kipindi cha Januari-Disemba 2022 ilikuwa na uwezo wa kumaliza asilimia 93 ya mashauri yanayosajiliwa. Katika kipindi cha mwaka 2021, kiwango cha kumaliza mashauri kilikuwa ni asilimia 73, hivyo kasi ya kumaliza mashauri imepanda kwa asilimia 20,” amesema.

Mhe. Kainda ameueleza Mkutano huo unaofanyika katika Hoteli ya Nashera mjini hapa kuwa Mahakama ya Rufani ilianza mwaka mpya wa 2022 ikiwa na jumla ya mashauri 5,054 ambayo yalibaki kufikia Disemba 2021. Amesema kuwa Januari - Disemba 2022, Mahakama hiyo ilisajili jumla ya mashauri 2,040 na kati ya hayo 29, sawa na asilimia 31 ya mashauri yote ni yenye asili ya jinai na 1,411, sawa na asilimia 9 ni yenye asili ya madai.

Msajili wa Mahakama ya Rufani amesema kuwa mashauri yaliyosikilizwa kwa kipindi cha Januari hadi Disemba 2022 yalikuwa 1,890 yanayojumuisha 651 ambayo ni ya jinai na mengine 1,239 ya madai.

Ameeleza kuwa katika kipindi tajwa, jumla ya maombi 113 ya upande mmoja ya zuio la utekelezaji yalisikilizwa na kutolewa uamuzi na kati ya hayo mashauri mawili kutoka Kanda za Shinyanga na Tabora yalisikilizwa kwa njia ya mtandao.

“Katika kipindi cha Januari hadi Disemba 2022, jumla ya mashauri 1,890 yalisikilizwa, ikiwa ni ongezeko la mashauri 523 kutoka mashauri 1,367 yaliyosikilizwa mwaka 2021,” Mhe. Kainda amesema.

Amebainisha pia kuwa hadi Disemba 2022 kulikuwa na jumla ya mashauri 5,204 yaliyobakia na kati ya hayo, 1,990 ni ya jinai na mengine 3,214 ni yenye asili ya madai.

Akizungumzia hali ya utoaji haki katika Mahakama hiyo ya juu hapa nchini, Mhe. Kainda amebainisha kuwa kwa mujibu wa kalenda ya Mahakama ya Rufani, vikao 34 vilipangwa kufanyika katika Kanda 15 ambazo ni Dar es Salaam, Mbeya, Arusha, Mwanza, Iringa, Tabora, Mtwara, Dodoma, Shinyanga, Tanga, Musoma, Kigoma, Bukoba, Zanzibar na Moshi.

“Vikao vyote vilifanyika kwa asilimia 100. Kipindi cha Januari-Disemba, 2022, jumla ya mashauri 2,128 yalipangwa kusikilizwa, kati ya hayo, 1,890 yalisikilizwa na kuamuliwa, sawa na asilimia 89 ya mashauri yote. Aidha, mashauri 238 yaliahirishwa kutokana na sababu mbalimbali,” amesema.

Amezitaja baadhi ya sababu zilizopelekea kuahirisha kwa mashauri hayo kama wadaawa kuwasilisha nyaraka zenye mapungufu ya kisheria na wengine kuomba kuwasilisha kumbukumbu ambazo hazijakamilika na kutofika mahakamani kwa wadaawa siku ya shauri au kutokupatikana.

Sababu zingine ni wadaawa kuugua au kufariki au makampuni kufungwa, maombi ya wadaawa kuweka au kubadilisha Mawakili, uwepo wa maombi ya kumaliza mgogoro nje ya Mahakama na kuwepo na maombi madogo yanayosimamisha au kuchelewesha usikilizaji wa shauri mama.

Mhe. Kainda ametaja mafanikio kadhaa yaliyopatikana katika kipindi husika, ikiwemo kuendelea kupungua kwa mashauri ya mlundikano kutoka mashauri 707, asilimia 14 Disemba 2021 mpaka mashauri 254, asilimia tano Disemba 2022 na kuongezeka kwa kiwango au kasi ya kumalizika kwa mashauri (clearance rate) kutoka asilimia 73 Disemba 2021 mpaka kufikia asilimia 93 Disemba 2022.

Amesema pia kuwa kumekuwepo na hali ya kupungua kwa mzigo wa mashauri kwa jopo (workload) kutoka mashauri 917 kwa jopo Disemba 2021 mpaka kufikia mashauri 887 Disemba 2022, kufanya vikao vyote kwa asilimia 100 kama ilivyopangwa katika kalenda ya Mahakama na kuendelea kupungua kwa mashauri yanayoahirishwa kutoka 278 Disemba 2021 mpaka kufikia mashauri 238 Disemba 2022.

Msajili wa Mahakama ya Rufani ameeleza kuwa pamoja na hali nzuri na inayoridhisha katika kusikiliza mashauri, bado kuna changamoto kadhaa zinazowakabili, ikiwemo kuendelea kuwepo mashauri ya mlundikano na mzigo wa kila jopo wa mashauri 1,013 wakati uwezo ni mashauri 297 kwa mwaka.

Ametaja changamoto zingine kucheleweshwa kwa vitabu vya rufaa katika mashauri ya jinai, uwepo wa mzigo mkubwa wa mashauri na upatikanaji mgumu wa wadaawa wa mashauri ya madai na yale ya jinai, hasa kwa wahusika ambao wamemaliza vifungo au wamepata msamaha.

Msajili wa Mahakama ya Rufani, Mhe. Sylvester Kainda (juu na chini) akisisitiza jambo alipokuwa akiwasilisha taarifa ya mashauri kwenye Mkutano wa Mwaka wa Mahakama ya Rufani uliofunguliwa leo tarehe 27 Julai, 2023 na Jaji Mkuu wa Tanzania, Mhe. Prof. Ibrahim Hamis Juma mjini Morogoro.

Jaji Mkuu wa Tanzania, Mhe. Prof. Ibrahim Hamis Juma ( wa kwanza kulia) pamoja na Majaji wa Mahakama ya Rufani (juu na picha mbili chini) wakifuatilia uwasilishaji wa taarifa ya mashauri ya Mahakama hiyo.

Naibu Wasajili Mahakama ya Rufani (juu na chini) wakimsikiliza Msajili wa Mahakama ya Rufani, Mhe. Sylvester Kainda (hayupo katika picha) alipokuwa anawasilisha taarifa yake.

Majaji wa Mahakama ya Rufani, Mhe. Patricia Fikirini (juu)  na Mhe. Issa Maige (chini) wakichangia taarifa ya mashauri iliyowasilishwa katika Mkutano huo.

Majaji wengine wa Mahakama ya Rufani, Mhe. Lugano Mwandambo (juu) na Mhe. Augustine Mwarija (chini) wakichangia taarifa ya mashauri iliyowasilishwa katika Mkutano huo.

Wenyeviti wa Majopo ya Mahakama ya Rufani, wakiongozwa na Jaji Mkuu wa Tanzania, Mhe. Prof. Ibrahim Hamis Juma (katikati waliokaa) wakiwa katika picha ya pamoja na Majaji wa Mahakama ya Rufani. Kushoto wa kwanza ni Jaji Kiongozi wa Mahakama Kuu ya Tanzania, Mhe. Mustapher Mohamed Siyani.

Wenyeviti wa Majopo ya Mahakama ya Rufani, wakiongozwa na Jaji Mkuu wa Tanzania, Mhe. Prof. Ibrahim Hamis Juma (katikati waliokaa) pamoja na Jaji Kiongozi wa Mahakama Kuu ya Tanzania, Mhe. Mustapher Mohamed Siyani (wa kwanza kushoto) wakiwa katika picha ya pamoja na Majaji wa Mahakama Kuu ya Tanzania, Kanda ya Morogoro pamoja na Jaji Mstaafu wa Mahakama ya Rufani, Mhe. Edward Rutakangwa ( wa kwanza kushoto waliosimama).

Wenyeviti wa Majopo ya Mahakama ya Rufani, wakiongozwa na Jaji Mkuu wa Tanzania, Mhe. Prof. Ibrahim Hamis Juma (katikati waliokaa) pamoja na Jaji Kiongozi wa Mahakama Kuu ya Tanzania, Mhe. Mustapher Mohamed Siyani (wa kwanza kushoto) wakiwa katika picha ya pamoja na Viongozi Waandamizi wa Mahakama ya Tanzania.

Wenyeviti wa Majopo ya Mahakama ya Rufani, wakiongozwa na Jaji Mkuu wa Tanzania, Mhe. Prof. Ibrahim Hamis Juma (katikati waliokaa) pamoja na Jaji Kiongozi wa Mahakama Kuu ya Tanzania, Mhe. Mustapher Mohamed Siyani (wa kwanza kushoto) wakiwa katika picha ya pamoja na Naibu Wasajili Mahakama ya Rufani.

Wenyeviti wa Majopo ya Mahakama ya Rufani, wakiongozwa na Jaji Mkuu wa Tanzania, Mhe. Prof. Ibrahim Hamis Juma (katikati waliokaa) pamoja na Jaji Kiongozi wa Mahakama Kuu ya Tanzania, Mhe. Mustapher Mohamed Siyani (wa kwanza kushoto) wakiwa katika picha ya pamoja na Wajumbe wengine wa Mkutano huo.