JAJI KIONGOZI UGANDA AHIMIZA USHIRIKIANO ENDELEVU MAHAKAMA TANZANIA, UGANDA

·Mwenyeji wake Mustapher Siyani atoa ujumbe muhimu

Na. Faustine Kapama-Mahakama na Sade Soka- UDSM

Jaji Kiongozi wa Mahakama Kuu ya Uganda, Mhe. Dkt. Flavian Zeija, amesema ushirikiano uliopo kati ya Mahakama ya Uganda na Tanzania unapaswa kuendelea ili kukuza na kuimarisha malengo ya pamoja katika kutoa haki kwa wananchi.

Akizungumza katika siku ya pili ya ziara yake ya Mahakama nchini Tanzania baada ya kukutana na mwenyeji wake, Jaji Kiongozi wa Mahakama Kuu ya Tanzania, Mhe. Mustapher Mohamed Siyani, Mhe. Dk. Zeije amesema kuna mengi ya kushirikiana kati ya Mahakama hizo mbili.

"Nawakaribisha katika nchi yetu, hizi ni nchi mbili za kidugu, kuna mengi ambayo tunaweza kushirikiana. Asanteni sana, tuendeleze uhusiano wetu," amesema.

Jaji Kiongozi wa Uganda ambaye amefuatana na Katibu Mkuu wa Mahakama ya Uganda, Dk. Pius Biligimana, ameshukuru kwa ukarimu alioupata kutoka kwa wenyeji wake tangu alipowasili nchini jana tarehe 15 Agosti, 2023.

"Tutalipiza kisasi ukifika Uganda," amesema na kuibua vicheko kutoka kwa viongozi mbalimbali waliohudhuria ugeni huo. Mhe. Dkt. Zeija alitoa shukrani zake kwa kupata fursa ya kutembelea Mahakama ya Tanzania ili kujifunza masuala mbalimbali ya kimahakama yaliyopo.

Amebainisha kuwa waliwahi kuja Tanzania mwaka mmoja nyuma na walipelekwa katika Chuo cha Uongozi wa Mahakama Lushoto, lakini walipofika huko walishangaa kwani walichokiona ukulinganisha na Taasisi yao waligundua ipo sawa na jiko.

“Tuligundua kuwa Tanzania ina mambo mengi ya kutuonyesha na, kwa kweli tulipotoka huko tulikwenda kupata eneo la hekta 20 kama lile tuliloliona Lushoto. Kwa hivyo, unaweza kuona kuna mengi tunajifunza kutoka Tanzania,” Jaji Kiongozi wa Uganda amesema.

Akizungumza baada ya kumpokea mgeni wake, Jaji Kiongozi wa Mahakama Kuu ya Tanzania aliwakaribisha viongozi hao wawili wa Uganda na kusema ziara yao ina umuhimu wa kipekee, yenye dhamira ya usawa na ya pamoja ya Mahakama hizo mbili katika kukuza ushirikiano na kujifunza kwa pamoja.

Aliwashukuru wageni wake kwa nia waliyoionesha, hasa katika mikakati ya Mahakama ya Tanzania ya kuendeleza miundombinu ya Mahakama katika kushughulikia ipasavyo ucheleweshaji wa mashauri na mlundikano.

Alidokeza kuwa ziara hiyo ni muhimu, kwani watabadilishana maarifa na ujuzi ili kuendeleza malengo ya pamoja ya Mahakama hizo mbili.

"Tunashuhudia utimilifu wa nia yenu ya kurudi na kuzama zaidi katika yale tunayofanya. Tunathamini sana uwepo wenu na fursa ya ushirikiano kati ya Mahakama zetu mbili,” Jaji Kiongozi wa Mahakama Kuu ya Tanzania alisema.

Jaji Kiongozi wa Uganda yuko nchini Tanzania kwa ziara ya siku tano ya kikazi. Kwa mujibu wa ratiba iliyopo, leo pia ameenda kutembelea Kituo Jumushi cha Utoaji Haki cha Masuala ya Familia Temeke jijini Dar es Salaam na pia kujionea jinsi Mahakama inayotembea (Mobile Court) inavyofanya kazi.

Pia anatarajiwa kuondoka kesho kuelekea Dodoma kutembelea jengo la Makao Makuu ya Mahakama ya Tanzania na Kituo  Jumuishi cha Utoaji Haki Dodoma kabla ya kurejea jijini Dar es Salaam siku ya Ijumaa kwa ajili ya masuala mengine ya kimahakama katika ziara yake.

Hii ni mara ya pili kwa viongozi wakuu wa Mahakama Uganda kuitembelea Mahakama ya Tanzania. Ziara ya kwanza ilifanywa na Jaji Mkuu wa Uganda, Mhe. Alfonse Chigamoy Owiny-Dollo tarehe 24 Mei 2022 kwa lengo la kubadilishana uzoefu wa mambo mbalimbali.

Mhe Owiny-Dollo alikutana na mwenyeji wake, Jaji Mkuu wa Tanzania, Mhe. Prof. Ibrahim Hamis Juma ofisini kwake jijini Dar es Salaam na baada ya maongezi mafupi yenye lengo la kujenga ushirikiano katika masuala mbalimbali ya kimahakama alielekea Tanga kutembelea Chuo cha Uongozi wa Mahakama Lushoto.

Akiwa Lushoto, Jaji Mkuu Uganda na ujumbe wake alitapata fursa ya kubadilishana uzoefu na viongozi wa Chuo hicho, ikiwemo namna kinavyofanya kazi.

Jaji Kiongozi wa Mahakama Kuu ya Uganda, Mhe. Dkt. Flavian Zeija akisisitiza jambo wakati akizungumza na viongozi wa Mahakama ya Tanzania leo tarehe 16 Agosti, 2023 katika siku ya pili ya ziara yake katika Mahakama ya Tanzania.

Jaji Kiongozi wa Mahakama Kuu ya Tanzania, Mhe. Mustapher Mohamed Siyani (juu na chini) akizungumza na ujumbe wa Uganda, akiwemo Jaji Kiongozi mwenza, Mhe. Dkt.Flavian Zeija ofisini kwake jijini Dar es Salaam.

Jaji Kiongozi wa Mahakama Kuu ya Uganda, Mhe. Flavian Zeija akipokelewa na Jaji wa Mahakama Kuu ya Tanzania, Masjala Kuu, Mhe. Latifa Mansoor baada ya kuwasili Mahakama Kuu jijini Dar es Salaam na kukutana na mwenyeji wake, Jaji Kiongozi wa Mahakama Kuu ya Tanzania, Mhe. Mustapher Mohamed Siyani. Kulia ni Jaji Mfawidhi wa Mahakama Kuu, Kanda ya Dar es Salaam. Mhe. Salma Maghimbi.

Jaji Kiongozi wa Mahakama Kuu ya Uganda, Mhe. Flavian Zeija (kulia) akipokewa na mwenyeji wake, Jaji Kiongozi wa Mahakama Kuu ya Tanzania, Mhe. Mustapher Mohamed Siyani. Picha ya chini, viongozi hao wawili wa Mahakama wakipeana mikono, ikiwa ni ishara ya kusalimiana.

Jaji Kiongozi wa Mahakama Kuu ya Tanzania, Mhe. Mustapher Mohamed Siyani (kushoto) akimkaribisha Katibu Mkuu wa Mahakama ya Uganda Dk.Pius Biligimana ambaye ni sehemu ya ujumbe kutoka Uganda.

Msajili wa Mahakama Kuu ya Tanzania, Mhe. Sharmillah Sarwatt akiwatambulisha maafisa wa Mahakama waliohudhuria ziara ya ujumbe wa Uganda.

Baadhi ya Majaji wa Mahakama Kuu ya Tanzania, waliohudhuria pia katika hafla hiyo. Kutoka kulia ni Mhe. Latifa Mansoor, Mhe. Salma Maghimbi na Mhe. Wilfred Ndyasobera.

Viongozi wa Mahakama Kuu ya Tanzania wakifuatilia kwa makini kinachoendelea. Kutoka kulia ni Mtendaji wa Mahakama Leonard Magacha na Msajili, Mhe. Sharmillah Sarwatt.

Jaji Kiongozi wa Mahakama Kuu ya Tanzania, Mhe. Mustapher Mohamed Siyani (kushoto) akimkabidhi zawadi mgeni wake, Jaji Kiongozi wa Mahakama Kuu ya Uganda, Mhe. Flavian Zeija.

Jaji Kiongozi wa Mahakama Kuu ya Tanzania, Mhe. Mustapher Mohamed Siyani (kushoto) akimkabidhi zawadi Katibu Mkuu wa Mahakama ya Uganda, Dk.Pius Biligimana.

Jaji Kiongozi wa Mahakama Kuu ya Tanzania, Mhe. Mustapher Mohamed Siyani (kushoto) na mgeni wake, Jaji Kiongozi wa Mahakama Kuu ya Uganda, Mhe. Dkt.Flavian Zeija (wote waliokaa) wakiwa katika picha ya pamoja na Majaji wa Mahakama Kuu ya Tanzania.

Jaji Kiongozi wa Mahakama Kuu ya Tanzania, Mhe. Mustapher Mohamed Siyani (kushoto) na mgeni wake, Jaji Kiongozi wa Mahakama Kuu ya Uganda, Mhe. Flavian Zeija (wote waliokaa) akiwa katika picha ya pamoja na Mtendaji Mkuu wa Mahakama, Prof. Elisante Ole Gabriel (kushoto), Katibu Mkuu wa Mahakama ya Uganda, Dkt .Pius Biligimana (katikati) na Msajili Mkuu, Mhe. Wilbert Chuma.

Jaji Kiongozi wa Mahakama Kuu ya Tanzania, Mhe. Mustapher Mohamed Siyani (kushoto) na mgeni wake, Jaji Kiongozi wa Mahakama Kuu ya Uganda, Mhe. Dk. Flavian Zeija (wote waliokaa) akiwa katika picha ya pamoja na maofisa wengine waandamizi wa Mahakama.