MAAFISA RASILIMALI WATU NA WATUNZA KUMBUKUMBU WATAKIWA KUWA MAKINI

NA DANIEL SICHULA- Mahakama Kuu, Mbeya

Kaimu Mtendaji wa Mahakama Kuu  ya  Tanzania Mkoa wa Mbeya, Bw. Alintula Ngalile amewataka washiriki  wa kikao  kazi kwa maafisa rasilimali watu na watunza kumbukumbu kusikiliza kwa makini mafunzo  yatakoyofundishwa na wataalamu kutoka Mahakama Kuu ya Tanzania.

Akifungua kikao kazi hicho kilichofanyika tarehe 18 Desemba,2024 katika ukumbi wa mikutano Mahakama Kuu  ya Tanzania Kanda ya Mbeya,ambacho kiliwashirikisha maafisa rasilimali watu na watunza kumbukumbu kutoka Mahakama Kuu, Mahakama ya Mkoa na Mahakama za Wilaya Mkoa wa Mbeya. 

“Naomba kila mmoja awe makini kwenye kikao kazi hiki kwani miongozo ya utunzaji kumbukumbu kila mtu alipatiwa lakini wengi wenu mmekua hamfuati miongozo hiyo na kupelekea nyaraka katika masijala zetu kuwa katika hali isiyoridhisha kwa hiyo baada ya kikako kazi hiki ni imani yangu kila mmoja wetu atatekeleza kazi ya utunzaji wa kumbukumbu kwa kufuata miongozo iliyopo.” alisema Bw. Ngalile. 

Naye mtaalamu kutoka Mahakama Kuu  ya Tanzania, ambaye ni Mtunza Kumbukumbu, Bw.Kelvin Peter Mayala aliwakumbusha washiriki  hao kuwa miongozo inayotumika katika utunzaji wa kumbukumbu na nyaraka mbalimbali hasa kwa masijala za wazi na siri na kuwapa ujumbe kutoka kwa viongozi wa juu wa Mahakama kuwa wanatakiwa kutambua vifaa vyote vilivyotumika enzi za zamani katika mahakama zetu vitambulike na kuviweka katika kumbukumbu muhimu za Mahakama na kudijiti rejista zote za kesi zilizotumka miaka ya nyuma.

Wakati huohuo mtaalamu mwingine, Bi.Devotha Anatory aliwakumbusha matumizi ya mfumo wa e.office ambao ulianzisha kwa ajili ya kuondoa matumizi ya karatasi (paperless) na kuweka kumbukumbu za nyaraka za kimahakama katika hali ya usalama. 

“Kwa hiyo huu mfumo inaonekana maafisa na waheshimiwa wengi wanakwepa kuutumia, sasa hili ni wajibu wenu nyinyi maafisa rasilimali watu na watunza kumbukumbu hasa wamasijala za wazi kuacha kupokea majadala au nyaraka kama vile madokezo na barua kwa njia ya mkono, tuhimizane katika kutumia mfumo wa e-office,” alisema Bi. Devotha.

Aidha kutokana na kikao kazi hicho washiriki mbalimbali waliweza kutoa mawazo yao na changamoto katika miongozo ya utunzaji wa kumbukumbu pamoja na matumizi ya mfumo wa kielekroniki (e-office) katika utunzaji wakumbukumbu za kimahakama.

“Tunaomba mafunzo haya yawe yanafanyika mara kwa mara kwani katika utunzaji wa kumbukumbu watumishi wameajiriwa katika kada tofauti tofauti za elimu, kuna waliosoma sheria, wao inakua vigumu sana kujua miongozo ya utunzaji wa kumbukumbu lakini mafunzo kama haya yakiwa yanafanyika mara kwa mara yatakua na mchango mkubwa  katika kukumbushana wajibu wetu,” alisema mmoja wa washiriki.

Aidha Bw. Mayala aliwasisitiza washiriki wote kupendelea kutumia mifumo ya kielectroniki ya kimahakama kwenye kushughulia majalada na nyaraka mbalimbali za kimahakama na kuondokana na kutembeza majalada kwa njia ya mkono, pia kushughulikia barua pepe zilizokaa muda mrefu bila kufanyia kazi hasa kwa watumishi waliohama mahakamani kwa kushirikiana na kitengo cha Teknolojia ya Habari, Elimu na Mawasiliano( TEHAMA).

Wakati huohuo akifunga kikao kazi hicho, Kaimu Mtendaji huyo  Bw. Ngalile awashukuru watumishi waliohudhuria kikao kazi hicho na kuwataka wakafanyie kazi yote waliyofundishwa, pia aliwashukuru wataalamu kwa mafunzo waliyotoa.

Kaimu Mtendaji  wa Mahakama Kuu  ya  Tanzania Mkoa wa Mbeya, Bw. Alintula Ngalile akifungua kikao kazi kwa maafisa rasilimali watu na watunza kumbukumbu.

Mtunza Kumbukumbu kutoka Mahakama Kuu ya Tanzania, Bw.Kelvin Peter Mayala akitoa ufafanuzi juu ya miongozo ya utunzaji kumbukumbu.

 Mshiriki  wa kikao kazi hicho, Bw.  Michael Mihayo akichangia na kutoa mawazo yake juu ya matumizi wa mfumo wa e-office.

Washiriki wa kikao kazi  hicho.

 Washiriki wengine.

 

 

 

 

 

MAJAJI MAHAKAMA YA RUFANI WATEMBELEA MAKAO MAKUU YA MAHAKAMA, NYUMBA ZA MAJAJI

Na ARAPHA RUSHEKE –Mahakama, Dodoma

Majaji wa Mahakama ya Rufani Tanzania jana tarehe  20 Desemba, 2024 walitembelea Makao Makuu ya Mahakama ya Tanzania na  kupongeza hatua kubwa iliyofikiwa.

Baada ya kuwasili katika jengo hilo, Majaji hao, Mhe. Augustine Gherabast Mwarija, Mhe. Rehema Kiwanga Mkuye, Mhe. Dkt Gerald Mbonipa Ndika na Mhe. Leila Edith Mgonya walipata fursa ya kujionea na kujifunza shughuli mbalimbali za kiutendaji zinazoendelea.

Wakiwa katika ukumbi wa mkutano, Majaji hao walipata taarifa mbalimbali kutoka kwa Mhandisi Moses Lawrence Lwiva juu ya Jengo hilo lililopo eneo la Tambukareli na baadaye kutembelea ofisi mbalimbali katika jengo hilo.

Walionesha kufurahishwa na uboreshaji wa miundombinu ya Mahakama  na kuipongeza Serikali ya Jamhuri ya Muungano wa Tanzania pamoja na Uongozi wa Mahakama ya Tanzania kwa kufanikishakazi hiyo.

Majaji hao walipata fursa pia ya kutembelea eneo la makazi ya Majaji lililopo eneo la Iyumbu na NCC jijini Dodoma.

"Tunaishukuru sana Serikali kwa kuendelea kutoa fedha za ujenzi wa Makao Makuu ya Mahakama na makazi ya Majaji wa Mahakama ya Rufani na Mahakama Kuu. Tunaamini Majaji watafanya kazi wakiwa katika mazingira rafiki yanayoendana na kazi zao,"alisema Mhe. Mwarija.

Viongozi wengine wa Mahakama waliombatana na ugeni huo ni Mtendaji wa Mahakama ya Rufani, Bw. Victor Florence Kategere, Mkurugenzi wa Utawala na Rasilimaliwatu, Bi. Beatrice Patrick pamoja na watumishi wa Mahakama ya Tanzania.

Jaji wa Mahakama ya Rufani Tanzania, Mhe. Augustine Gherabast Mwarija, (aliyekaa mbele katikati), wa kwanza kushoto kwake ni Jaji wa Mahakama ya Rufani, Mhe. Rehema Kiwanga Mkuye, wa kwanza kulia kwake ni Jaji wa Mahakama ya Rufani, Mhe. Dkt Gerald Mbonipa Ndika anayefuatia kushoto kwake ni Jaji wa Mahakama ya Rufani, Mhe. Leila Edith Mgonya (alievaa miwani) na wa pili kulia kwake ni Mtendaji wa Mahakama ya Rufani, Bw. Victor Florence Kategere wakipata maelezo mafupi na taarifa mbalimbali kutoka kwa Mhandisi (hayupo pichani ) Bw Moses Lawrence Lwiva katika ukumbi wa mkutano uliopo katika ofisi ya Mahakao makuu ya Mahakama Jijini Dodoma.

Jaji wa Mahakama ya Rufani Tanzania, Mhe. Augustine Gherabast Mwarija akisikiliza kwa makini taarifa kutoka kwa Mhandisi, Bw. Moses Lawrence Lwiva (hayupo pichani)

Majaji wa Mahakama ya Rufani Tanzania wakiwa katika moja ya ofisi ya Jaji wa Mahakama ya Rufani mara baada ya kutembelea ofisi hizo zilizopo katika Makao Makuu ya Mahakama Jijini Dodoma.

Sehemu ya Majaji wa Mahakama ya rufani pamoja na watumishi wa Mhakama wakiwa katika picha ya pamoja.

Majaji wa Mahakama ya Rufani Tanzania wakiwa katika picha ya pamoja.

Jaji wa Mahakama ya Rufani Tanzania, Mhe. Augustine Gherabast Mwarija, (wa kwanza kulia) kushoto kwake  ni Jaji wa Mahakama ya Rufani Mhe.Dkt Gerald Mbonipa Ndika wakiwa katika picha ya pamoja katika moja ya nyumba za makazi za Majaji zilizopo eneo la Iyumbu Dodoma.

Jaji wa Mahakama ya Rufani Tanzania, Mhe. Augustine Gherabast Mwarija, (wa kwanza kulia ) aliyeshika kiti akisiliza kwa umakini maelezo kutoka kwa Mhandisi, Bw.Moses Lwiza (hayupo pichani ) mara baada ya kufika katika nyumba za makazi ya Majaji zilizopo eneo la Iyumbu.

Jaji wa Mahakama ya Rufani Tanzania, Mhe. Augustine Gherabast Mwarija akiwa katika sehemu ya makazi ya nyumba za Majaji wa Mahakama ya Rufani zilizopo Iyumbu Dodoma.

Sehemu ya viongozi na watumishi walioambatana na ugeni huo wakisiliza kwa makani maelekezo.

Sehemu ya Majaji wa Mahakama ya Rufani pamoja na watumishi wa Mahakama wakiingia katika nyumba za Majaji wa Mahakama ya Rufani eneo la Iyumbu Jijini Dodoma.

(Habari hii imehaririwa na FAUSTINE KAPAMA-Mahakama, Dar es Salaam)

 

 

 

NAIBU MSAJIL MAXIMILLIAN ALPHONCE MALEWO AAGWA KIBAHA

• Jaji Mkuu awaongoza waombolezaji
• Paroko ahimiza waombolezaji kujiandaa

Na FAUSTINE KAPAMA na Eunice Lugiana-Mahakama, Kibaha

Jaji Mkuu wa Tanzania, Mhe. Prof. Ibrahim Hamis Juma leo tarehe 20 Desemba, 2024 amewaongoza Watumishi wa Mahakama ya Tanzania na waombolezaji wengine kumuaga Naibu Msajili, Mhe. Maximillian Alphonce Malewo.

Mhe. Malewo, aliyefariki Dunia katika Hospitali ya Taifa Muhimili Mloganzila jijini Dar-es-Salaam tarehe 17 Desemba, 2024, ameagwa na watumishi wenzake nyumbani kwake Misugusugu Kongowe, Wilaya ya Kibaha mkoani Pwani kabla ya mwili wake kusafirishwa kuelekea Moshi, Kilimanjaro kwa mazishi.

Jaji Mkuu aliwasili nyumbani kwa Marehemu majira ya saa 6.30 mchana na kupokelewa na Jaji Mfawidhi wa Mahakama Kuu ya Tanzania, Kanda ya Dar-es-Salaam, Mhe. Salma Maghimbi aliyemwakilisha Jaji Kiongozi wa Mahakama Kuu ya Tanzania, Mhe. Dkt. Mustapher Mohamed Siyani.

Baada ya kuwasili katika eneo la msiba, Mhe. Prof. Juma aliongozwa kwenda moja kwa moja kutoa heshima zake za mwisho kwenye mwili wa Mhe. Malewo.

Ibada ya misa takatifu ilifuata baada ya tukio hilo la kutoa heshima mwisho kabla ya kuwaruhusu Viongozi wa Mahakama, ndugu na jamaa wa Marehemu Malewo kutoa salamu za pole.

Akiwasilisha salamu zake kwa niaba ya Mahakama, Msajili Mkuu wa Mahakama ya Tanzania, Mhe. Eva Kiaki Nkya amemwelezea Naibu Msajili Malewo kama mtumishi mcheshi na mwema aliyetekeleza majukumu yake kwa kuzingatia maadili, uadilifu na weledi wa hali ya juu.

Amesema Mahakama ya Tanzania imepokea taarifa za msiba huo kwa mshituko mkubwa na ameacha alama isiyofutika kutokana na uamuzi wake aliotoa na kwa jinsi alivyokuwa anashirikiana na wenzake katika utendaji kazi.

Naye Paroko wa Parokia ya Mtakatifu Policarp Misugusugu, Padri Venance Shiganga, akizungumza wakati wa mahubiri kwenye ibada takatifu, amewaeleza waomboleaji wajitahidi kumjua mungu, kumpenda, kumtumikia na mwisho kufika kwake mbinguni.

Amewasihi kila mmoja kutafakari namna anavyoenenda katika maisha kama inavyompendeza Mungu, siyo kwa kada ya sheria tu bali pia kwa kila mtu.

"Kila mmoja ataondoka. Maisha ya duniani ni ya kupita, lakini unapitaje? Kila mtu anaogopa kifo na tunaogopa kwa sababu hatujajiandaa. Kila mmoja atengeneze njia yake na kujiandalia kifo chake. Kila mmoja ajiandae na kuishi maisha yanayompendeza Mungu,"amesema.

Padri Shiganga, aliyeshirikiana na Paroko wa Parokia ya Mbezi Luis, Padri Silyvester Msemwa kuongoza ibada hiyo, amewaeleza waomboleza kuwa Mhe. Malewo ametutangulia, hivyo kila mmoja tamwombee ili Mungu ampokee katika maisha yake ya milele na wale ambao wamebaki wajitahidi kuishi maisha yanayompendeza Mungu.

Viongozi wengine wa Mahakama waliohudhuria ibada hiyo ni Jaji wa Mahakama ya Rufani, Mhe. Dkt. Lilian Mashaka, Majaji Wafawidhi wa Mahakama Kuu kutoka Kanda mbalimbali na Divisheni, Msajili Mkuu wa Mahakama ya Tanzania, Msajili wa Mahakama ya Rufani, Msajili wa Mahakama Kuu ya Tanzania, Naibu Wasajili na Mahakimu mbalimbali.

Walikuwepo pia Wadau mbalimbali wa Mahakama ya Tanzania, wakiwemo Mawakili wa Serikali na Mawakili wa Kujitegemea, wananchi wa maeneo ya jirani na wengine wengi.

Mhe. Maximillian Alphonce Malewo alizaliwa mnamo tarehe 28 Julai, 1975. Aliajiriwa na Mahakama ya Tanzania tarehe 03 Januari, 2002 kama Hakimu Mkazi Daraja la III na kupangiwa Kituo cha Kazi Mahakama ya Hakimu Mkazi Musoma na kuhudumu katika wadhifa huo hadi mwaka 2006.

Mnamo mwaka 2006 hadi 2009 aliteuliwa kuwa Hakimu Mkazi Mfawidhi Mahakama ya Wilaya Mbinga. Mwaka 2009 aliteuliwa kuwa Naibu Msajili na kupangiwa Mahakama ya Rufani alipohudumu hadi 2015. 

Vilevile, akiwa anaendelea na wadhifa wake wa Naibu Msajili, mwaka 2015 hadi 2016, Mhe. Malewo alipangiwa kuhudumu Mahakama Kuu Divisheni ya Kazi na mwaka 2016 hadi 2021 alipangiwa kuhudumu Mahakama Kuu Kanda ya Songea.

Aidha, mwaka 2021, Mhe. Malewo alipangiwa kuhudumu Mahakama Kuu Kanda ya Iringa na mnamo Julai, 2024 alipangiwa kuhudumu Mahakama ya Hakimu Mkazi Kisutu, mpaka mauti yalipomfika. 

 

Jaji Mkuu wa Tanzania, Mhe. Prof. Ibrahim Hamis Juma akitoa heshima za mwisho kwa mwili wa Naibu Msajili, Mhe. Maximillian Malewo aliyefariki Dunia tarehe 17 Desemba, jijini Dar es Salaam.

Jaji wa Mahakama ya Rufani Tanzania, Mhe. Dkt. Lilian Mashaka akitoa heshima zake za mwisho. Picha chini ni Majaji wa Mahakama Kuu ya Tanzania wakitoa heshima zao za mwisho.

Viongozi wa Mahakama wakiongozwa na Jaji Mkuu wa Tanzania, Mhe. Prof. Ibrahim Hamis Juma (katikati) wakiwa wameketi kwenye nafasi zao baada ya kutoa heshima za mwisho kwa mwili wa Marehemu Malewo.

Sehemu ya waombolezaji waliofurika nyumbani kwa Marehemu Malewo.

Mwili wa Marehemu Maximilian Malewo (juu na chini) ukiwasili nyumbani kwake.

Simanzi! Mke wa Marehemu Malewo, Prisca Nyamgambwa, ambaye pia ni mtumishi wa Mahakama (juu) akiwasili nyumbani kwake kwa huzuni kubwa akiwa anamsindikiza mume wake. Picha chini, mwili wa Marehemu Malewo ukiwa ndani ya nyumba yake huku watumishi wa Mahakama wakiwa kwenye huzuni kubwa.

Watoto wa Marehemu Malewo wakiwasilisha salamu za shukrani kwa Mahakama ya Tanzania na majirani kwa kuwafariji.

Hakimu Mkazi Mfawidhi wa Mahakama ya Hakimu Mkazi Kisutu, Mhe. Franco Kaswaga akiwasilisha historia fupi ya Marehemu Malewo.

Msajili Mkuu wa Mahakama ya Tanzania, Mhe. Eva Nkya (kulia) akiwasilisha salamu za Mahakama ya Tanzania. Kushoto ni Msajili wa Mahakama ya Rufani Tanzania, Mhe. George Herbert.

Ibada ya misa takatifu ikiendelea.

Paroko wa Parokia ya Mtakatifu Policarp Misugusugu, Venance Shiganga akihubiri wakati wa ibada hiyo.

Kwa heri Mhe. Maximillian Alphonce Malewo.

JAJI KAKOLAKI ATETA NA WATUMISHI WAPYA

• Asisitiza Uadilifu, Weledi, Uwajibikaji

Na ARAPHA RUSHEKE –Mahakama, Dodoma

Kaimu Jaji Mfawidhi wa Mahakama Kuu ya Tanzania, Kanda ya Dodoma, Mhe. Edwin  Elias Kakolaki amewataka watumishi ajira mpya ambao wamejiriwa na Mahakama ya Tanzania hivi karibuni kuishi katika salaam ya Mahakama inayohimiza uadilifu,weledi na uwajibikaji.

Akizungumza na watumishi hao juzi tarehe 18 Disemba,2024 katika ukumbi wa mikutano uliopo katika Kituo Jumuishi cha Utoaji Haki (IJC) Dodoma, Mhe. Kakolaki aliwataka kufanya kazi kwa weledi na bidii ili kuhakikisha mpango mkakati wa Mahakama unafikiwa kwa kiwango kikubwa.

Aidha, Kaimu Jaji Mfawidhi huyo aliwakaribisha pia watumishi wapya na kuwasihi kuishi katika maadili ya utumishi wa umma pamoja na kupenda kujifunza kazi Zaidi, kwani kufanya hivyo kutawarahisishia na kumaliza majukumu yao kwa wakati.

 “Nimefarijika kuwaona na nina wakaribisha sana katika Kanda hii ya Dodoma. Nina imani mtafanya kazi kwa weledi na uadilifu kama ambavyo viapo vyenu vinavyosema.  Hakikisheni mnaiishi salamu ya Mahakama ambayo inasema uadilifu, weledi na uwajibikaji, ninahakika mkiishi salamu hiyo mtafanya kazi kwa uadilifu mkubwa sana,” alisema.

Kwa upande wake, Naibu Msajili wa Mahakama Kuu Kanda ya Dodoma, Mhe. Silivia Selestine Lushasi aliwapongeza na kuwakaribisha watumishi hao na kuahidi kushirikiana nao katika kazi. Alitumia wasaa huo kuwahimiza kuzingatia uadilifu na maadili katika kazi zao kwa kujiepeusha na matendo yote ambayo yataharibu haiba ya uadilifu wao.

Naye Mtendaji wa Mahakama Kuu Kanda ya Dodoma, Bw. Sumera Manoti aliwataka watumishi hao wakatimize wajibu wao kwa mujibu wa sharia, taratibu na miongozo.

Kaimu Jaji Mfawidhi wa Mahakama Kuu Kanda ya Dodoma, Mhe. Edwin Elias Kakolaki akizizitiza jambo wakati wa kikao na watumishi wapya kilichofanyika katika ukumbi wa IJC Dodoma.

Naibu Msajili wa Mahakama Kuu Kanda ya Dodoma, Mhe. Silivia Selestin Lushasi akiongea jambo wakati wa kikao hicho.

Meza Kuu wakiongozwa na Kaimu Jaji Mfawidhi wa Mahakama Kuu, Kanda ya Dodoma, Mhe. Edwin Elias Kakolaki (aliyekaa katikati)kulia kwake ni Naibu Msajili wa Mahakama Kuu, Kanda ya Dodoma, Mhe.Silivia Selestini Lushasi na kushoto kwake ni Mtendaji wa Mahakama Kuu Dodoma, Bw .Sumera Manoti wakiwa katika picha ya pamoja na watumishi wapya pamoja na watumishi wengine wa Mahakama waliohudhuria kikao hicho.

Mtendaji wa Mahakama Kuu Dodoma, Bw. Sumera Manoti (aliyekaa katikati), kushoto kwake ni AfisaUutumishi Mwandamizi wa Mahakama Kuu Dodoma, Bw. Stanley Makendi, kulia kakwe na Afisa Utumishi Mwandamizi wa Mahakama Kuu Dodoma, Bi. Doto Sosela wakiwa katika picha ya pamoja na watumishi ajira mpya.

Mtendaji wa Mahakama Kuu Dodoma, Bw. Sumera Manoti (aliyekaa katikati), kushoto kwake ni AfisaUutumishi Mwandamizi wa Mahakama Kuu Dodoma, Bw. Stanley Makendi, kulia kakwe na Afisa Utumishi Mwandamizi wa Mahakama Kuu Dodoma, Bi. Doto Sosela, walio simama kulia kwake ni Afisa Tawala Mwandamizi wa Mahakama ya Wilaya Kondoa, Bi. Edna Dushi na anayefuatia ni Afisa Utumishi wa Mahakama ya Wilaya Bahi, Bi. Recho Lubeleje.

(Habari hii imehaririwa na FAUSTINE KAPAMA-Mahakama, Dar es Salaam)

 

 

KAMATI YA JAJI MKUU TEHAMA NA TAKWIMU YATEMBELEA KITUO CHA UTUNZAJI DATA KIMTANDAO 'NIDC'

Kamati ya Jaji Mkuu ya Teknolojia ya Habari na Mawasiliano (TEHAMA) na TAKWIMU tarehe 18 Desemba, 2024 ilitembelea Kituo cha Taifa kwa ajili ya Utunzaji Data na Mifumo kwa Njia ya Kimtandao (National Internet Data Center-NIDC) kujifunza na kuona namna taarifa za kidigiti zinavyohifadhiwa pamoja na huduma zinazotolewa na Kituo hicho.

Matukio katika picha ya ziara hiyo.

TAWJA KUADHIMISHA MIAKA 25 TANGU KUANZISHWA

SALUM TAWANI na MAGRETH KINABO – Mahakama, Dar es Salaam

 . Yajivunia ongezeko la Majaji na Mahakimu wanawake

Chama cha Majaji na Mahakimu Wanawake Tanzania (TAWJA) kimesema kinatarajia kufanya maadhimisho ya miaka 25 jijini Arusha kuanzia tarehe 19 hadi tarehe 23 Januari , 2025 tangu kuanzishwa kwake. 

Akizungumza na waandishi wa habari leo tarehe 19 Desemba, 2024 kuhusu maadhimisho hayo, Mwenyekiti wa Chama hicho ambapo pia ni Jaji wa Mahakama ya Rufani Tanzania, Mhe. Barke Mbaraka Sehel  Jijini Dar es Salaam katika Ukumbi wa Mikutano wa Kituo cha Haki  Utoaji  Haki Jumuishi Kinondoni, (Integrated Justice  Center).

Jaji Sehel amesema kuwa mgeni rasmi katika ufunguzi wa maadhimisho hayo, utakaofanyika tarehe 20 Januari, 2025 anatarajiwa kuwa, Rais wa Jamhuri ya Muungano wa Tanzania, Mhe. Dkt. Samia Suluhu Hassan Jijini Arusha katika ukumbi wa Mikutano wa Kimataifa Arusha (AICC).

Ambapo amesema kauli mbiu ya maadhimisho hayo, ni “Kusheherekea Utofauti na Mshikamano Katika Usawa wa Jinsia”.

‘’Maadhimisho haya yatakusanya wadau mbalimbali wakiwemo wanachama wa TAWJA, waliopo kazini na walio wastaafu, Majaji na Mahakimu wa Kike kutoka katika Mahakama za Tanzania na Zanzibar. Pia Jaji Mkuu wa Mahakama ya Tanzania, Mhe. Prof. Ibrahim Hamis Juma na Jaji Kiongozi wa Mahakama Kuu ya Tanzania, Mhe. Dkt. Mustapher Mohamed Siyani,” alisema Mwenyekiti wa chama hicho.

Wengine ni washiriki wa Kimataifa kama vile UN Woman, UNDP, UNICEF na wadau wa maendeleo, wawakilishi kutoka Serikali ya Tanzania Bara na  Visiwani  wakiwemo viongozi wa  Wizara ya Katiba Sheria, mashirika ya haki za wanawake kama vile TAWLA , WLAC, TGNP, NGOs na vikundi vya utetezi,mashirika mbalimbali kama vile Balozi , taasisi za kifedha  na vyombo vya habari.

Jaji Sehel ameongoza kuwa TAWJA ilianzishwa mwaka 2000 baada ya majadiliano kati ya Marehemu Justice Patch na Jaji Mstaafu wa Mahakama ya Rufani Tanzania,Mhe. Eusebia Munuo, kama mshirika wa Chama cha Kimataifa cha Majaji Wanawake (IAWJ) TAWJA inajikita katika kukuza haki za wanawake, kuhakikisha usawa wa kijinsia katika utawala wa Sheria na kutetea haki sawa  kwa wote, hasa wanawake na watoto.

Amefafanua mafanikio ya miaka 25 yanayosheherekewa yaliyofikiwa katika maeneo hayo ni makubwa na TAWJA imetoa mchango mkubwa katika usawa wa kijinsia ndani ya mfumo wa Mahakama ya Tanzania na juhudi zake za kuboresha haki za wanawake na makundi dhaifu. Hivyo hadi sasa kwa mafanikio hayo ya TAWJA yanawafanya tuzingatie maendeleo yaliyofikiwa na kazi endelevu inahitajika ili kuendeleza mfumo wa kisheria wenye usawa unaojumuisha wote.

‘’Tunawakaribisha washiriki kuja Arusha ili kutafakari mafanikio ya miaka 25 ya TAWJA na kujadili changamoto za baadae katika kukuza usawa wa kijinsia na uwezeshaji wa wanawake kwa pamoja,’’ alisisitiza Mwenyekiti huyo Mhe. Jaji Sehel.

Aidha Jaji Sehel ametanabaisha kuwa katika maadhimisho hayo, kutakuwa na shughuli mbalimbali kama vile mbio za TAWJA, zitakazofanyika tarehe 19 Januari, 2024 na kauli mbiu yake ni ‘Mshikamo katika haki za kijinsia uaanzia hapa shiriki na elimisha. Mgeni rasmi katika mbio hizo anatarajia kuwa Spika wa Bunge la Jamhuri ya Muungano wa Tanzania na Rais wa Umoja Mabunge ya Duniani(IPU) Mhe.Dkt. Tulia Ackson.

Hivyo lengo la mbio hizo ni kushirikiana kwa pamoja katika kushughulikia masuala mbalimbali ya kijinsia na kuongeza uelewa katika jamii kuhusu ukatili wa kijinsia (GBV), ndoa za utotoni, unyanyasaji wa kijinsia na haki za wanawake katika umiliki wa ardhi. Pia fedha zitakazokusanywa kwenye mbio hizo zitasaidia kuanzisha klabu za haki na jinsia katika shule za sekondari sita zilizopo jijini Arusha kwa ajili ya kutoa elimu ya kijinsia na uendelezaji wa ujuzi wa maisha.

Mhe. Jaji Sehel katika kesi zinazohusiana na masuala ya kijinsia katika miaka ya sasa zinazoongoza ni za ubakaji na kuingiliana kinyume na maumbile, ambapo zipo katika kila mkoa tofauti na zamani zinaripotiwa kwenye  fulani. 

Naye Mwenyekiti wa Maandalizi ya Maadhimisho hayo, Jaji Mstaafu wa MahakamaKuu ya Tanzania, Mhe. Sophia Wambura aliyataja mafaniko yaliyotokana na juhudi za chama hicho kuwa kuongezeka kwa idadi ya majaji na mahakimu wanawake ukilinganisha na zamani.

Mhe. Jaji Wambura alitolea mfano kuwa kwa upande wa Mahakama ya Rufani Tanzania mwaka 2000 kulikuwa hakuna Jaji mwanamke, lakini sasa kuna majaji 36 kati  ya hao wanawake wako 13, na upande wa Mahakama Kuu ya Tanzania kuna majaji 110 kati yao majaji wanawake 41.

Amezitaja changamoto mbalimbali wanazokabiliana nazo kama majaji na mahakimu kuwa kesi nyingi za namna huharibika kutokana baadhi ya familia kutoa ushirikiano kwa Mahakama kwa sababu ya mahusihano yaliyokuwepo kati ya mtendakosa na aliyetendewa, Pia kuairishwa kwa kesi mara kwa mara kunasababisha  wahusika katika kesi za masuala kushindwa kufika mahakamani kwa sababu za ukosefu fedha na kutenga muda wa kazi na kifamilia.

Akizungumzia kuhusu matukio yatakayofanyika katika maadhimisho hayo, Jaji wa Mahakama Kuu ya Tanzania Kanda ya Arusha, Mhe. Aisha Bade amesema  kuwa kutakuwa na maonesho kutoka jukwaa la mtandao, kushirikiana rasilimali, na  lengo  lake ni kuelimisha umma kuhusu haki za kijinsia  na masuala ya haki za binadamu.

 Aliyataja matukio mengine yatakayofanyika ni kama vile usiku wa Arusha  ambapo kutatoa fursa  ya kutosha kwa washiriki kufurahia kwa pamoja jiji la wa Arusha, kubadilishana mawazo na kujua tamadani zao, pia kutakuwa na mafunzo kuhusu masuala ya kijinsia katika shule za sekondari, kufungua rasmi klabu za haki za jinsia na washiriki watafurahia ziara kwenye maeneo maarufu ya kihistoria.

Mwenyekiti wa Chama cha Majaji na Mahakimu Wanawake Tanzania (TAWJA), Mhe. Barke Mbaraka Sehel (katikati) akizungumza  katika mkutano na waandishi wa habari leo kuhusu maadhimisho ya miaka 25 ya chama hicho, yatakayofanyika jijini Arusha kuanzia Januari 19 hadi 23 mwaka 2025. (Kushoto )ni Mwenyekiti wa  Kamati ya Maandalizi ya Sherehe hizo, ambaye ni Jaji Mstaafu wa Mahakama  Kuu ya Tanzania, Mhe. Sophia Wambura na (kulia ni Mwenyekiti Mwenyeji wa Kamati ya Maandalizi ya Sherehe hizo, ambaye ni Jaji wa Mahakama Kuu ya Tanzania Kanda ya Arusha, Mhe. Aisha  Zumo Bade.

 

Mwenyekiti wa Kamati ya Maandalizi ya Sherehe hizo, ambaye ni Jaji Mstaafu wa Mahakama Kuu ya Tanzania, Mhe. Sophia Wambura(katikati) na (kulia) ni Mwenyekiti wa Chama cha Majaji na Mahakimu Wanawake Tanzania (TAWJA), Mhe. Barke Mbaraka Sehel(kulia) na kushoto ni Mwenyekiti Mwenyeji wa Kamati ya Maandalizi ya Sherehe hizo, ambaye ni Jaji wa Mahakama Kuu ya Tanzania Kanda ya Arusha, Mhe. Aisha Bade.

  

Mwenyekiti Mwenyeji wa Kamati ya Maandalizi ya Sherehe hizo, ambaye ni Jaji wa Mahakama Kuu ya Tanzania Kanda ya Arusha, Mhe. Aisha Zumo Bade(Kulia) akitaja matukio ya mkutano huo.

Mwenyekiti wa Chama cha Majaji na Mahakimu Wanawake Tanzania (TAWJA), Mhe. Barke Mbaraka Sehel (kulia) akijibu maswali ya waandishi wa habari.

Waandishi wa Habari wakiwa katika mkutano huo.

WAZIRI KIKWETE AWAKUMBUSHA WATENDAJI KUSIMAMIA MASLAHI YA WATUMISHI WENYE MAHITAJI MAALUM

Na ARAPHA RUSHEKE –Mahakama, Dodoma

Waziri wa Nchi Ofisi ya Waziri Mkuu, Kazi, Vijana, Ajira na Wenye Ulemavu, Mhe. Ridhiwani Kikwete amewakumbusha watendaji kusimamia maslahi ya watumishi wenye mahitaji maalum. 

Mhe Kikwete ametoa rai hiyo jana 17 Desemba, 2024 katika ukumbi wa OSHA Dodoma alipokuwa anafunga mafunzo ya watumishi wenye mahitaji maalum kutoka Serikalini, Mahakama na Taasisi za Umma.

Mafunzo hayo yaliendeshwa na Mahakama Kuu ya Tanzania, Divisheni ya Kazi kwa kushirikiana na Taasisi ya OSHA inayosimamia Usalama na Afya Mahala pa Kazi.

 “Nimefarijika kuona mafunzo haya yamejumuisha Mhimili wa Mahakama ili kuwajengea uelewa washiriki katika masuala ya usalama na afya waweze kutekeleza majukumu yao ya kila siku kwa kuzingatia kanuni bora na kujilinda dhidi ya viatarishi vya magonjwa na ajali mahala pa kazi,” amesema.

 Mhe. Kikwete aliwaambia washiriki wa mafunzo hayo kuwa yeye binafsi na Wizara wanaamini changamoto nyingi zinazojitokeza mahala pa kazi zitatatuliwa kama wataitumia vizuri elimu waliyoyapata.

“Niwatake watendaji kuhakikisha haki na maslahi ya watumishi wenye mahitaji maalum yanasimamiwa kwa kutunga sera na mipango mbalimbali ikiwemo inayowezesha sera hizo kutekelezeka,” alisema.

Naye Jaji Mfawidhi wa Mahakama Kuu ya Tanzania, Divisheni ya Kazi, Mhe. Dkt Yose Joseph Mlyambina, akizungumza wakati wakutoa neno fupi la shukrani, aliwakumbusha washiriki ujumbe wa Jaji Kiongozi wa Mahakama Kuu ya Tanzania, Mhe. Dkt. Mustapher Mohamed Siyani wakati wa ufunguzi wa mafunzo hayo.

Alisema kuwa Jaji Kiongozi alimsihi kila mtumishi wa umma kuongozwa na mambo matatu ambayo Mahakama imeamua kuweka kwenye salamu yake ambayo ni uadilifu,weledi na uwajibikaji.

Mada mbalimbali ziliwasilishwa wakati wa mafunzo hayo ambayo yalitolewa kwa siku mbili kuanzia tarehe 16 Desemba, 2024, ikiwemo utangulizi wa awali kuhusu OSHA Tanzania na shughuli na majukumu yake na mfumo wa kisheria unaosimamia ajira na mahusiano kazini kwa watu wenye mahitaji maalum

Nyingine ni mapitio ya kina ya sheria ya OSHA katika kulinda watu wenye mahitaji maalum; kuvifahamu vihatarishi na madhara yake kwa wafanyakazi wenye mahitaji maalum na changamoto za msongo wa mawazo na afya ya akili.

Meza kuu wakati wa kufunga  mafunzo hayo ikiongozwa na mgeni rasmi, Waziri wa Nchi Ofisi ya Waziri Mkuu, Kazi, Vijana, Ajira na Wenye Ulemavu Mhe. Ridhiwani Kikwete.(aliyekaa katikati). Kushoto kwake ni Jaji Mfawidhi wa Mahakama Kuu Divisheni ya Kazi, Mhe. Dkt. Yose Joseph Mlyambina, anayefuatia ni  Jaji Mahakama Kuu kutoka Divisheni hiyo, Mhe. Dkt. Modesta Opiyo, kulia kwake ni Kamishna wa kazi Tanzania Bara, Bi Suzan Mkangwa, anayefuatia ni Mtendaji Mkuu wa Wakala wa Usalama na Afya Mahala pa Kazi, Bi. Hadija Mwenda.

Waziri wa Nchi Ofisi ya Waziri Mkuu, Kazi, Vijana, Ajira na Wenye Ulemavu Mhe. Ridhiwani Kikwete akizungumza wakati wa kufunga mafunzo hayo.

Jaji Mfawidhi Mahakama Kuu Divisheni ya Kazi, Mhe. Dkt Yose Joseph Mlyambina, akiongea neno la shukrani wakati wa kufunga mafunzo hayo.

Mtendaji Mkuu wa Wakala wa Usalama na Afya Mahala pa Kazi, Bi. Hadija Mwenda  (aliyesimama) akitoa neno la shukrani.

Sehemu ya washiriki wa mafunzo hayo.

Meza kuu ikiwa katika picha ya pamoja na na watumishi wa Mahakama waliohudhuria mafunzo hayo.

(Habari hii imehaririwa na FAUSTINE KAPAMA-Mahakama, Dar es Salaam)