Na ARAPHA RUSHEKE, Mahakama-Dodoma
Wabunge
wa Kamati ya Kudumu ya Bunge ya Utawala, Katiba na Sheria na ya Ustawi na
Maendeleo ya Jamii wameipongeza Mahakama ya Tanzania kwa kuanzisha Kituo Jumuishi
cha Masuala ya Familia Temeke kilichopo Temeke jijini Dar es Salaam, wakieleza
kuwa, kimechangia kusogeza huduma karibu na wananchi na kurahisisha upatikanaji
wa haki, hususan katika masuala ya mirathi, ndoa na watoto.
Pongezi
hizo zimetolewa leo tarehe 22 Oktoba, 2026 wakati wa Kikao kati ya Mahakama na
Kamati hizo za Kudumu za Bunge kilichoongozwa na Mwenyekiti wa Kamati ya Kudumu
ya Bunge ya Utawala, Katiba na Sheria, Mhe. Dkt. Damian Ndumbaro kilichofanyika
kwenye ukumbi wa Anne Makinda uliopo katika Jengo la Utawala la Ofisi za Bunge
jijini Dodoma.
Aidha,
Wabunge hao wametoa maoni na mapendekezo mbalimbali kwa Serikali na Mahakama
kwa lengo la kuendelea kuboresha huduma zinazotolewa na kituo hicho na
kuimarisha zaidi upatikanaji wa haki kwa wananchi.
Akiwasilisha
taarifa ya kituo hicho, Mtendaji Mkuu wa Mahakama ya Tanzania, Dkt. John Antony
Jingu, amesema kuwa, kituo kilianzishwa kwa lengo la kuboresha huduma za utoaji
haki katika mashauri ya mirathi, ndoa na Watoto pamoja na kurahisisha
upatikanaji wa huduma hizo kwa wananchi wa Mkoa wa Dar es Salaam.
Ameeleza
kuwa, Kituo Jumuishi cha Masuala ya Mirathi na Familia Temeke kilianzishwa kwa
mujibu wa Tangazo la Serikali Na. 640 la mwaka 2021, la tarehe 27 Agosti 2021,
huku jengo la kituo hicho likizinduliwa na Rais wa Jamhuri ya Muungano wa
Tanzania, Mheshimiwa Dkt. Samia Suluhu Hassan, tarehe 06 Oktoba, 2021.
Kwa
mujibu wa Dkt. Jingu, kituo hicho kina Mahakama nne, ambazo ni Mahakama Kuu,
Mahakama ya Watoto ya Dar es Salaam, Mahakama ya Wilaya na Mahakama ya Mwanzo.
Mahakama hizo zinahudumia mashauri yanayohusu mirathi, ndoa na watoto kwa
mujibu wa mamlaka yake ya kisheria.
Aidha,
amesema kwamba, katika kipindi cha miaka mitano tangu kuanzishwa kwake, kituo
hicho kimeendelea kuimarisha usikilizaji wa mashauri na kuwezesha wananchi
kupata huduma za haki mapema ipasavyo.
Ameongeza
kuwa, mbali na huduma za kimahakama, kituo hicho kina wadau mbalimbali wanaotoa
huduma zinazosaidia kukamilisha mchakato wa utoaji haki. Wadau hao ni pamoja na
Maofisa Ustawi wa Jamii, Dawati la Jinsia la Polisi, Baraza Kuu la Waislamu
Tanzania (BAKWATA) na Watoa Msaada wa Kisheria.
Huduma
nyingine zinazotolewa kituoni hapo ni pamoja na usaidizi wa uandaaji wa nyaraka
za Mahakama, uwasilishaji wa mashauri kupitia mifumo ya Mahakama, ushauri
nasaha, usuluhishi, uchunguzi wa kijamii na uandaaji wa taarifa za kijamii.
Ushirikiano huo unachangia kurahisisha upatikanaji wa huduma mbalimbali
zinazohusiana na haki katika eneo moja.
Viongozi
mabalimbali kutoka Mahakama ya Tanzania wamehudhuria kikao hicho.
Sehemu ya Wabunge wa Kamati ya Kudumu ya Bunge ya Utawala, Katiba na Sheria na ya Ustawi na Maendeleo ya Jamii ambao ni wajumbe wa kamati hizo waliohudhuria kikao cha pamoja na Mahakama kilichofanyika kwenye Ukumbi wa Anne Makinda uliopo katika Jengo la Utawala la Ofisi za Bunge jijini Dodoma. 
Mtendaji Mkuu wa Mahakama ya Tanzania, Dkt. John Antony Jingu akiwasilisha taarifa wakati wa Kikao kati ya Mahakama na Kamati ya Kudumu ya Bunge ya Utawala, Katiba na Sheria na Kamati ya Kudumu ya Bunge ya Ustawi na Maendeleo ya Jamii kilichofanyika kwenye ukumbi wa Anne Makinda uliopo Bungeni jijini Dodoma.
Jaji Mfawidhi wa Mahakama Kuu ya Tanzania Kituo Jumuishi cha Masuala ya Familia Temeke, Mhe.Mwanabaraka Mnyukwa akijitambulisha wakati wa kikao hicho.
Sehemu ya Viongozi waliohudhuria kikao hicho kutoka Mahakama ya Tanzania, Wizara ya Katiba na Sheria pamoja Wizara ya Maendeleo ya Jamii, Jinsia,Wanawake na Makundi Maalum.
Sehemu ya Baadhi ya Viongozi kutoka Mahakama ya Tanzania wakifuatilia kwa makini kikao hicho wa kwanza kulia ni Msajili Mkuu wa Mahakama ya Tanzania, Mhe. Eva Kiaki Nkya.
Sehemu ya Viongozi waliohudhuria kikao hicho kutoka Mahakama ya Tanzania, Wizara ya Katiba na Sheria pamoja Wizara ya Maendeleo ya Jamii, Jinsia,Wanawake na Makundi Maalum. Wa pili kulia ni Jaji Mfawidhi wa Mahakama Kuu ya Tanzania Kituo Jumuishi cha Masuala ya Familia-Temeke, Mhe. Mwanabaraka Mnyukwa, wa kwanza kulia ni Jaji wa Mahakama Kuu ya Tanzania Kituo Jumuishi cha Masuala ya Familia Temeke, Mhe. Asina Omari, wa kwanza kushoto ni Naibu Waziri wa Wizara ya Maendeleo ya Jamii, Jinsia,Wanawake na Makundi Maalum, Mhe. Maryprisca Winfried Mahundi na wa pili kushoto ni Mtendaji Mkuu wa Mahakama ya Tanzania, Dkt. John Antony Jingu.
(Habari hii imehaririwa na MARY GWERA, Mahakama-Arusha)
Hakuna maoni:
Chapisha Maoni