MAMA MZAZI WA JAJI MANDIA AZIKWA

Na YUSUFU AHMADI-IJA, Lushoto

Jaji Mfawidhi wa Mahakama Kuu ya Tanzania, Kanda ya Tanga, Mhe. Katarina Revocati Mteule, hivi karibuni aliongoza waombolezaji kwenye maziko ya aliyekuwa mama mzazi wa Jaji wa Mahakama Kuu Divisheni ya Ardhi, Mhe. Nehemia Ernest Mandia, Bi Alice Mandia, aliyefariki Dunia Agosti 20, 2025 katika Hospitali ya Wilaya ya Lushoto.

Bi. Mandia, ambaye alijaliwa kuishi hapa duniani kwa miaka 90, akiwa alizaliwa Septemba 17, 1935, alizikwa Agosti 25, 2025 majira ya jioni pembeni mwa makaburi ya mumewe, Jaji Mstaafu wa Mahakama ya Rufani Tanzania, Mhe. Ernest Mandia na mwanaye Julius Mandia.

Katika salamu zake zilizosomwa kwa niaba yake na Jaji wa Mahakama ya Rufani, Mhe. Gerson Mdemu, Jaji Mkuu wa Mahakama ya Tanzania, Mhe. George Mcheche Masaju, aliwapa pole wafiwa na kubainisha kuwa uongozi wa Mahakama upo pamoja nao katika kipindi hiki cha majonzi.

Naye Mhe. Mteule alitoa salamu za Mahakama Kuu ya Tanzania na kuwasihi wafiwa kuwa na subira katika kipindi hiki kigumu cha kumpoteza mpendwa wao. 

Kwa upande wake, Chuo cha Uongozi wa Mahakama Lushoto (IJA) kilishiriki kikamilifu katika maziko hayo ambapo Mkurugenzi wa Mafunzo ya Kimahakama, Mhe. Dkt. Patricia Kisinda alimwakilisha Mkuu wa Chuo na Jaji wa Mahakama ya Rufani, Mhe. Dkt. Paul Kihwelo.

Mhe. Dkt. Kisinda alisema kuwa uongozi wa Chuo umepokea kwa majonzi makubwa kufuatia kifo hicho na kuahidi kuendelea kushirikiana na wafiwa katika kipindi chote cha maombolezo.

Askofu wa Kanisa la Kiinjili la Kilutheri Tanzania (KKKT), Dayosisi ya Kaskazini Mashariki, Dkt. Msafiri Joseph Mbilu aliongoza ibada hiyo ya maziko na kuwahimiza waombolezaji kutenda mema na kutowafanyia Watoto ukatili.

Viongozi wengine wakiwemo Makatibu Wakuu wa Wizara, Viongozi wa Mkoa wa Tanga na Wilaya ya Lushoto pamoja na wananchi kwa ujumla walihudhuria maziko hayo yaliyofanyika katika Kata ya Magamba.

Wasifu wa marehemu unaonesha kuwa Bi Alice alijaliwa kupata watoto 10 na wajukuu kadhaa. Aidha, wasifu huo unaonesha kuwa enzi za uhai wake, Mama Mandia alifanya kazi za uuguzi na alistaafu utumishi wa umma mwaka 1985.

Jaji wa Mahakama Kuu ya Tanzania, Divisheni ya Ardhi, Mhe. Nehemia Ernest Mandia akiwa katika mazishi ya mama yake mzazi, Bi. Alice Mandia katika eneo la Magamba wilayani Lushoto mkoani Tanga.

Jaji wa Mahakama ya Rufani, Mhe. Gerson Mdemu akitoa salamu za rambirambi kwa niaba ya Jaji Mkuu wa Mahakama ya Tanzania, Mhe. George Masaju.

Jaji Mfawidhi wa Mahakama Kuu ya Tanzania, Kanda ya Tanga, Mhe. Katarina Revocati Mteule akitoa salamu za Mahakama Kuu ya Tanzania.

Mkuu wa Wilaya ya Lushoto, Mhe. Zephania Sumaye akitoa salamu za rambirambi kwenye maziko hayo.

 Askofu wa Kanisa la Kiinjili la Kilutheri Tanzania (KKKT), Dayosisi ya Kaskazini Mashariki, Dkt. Msafiri Joseph Mbilu akiongoza ibada ya maziko.

Mkurugenzi wa Mafunzo ya Kimahakama wa Chuo cha Uongozi wa Mahakama Lushoto (IJA), Mhe. Dkt. Patricia Kisinda akiwasilisha salamu kwa niaba ya Mkuu wa Chuo na Jaji wa Mahakama ya Rufani, Mhe. Dkt. Paul Kihwelo.

Habari hii imehaririwa na FAUSTINE KAPAMA-Mahakama, Dodoma