MWENYEKITI MAHAKAMA SPORTS AWAITA WANAMICHEZO MAZOEZINI

Na Faustine Kapama-Mahakama

Mwenyekiti wa Timu ya Mahakama ya Tanzania (Mahakama Sports) Wilson Dede amewataka wanamichezo wote kuanza kufanya mazoezi ili kujiandaa na mashindano yajao ya Shirikisho la Michezo ya Wizara na Idara za Serikali (SHIMIWI) yanayotarajia kufanyika kitaifa mkoani Iringa mwaka huu wa 2023.

Katika taarifa yake aliyoitoa juzi jioni kwa wanaichezo wote katika Mahakama zote nchini, Dede amesema mazoezi rasmi katika michezo mbalimbali yanatakiwa kuanza mara moja ili kujiwinda na mchaka mchaka wa mashindano hayo, ambayo yanatarajia kuanza tarehe 27 Septemba, 2023 hadi tarehe 14 Octoba, 2023.

“Kuanzia tarehe 17 Julai, 2023 hadi tarehe 31 Julai, 2023 tutafanya mazoezi mara tatu kwa wiki, yaani Jumatatu, Jumatano na Ijumaa. Ifikapo tarehe 01 Agosti, 2023 tutafanya mazoezi kila siku za kazi kuanzia Jumatatu hadi Ijumaa,” Dede ameeleza kwenye taarifa yake. 

Tayari viongozi wa Mahakama Sports wameshaenda mkoani Iringa kukagua na kutembelea maeneo mbalimbali watakayokuwa wanayatumia wakiwa kwenye mashindano hayo, ikiwemo sehemu nzuri ya malazi, chakula na viwanja vya kufanyia mazoezi.

“Hivyo basi nawaomba wanamichezo wa Mahakama Mikoa yote tujitokeze kwa pamoja na kushiriki katika mazoezi ya kuandaa timu yetu. Upatapo taarifa hii mjulishe na mwenzako. Asanteni, nawatakia maandalizi mema,” Mweyekiti Dede anahitimisha kwenye taarifa hiyo.

Michezo ambayo Mahakama Sports inatarajia kushiriki ni Kamba Wanaume, Kamba Wanawake, Mpira wa Miguu Wanaume, Netiboli, Bao, Karata, Tufe, Riadha Wanaume na Wanawake pamoja na Baiskeli. Taarifa kamili kuhusu ushiriki katika michizo hiyo itatolewa baadaye.

Katika mashindano ya SHIMIWI yaliyofanyika mwaka jana jijini Tanga, timu ya Mahakama ya Tanzania ilizoa makombe saba baada ya kuibuka washindi katika michezo mbalimbali.

Michezo ambayo Mahakama Sports ilipata medali na makombe ni Kamba Wanawake walioibuka mshindi wa kwanza, Riadha Wanawake mita 3,000 mshindi wa kwanza, Tufe Wanawake mshindi wa kwanza, Kamba Wanaume walioshika nafasi ta pili, Mpira wa Miguu Wanaume walioshika nafasi ya pili na Bao Wanaume mshindi wa tatu.

Mwenyekiti Mahakama Sports Wilson Dede.

Anakufa mtu safari hii.

Hii mashine, acha kabisa.

Hii bendera ya Mahakama ya Tanzania lazima ipepee Iringa.

Mzigo huu hapa, lazima urudi wote.

Sehemu ya viongozi wa Timu ya Mahakama ya Tanzania (Mahakama Sports) ikiwa mkoani Iringa hivi karibuni. Katikati ni Mwenyekiti Wilson Dede, Katibu Mkuu Robert Tende (kushoto) na Mjumbe Mwakilishi wa SHIMIWI Taifa Shaibu Kanyochole (kulia).

Ukaguaji wa maeneo mbalimbali kwa ajili ya michezo (juu na chini) ukiendelea.