 |
|
Jaji Mkuu wa Tanzania, Mhe. Mohamed Chande
Othman, akitoa hotuba yake leo wakati
akifungua mkutano mkuu wa saba wa
Taasisi ya Waamuzi Tanzania uliofanyika leo jijini Dar es Salaam kwenye ukumbi
wa mkutano wa Luther House. Katika mkutano
huo, alisisitiza suala la kuzingatia maadili ya taaluma hiyo katika kushughulikia
migogoro dhidi ya masuala ya kibiashara na sekta ya ujenzi.Kushoto ni Mwenyekiti wa taasisi hiyo,Kesogukewele Msita na kulia ni Mweka Hazina wa taasisi hiyo Dkt. Fetus Limbo.
|
Jaji Mkuu wa Tanzania, Mhe. Mohamed Chande
Othman, akiwa katika picha ya pamoja na baadhi ya wajumbe wa taasisi hiyo leo mara baada ya kufungua mkutano mkuu wa saba wa
Taasisi ya Waamuzi Tanzania.
HOTUBA YA UFUNGUZI WA KIKAO KAZI CHA MAHAKAMA NA WADAU KUHUSU MPANGO MKAKATI
HOTUBA YA JAJI MFAWIDHI MAKAHAMA KUU YA
TANZANIA KANDA YA DODOMA KATIKA KIKAO
KAZI CHA MAHAKAMA YA TANZANIA NA WADAU WAKE KWENYE KUKAMILISHA MPANGO MKAKATI
WA MAHAKAMA YA TANZANIA ILIYOTOLEWA KWENYE UKUMBI WA MIKUTANO WA HAZINA DODOMA
TAREHE 19 JULAI, 2016.
Mhe Msajili Mkuu wa Mahakama ya Tanzania, Mhe
Msajili wa Mahakama Kuu, Mhe Mtendaji wa Mahakama Kuu, Rais wa Chama cha
Mawakili wa Tanganyika, Mkemia Mkuu wa Serikali, Washiriki wote wa Kikao kazi
hiki kutoka ndani ya Mahakama ya Tanzania na kutoka Taasisi mbali mbali ambazo
ni wadau wetu, waandishi wa habari, mabibi na mabwana,
Ninawasalimu.
Awali ya yote ninapenda kumshukuru Mwenyezi
Mungu kwa kutujaalia uhai na afya njema katika shughuli zetu za kila siku na
hivyo kutuwezesha kukutana hapa siku hii ya leo. Pia kwa niaba ya Mahakama ya
Tanzania ninawakaribisha wadau wetu wote waliohudhuria leo katika ukumbi huu.
Ndugu
wadau wetu na wanasemina, ninayo
furaha kubwa kupata nafasi hii adhimu ya kukutana na hadhira hii kwa lengo la
kushirikiana katika hatua za kupeana mrejesho na kuendelea kuuboresha Mpango
Mkakati wa Mahakama ya Tanzania. Suala hili kwa hakika linanipa faraja ya
kiwango cha juu kwa kuwa linazidi kutuweka karibu na kutujengea uwezo wa pamoja
katika uelewa, ujenzi na hatimaye utekelezaji wa Mpango Mkakati huu. Nimefajirika
pia kupata taarifa kuwa wadau wetu mmeitikia wito na kufika hapa. Hii
inadhihirisha kuwa mnathamini sana shughuli za Mahakama ya Tanzania. Na hivyo
ni imani yangu kuwa ushiriki wenu utakuwa na athari chanya.
Vile vile taarifa nilizozipata
zimenidhihirishia kuwa wakati semina hii inapoendea ukingoni matunda
yaliyopatikana ni ya thamani kubwa katika kuongeza uelewa wa juhudi za makusudi
ambazo tumeamua kuzichukua kuibadilisha Mahakama ya Tanzania kuwa chombo chenye
kujibu maswali na kiu ya wananchi katika kupata haki kwa mujibu wa jukumu tulilokabidhiwa
ndani ya Katiba ya Jamhuri ya Muungano wa Tanzania, 1977 kama ilivyofanyiwa
marekebisho mara kwa mara.
Ndugu wadau
na wanasemina nia ya kazi
hii ambayo inafanyika hapa Dodoma kwa wiki mbili ni kuhakikisha kuwa,
tunachukuana wote katika hatua zote za msingi za uundwaji wa Mpango Mkakati wa
Mahakama ya Tanzania, kuyaelewa kwa undani malengo yetu ya msingi, kuyaoanisha
na Dira yetu, Misingi tuliyojiwekea, Maeneo ya Matokeo makubwa, Malengo ya
kimkakati, maeneo ya kuyafanyia kazi, hatua muhimu za kuchukua kwa kila kazi
inayotakiwa kufanyika na hatimaye kujua viashiria vikuu vinavyoonesha endapo
mafanikio yamepatikana au la. Zoezi hili linasaidia kuhakikisha kunakuwa na
uendelevu usio na maswali katika utekelezaji hata pale ambapo sisi tuliouandaa
Mpango hatupo.
Vile vile mpango huu unatoa fursa kwetu kujua umuhimu, nguvu na nafasi waliyonayo
wadau wetu kufanikisha utendaji wa Mahakama katika kuyafikia malengo ya kutoa
huduma kwa wananchi.Tunatambua kuwa peke yetu hatuwezi na kwa hali hiyo
utendaji wa pamoja unahitajika sana kuanzia ngazi za Mahakama yenyewe na kwa
kushirikiana na wadau wetu.
Kwa kuelewa kuwa wadau wetu ni chachu ya mafanikio ya Mahakama na kwa
sekta nzima ya Sheria katika utoaji wa haki, tumeweza kuainisha maeneo makuu ya
mashirikiano na aina ya msaada mahsusi ambao tutahitaji kutoka kwenu. Kama
usemi usemao kuwa ‘Kidole kimoja hakivunji chawa’ ndivyo ambavyo Mahakama ya
Tanzania inatambua kuwa ‘Umoja ni nguvu na utengano ni udhaifu’. Suala hili limeainishwa
katika mawasilisho yatakayofanywa na makundi tofauti muda mfupi ujao.
Kwa
wadau wetu mtakumbuka kuwa katika
juhudi zetu mbalimbali tumehakikisha kuwa tunashirikiana nanyi katika hatua
zote za kuandaa Mpango wetu huu bila kificho
ili kuwawezesha nanyi kwa upande wenu kutoa nafasi ya kutuweka katika mipango
yenu kwenye hatua za uandaaji na utekelezaji. Kuna usemi usemao ‘Ukikimbia peke
yako utafika haraka bali ukitembea na wenzako utafika mbali’. Mahakama inataka
kufika mbali katika kutoa huduma zake ambazo zinamlenga mwananchi ndiyo maana tunaomba
tutembee pamoja.
Ndugu
wanasemina, katika
kipindi mlichokuwa hapa wapo ambao lugha kuhusu Mpango mkakati huu ilikuwa
ngumu kuiielewa; ilionekana kuwahusu zaidi wataalam wa uchumi na menejimenti tu
na najua wengi wetu walikuwa wanaipa kisogo kwa kuona kama hawataelewa chochote.
Lakini naamini kuwa kwa sasa hali ni tofauti. Nimepata ushuhuda wa walio wengi
ni jinsi gani sasa mnaongea lugha moja. Basi kwa kuwa sasa mmeelewa na kwamba
nyenzo hii iko akilini na mikononi mwenu, ninaamini kwamba Mahakama yote ya
Tanzania pamoja na wadau wetu sasa tutaimba wimbo mmoja. Tutakuwa na
utekelezaji unaoendana na malengo kwa kufuata barabara tuliyoichonga kwa
pamoja. Mtakaposikia yale mtakayoelezwa na wawasilishaji, tafadhali toeni tena
michango ya kuendelea kuboresha mpango huu na tutaizingatia kwa kadri
itakavyowezekana.
Kwa
wadau wetu wote, matarajio
yangu na ya Mahakama ya Tanzania kwa ujumla kwenu ni kwamba msaada tunaouhitaji
kutoka kwenu utapatikana kwa wakati kwa kuwa mahitaji yetu kwenu sasa yatakuwa
sio mageni tena na kwamba, kwa kutekeleza jukumu lenu mtakuwa mnaelewa kuwa
hamuifanyii Mahakama tu bali mnafanya hivyo kwa ajili ya watanzania wote na
walipa kodi wa Taifa hili.
Ndugu
wadau na wanasemina, aidha, nimejulishwa
kuwa mara baada ya kukamilika kwa kazi hii hapa wiki hii, wiki ijayo timu ya
wataalamu katika Mahakama na baadhi ya washiriki wa semina hii watakuwa na kazi
ya kuufikisha Mpango Mkakati huu katika mikoa yote ya Tanzania bara. Hili ni
jambo zuri na hatua hiyo ambayo itaifanya Mahakama ya Tanzania kuwa Taasisi ya
kipekee katika kuandaa Mpango Mkakati huu kwa njia shirikishi na kuufikisha
nchi nzima kwa wakati mmoja. Ninawataka kuhakikisha kuwa wadau wetu huko katika
ngazi za mikoa na wilaya wanahusishwa katika mrejesho huu ili nao waweze
kuumiliki na kuufanyia kazi.
Ni rai yangu kuwa wenzetu katika ngazi zote wataendelea kutoa mafunzo
kuhusu Mpango Mkakati huu ili uweze kumfikia kila mtumishi kwa nia ya kuwafanya
waelewe njia tunayopaswa kutembea. Hatutakiwi tena kupit kwenye vichaka; barabara
nzuri imetengenezwa tunapaswa kuitumia na kuendelea kuikarabati ili vizazi
vingine viweze kufurahia kazi nzuri iliyofanywa na watangulizi wao.
Kwa
watumishi wa Mahakama, ninapenda
kuwakumbusha kuwa utendaji wetu wa kazi utapimwa kwa kuzingatia jinsi
tunavyotekeleza majukumu yetu kulingana na Mpango Mkakati huu. Hivyo, ni
matarajio yetu sote kuwa kazi hii yote haitaishia katika makaratasi bali itatupeleka
kuishi kwa matendo yenye kuleta matokeo chanya. Kwa hali hiyo tutaelekeza
rasilimali zetu zote, yaani watu, fedha
na muda katika kuleta matokeo makubwa yanayotarajiwa. Na tusikubali nguvu hii
iwe ni nguvu ya soda na kuishia hewani bure.
Aidha, nina imani kwamba endapo
tutajikita katika kufanikisha uimara wa nguzo zetu tatu za Mpango
Mkakati wetu yaani, utawala bora, uwajibikaji na usimamizi wa rasilimali;
upatikanaji wa haki kwa wakati na uhusishwaji wa wadau na imani ya wananchi
hakika tutatimiza ndoto ya kuifikia Dira
yetu. Hakuna lisilowezekana, kila mmoja atimize wajibu wake.
Ndugu
wanasemina, ninapenda
kuchukua fursa hii kuwapongeza kwa kazi nzuri mliyoifanya na ninawatakia kila heri
katika utekelezaji wake.
Ndugu
wadau na wanasemina, mwisho
ninawatakia heri na Baraka za Mwenyezi Mungu katika ushiriki wa uboreshaji wa
Mpango Mkakati wa Mahakama ya Tanzania kwa siku ya leo.
Ahsanteni sana kwa kunisikiliza.
M.A. KWARIKO,
JAJI MFAWIDHI,
MAHAKAMA KUU YA TANZANIA,
DODOMA .
Hakuna maoni:
Chapisha Maoni