JAJI MKUU AWAAPISHA MAHAKIMU WAKAZI 38 WAPYA

·Awataka kuwa huru, kuvumilia, kutopendelea mtu yoyote

Na Faustine Kapama, Mahakama

Jaji Mkuu wa Tanzania, Mhe. Prof. Ibrahim Hamis Juma leo tarehe 10 Agosti, 2023 amewaapisha Mahakimu Wakazi 38 wapya na kuwataka kuwa huru, kuvumilia na kujiepusha na upendeleo wowote ili kutekeleza kikamilifu jukumu la utoaji haki kwa wananchi.

Akizungumza katika halfa fupi ya uapisho huo uliofanyika Mahakama Kuu jijini Dar es Salaam, Mhe. Prof. Juma amewakumbusha Mahakimu hao umuhimu walionao katika jamii kwa kuwa ndiyo wanaoshughulikia asilimia 70 ya mashauri yote yanayosajiliwa katika ngazi mbalimbali za Mahakama. Amewahimiza kuendeza zifa zilizopelekea wao kupata nafasi ya kuhudumu katika nafasi ya Hakimu Mkazi.

Mhe. Prof. Juma ametaja moja ya sifa hizo ambazo ni muhimu ni uhuru wa Hakimu (independence of the magistrate) unaomaanisha kutokuwa na uegemezi katika kuendesha mashauri na kutoa maamuzi. Akahimiza kuwa maslahi yotote ambayo yapo nje ya kiapo chao yasisukume uamuzi wanaoutoa katika mashauri.

 “Jaji Mkuu hawezi hata siku moja kukupigia simu na kukuambia katika shauri lililopo mbele yako unatakiwa kuliamua hivi. Ukipata simu kama hiyo ujue kuna matatizo. Kwa hiyo, wewe ni huru, kilichopo mbele yako unatakiwa kukiamua kwa uhuru bila nguvu ya rushwa wala ushawishi. Kiongozi wako atakuingilia tu kama kutakuwa na ucheleweshaji au hufuati utaratibu,” amesema.

Jaji Mkuu amewakumbusha Mahakimu hao kuwa uhuru waliokabidhiwa ni kiini cha ofisi ya Mahakama na kwa kuzingatia kuwa Kikatiba Mahakama ya Tanzania ni Mhimili wa Tatu wa Dola na unatakiwa kutekeleza majukumu yake kwa uhuru, ambao tafsiri yake ni kazi ambazo wanazifanya kila siku.

Amewaambia kuwa maneno yaliyopo katika kiapo chao kwamba watatekeleza majukumu yeo kwa mujibu wa Katiba na Sheria, bila uwoga, upendeleo, chuki wa huba yanawakumbusha uhuru mkubwa ambao sheria na Katiba imewapa.

“Kupitia maneno haya, mmeahidi mtafanya maamuzi kwa mujibu wa sheria bila kujali matakwa binafsi. Unaweza kuwa na mawazo yako kwamba huyo aliyeko mbele yako anastahili kuadhibiwa, lakini kama ushahidi hausemi hivyo unatakiwa usifuate nafsi yako, fuata sheria na ushahidi unavyosema,” amesema.

Jaji Mkuu amewaeleza Mahakimu hao kuwa upendeleao ni moja ya dhambi kubwa ya kisheria ambayo hufanyika, hivyo akawahimiza kutokuwa na upendeleo ambao unaweza kupelekea kupoteza uhuru waliopewa na Sheria.

“Mtu anapofika mahakamani anategemea shauri lake litaamuliwa bila upendeleo wowote. Kuna mambo mengine ya kijamii mnatakiwa mjiepushe nayo ambayo yanaweza kutoa taswira kwamba utapendelea. Itabidi uishi maisha ambayo yatakufanya uwe mpweke kidogo, lakini huo upweke una lengo la kutotoa tafsiri au taswira kwamba wewe unaweza kuwa na upendeleo,” amesema.

Kadhalika, Mhe. Prof. Juma amewahimiza Mahakimu hao kuwa na uvumilivu, subira na hasa wanaposikiliza ushahidi unaoghubikwa na mabishano kutoka pande zinazohusika, kwa kuwa wananchi wanaofika mahakamani hawana uelewa wa sheria.

“Ni muhimu kuwavumilia, kuwaelimisha taratibu na kuhakikisha wanaelewa kile kinachoendelea. Uvumilivu ni muhimu sana. Hakumu au Jaji hatakiwi kukasirika, hata kama kuna maudhi ya aina yoyote, ukifanya hivyo tafsiri itaonyesha uamuzi wako utaegemea upande wa pili,” Jaji Mkuu ameonya.

Amewakumbisha pia kusikiliza ushahidi kwa makini na kutafakari kia kina sheria kabla ya kufikia maamuzi kwa vile sheria inawapa nguvu kubwa, ikiwemo kupeleka watu magerezani. “Sheria inawapa nguvu hizo, lazima mtafakari sana, sikilizeni ushahidi kwa makini, some sheria kwa makini ili hata kama unakosea moyo wako unakuwa thabiti na safi,” amesema.

Jaji Mkuu amesema kuwa kuna mambo mengine wanayoamua hugusa maisha na mali za watu na hutoa maamuzi mazito kwenye mambo ya talaka, ndoa, matunzo ya watoto, mgawanyo wa mali na ndoa kuvujika.

“Haya ni maamuzi mazito sana, yanaweza kubadili maisha ya binadamu mwenzako, ni maeneo ambayo lazima utafakari, lazima ujiridhishe kuwa uamuzi wako ni sahihi na utausimamia,” amesema.

Awali, akimkaribisha Jaji Mkuu kuongea na Mahakimu hao, Kaimu Jaji Kiongozi, ambaye pia ni Jaji wa Mahakama Kuu ya Tanzania, Masjala Kuu Dar es Salaam, Mhe. Latifa Mansoor, aliwapongeza kwa kupata nafasi hiyo na kuwakaribisha katika Mahakama ya Tanzania kwenye majukumu ya utoaji haki kwa mujibu wa Katiba ya Jamhuri ya Muungano wa Tanzania.

Aliwaeleza kuwa baada ya hapo watapata mafunzo ya ufahamu kwamba Hakimu lazima awe mwadilifu, mwaminifu na aishi katika kiapo alichokula kuwa atafanya kazi kwa mujibu wa sheria, tamaduni za kitanzani na kwa mujibu wa sheria bila hofu, huba, chuki na upendeleo.

Hafla ya uapisho huo imehudhuria na Majaji Wafawidhi wa Divisheni mbalimbali za Mahakama Kuu na viongozi wengine waandamizi wa Mahakama, akiwemo Mtendaji Mkuu wa Mahakama ya Tanzania, Prof. Elisante Ole Gabriel, Msajili Mkuu wa Mahakama ya Tanzania, Mhe. Wilbert Chuma, Watendaji pacha wa Mahakama Kuu, Bw. Leonard Magacha na Mary Shirima na Msajili wa Mahakama Kuu ya Tanzania, Mhe. Sharmillah Sarwatt.

Jaji Mkuu wa Tanzania, Mhe. Prof. Ibrahim Hamis Juma akimwaapisha mmoja wa Mahakimu Wakazi 38 wapya katika hafla iliyofanyika katika Mahakama Kuu ya Tanzania, Kanda ya Dar es Salaam leo tarehe 10 Agosti, 2023.

Mmoja wa Mahakimu Wakazi 38 wapya akisaini kiapo baada ya kuapishwa.

Jaji Mkuu wa Tanzania, Mhe. Prof. Ibrahim Hamis Juma (katikati) akizungumza na Mahakimu Wakazi 38 wapya baada ya kuwaapisha. Wengine ni Kaimu Jaji Kiongozi, ambaye pia ni  Jaji wa Mahakama Kuu ya Tanzania, Masjala Kuu, Mhe. Latifa Mansoor (kushoto) na Jaji Mfawidhi wa Mahakama Kuu ya Tanzania, Kanda ya Dar es Salaam, Mhe. Salma Maghimbi.

Sehemu ya Mahakimu Wakazi 38 wapya wakimsililiza Jaji Mkuu baada ya kuwaapisha. 

Jaji Mkuu wa Tanzania, Mhe. Prof. Ibrahim Hamis Juma (katikati waliokaa) akiwa katika picha ya pamoja na sehemu ya Mahakimu Wakazi 38 wapya. Wengine waliokaa ni Kaimu Jaji Kiongozi, ambaye pia ni Jaji wa Mahakama Kuu ya Tanzania, Masjala Kuu, Mhe. Latifa Mansoor (kushoto) na Jaji Mfawidhi wa Mahakama Kuu ya Tanzania, Kanda ya Dar es Salaam, Mhe. Salma Maghimbi.