WAZIRI MKUU WA TANZANIA AZINDUA MPANGO MKAKATI WA MIAKA MITANO WA MAHAKAMA YA TANZANIA

Jaji Mkuu wa Tanzania, Mhe. Mohamed Chande Othman akisalimiana na Waziri Mkuu wa Jamhuri ya Muungano wa Tanzania, Mhe. Kassim Majaliwa pindi alipowasili katika viwanja vya Mahakama ya Hakimu Mkazi na Mahakama ya Wilaya Kibaha mapema leo kwa ajili ya kuzindua rasmi Mpango Mkakati wa Mahakama pamoja na Mradi wa Maboresho wa Huduma za Mahakama, katikati ni Mkuu wa Mkoa wa Pwani, Mhandisi. Evarist Ndikilo.

Waziri wa Jamhuri wa Muungano wa Tanzania, Mhe. Kassim Majaliwa akionyeshwa   michoro mbalimbali ya miundombinu ya majengo ya Mahakama  pamoja na nyumba za Mahakama pindi alipowasili katika hafla fupi ya uzinduzi wa Mpango Mkakati wa Mahakama uliofanyika katika viwanja vya Mahakama ya Hakimu Mkazi na Mahakama ya Wilaya Kibaha.

Waziri wa Jamhuri ya Muungano wa Tanzania, Mhe. Kassim Majaliwa, akitoa hotuba yake wakati wa uzinduzi wa Mpango Mkakati wa Mahakama uliofanyika katika viwanja vya Mahakama ya Hakimu Mkazi na Mahakama ya Wilaya Kibaha, katika hotuba yake Mhe. Waziri Mkuu amesifu jitihada za Mahakama katika kuboresha huduma zake na kuzitaka Taasisi nyingine kuiga mfano wa Mahakama kwa kuwa na mikakati itakayowezesha maboresho ya huduma zao. 

Jaji Mkuu wa Tanzania, Mhe. Mohamed Chande Othman akitoa hotuba yake wakati wa uzinduzi wa Mpango Mkakati wa Mahakama, katika hotuba yake Mhe. Jaji Mkuu  aliongelea juu ya nguzo tatu za Mkakati huo ambazo ni Utawala bora, Uwajibikaji na usimamizi wa Rasilimali, Upatikanaji na utoaji wa haki kwa wakati pamoja na Kuimarisha imani ya jamii na ushirikishaji wa wadau katika shughuli za Mahakama.

Jaji Mkuu wa Tanzania, Mhe. Mohamed Chande Othman akijadili jambo na Mhe. Waziri Mkuu katika hafla ya uzinduzi  rasmi Mpango Mkakati wa Mahakama pamoja na Mradi wa Maboresho wa Huduma za Mahakama.

Mkurugenzi Mkazi wa Benki ya Dunia, Bi.Bella Bird akitoa hotuba yake wakati wa hafla hiyo, katika hotuba yake Bi. Bird alisema kuwa Benki ya Dunia itasaidia utekelezaji wa Mpango Mkakati wa Mahakama ya Tanzania.

Baadhi ya Watumishi wa Mahakama pamoja na Wananchi wakiwa katika hafla fupi ya uzinduzi rasmi Mpango Mkakati wa miaka mitano wa Mahakama pamoja na Mradi wa Maboresho wa Huduma za Mahakama.

Waziri Mkuu wa Tanzania, Mhe. Kassim Majaliwa akikata utepe kuashiria uzinduzi rasmi wa Mpango Mkakati wa miaka mitano wa Mahakama, wanaoshuhudia ni Waziri wa Katiba na Sheria, Mhe. Dkt. Harrison Mwakyembe, (wa kwanza kushoto), Naibu Spika wa Jamhuri ya Muungano wa Tanzania, Mhe. Dkt. Tulia Ackson Mwansansu (wa tatu kulia), wa pili kulia ni Mkuu wa Mkoa wa Pwani, Mhandisi. Evarist Ndikilo na wa kwanza kulia ni Jaji Kiongozi, Mahakama Kuu ya Tanzania, Mhe. Ferdinand Wambali.

Waziri Mkuu wa Tanzania, Mhe. Kassim Majaliwa akikata utepe kuashiria uzinduzi rasmi wa Mpango Mkakati wa miaka mitano wa Mahakama, anayeshuhudia kulia ni Naibu Spika wa Jamhuri ya Muungano wa Tanzania, Mhe. Dkt.  Tulia Ackson Mwansansu.

Mhe. Waziri Mkuu  akionesha nakala za vitabu vya Mpango Mkakati wa Mahakama mara baada ya kuzindua rasmi.

Waziri Mkuu, Mhe. Kassim Majaliwa akifurahia jambo pamoja na Jaji Mkuu wa Tanzania, Mhe. Mohamed Chande Othman (kulia), Mkuu wa Mkoa wa Pwani, Mhandisi. Evarist Ndikilo (wa pili kushoto) na Mkurugenzi Mkazi wa Benki ya Dunia, Bi. Bella Bird (kushoto) muda mfupi baada ya uzinduzi wa Mpango Mkakati.

Meza Kuu ikiwa katika picha ya pamoja na baadhi ya Waheshimiwa Majaji wa Mahakama Kuu pamoja na Makamishna wa Tume ya Utumishi wa Mahakama, aliyesimama nyuma mwenye suti ya bluu ni Mtendaji Mkuu wa Mahakama ya Tanzania, Mhe. Hussein Kattanga.

Waziri Mkuu wa Tanzania, Mhe. Kassim Majaliwa (katikati) akiwa katika picha ya pamoja baadhi ya Watumishi wa Mahakama Mkoa wa Pwani,wa nne kushoto ni Jaji Mkuu wa Tanzania,Mhe. Mohamed Chande Othman, wa nne kulia ni Naibu Spika wa Bunge la Tanzania, Dkt. Tulia Ackson Mwansansu, wa tatu kushoto ni Waziri wa Katiba na Sheria, Dkt. Harrison Mwakyembe, wa tatu kulia ni Mkuu wa Mkoa wa Pwani, Mhandisi. Evarist Ndikilo, wa pili kushoto ni Jaji Kiongozi wa Mahakama Kuu ya Tanzania, Mhe. Ferdinand Wambali, wa pili kulia ni Naibu Waziri wa Fedha na Mipango, Dkt. Ashatu Kijaji, wa kwanza kushoto ni Bi. Bella Bird, Mkurugenzi Mkazi wa Benki ya Dunia na wa kwanza kulia ni Mwakilishi kutoka Benki ya Dunia.

Meza Kuu ikiwa katika picha ya pamoja na Maafisa wa Kada mbalimbali wa Mahakama mbele ya jengo jipya la Mahakama ya Hakimu Mkazi na Mahakama ya Wilaya ya Kibaha ambalo Mhe.Waziri Mkuu amelinzidua pia katika hafla hiyo.

Meza Kuu ikiwa katika picha ya pamoja na Viongozi wa Chama cha Mapinduzi na baadhi ya wananchi wengine waliohudhuria katika hafla hiyo.

TAASISI ZA SERIKALI ZATAKIWA KUIGA MFANO WA MAHAKAMA- WAZIRI MKUU

Na Mwandishi, MAHAKAMA YA TANZANIA

Waziri Mkuu wa Jamhuri ya Muungano wa Tanzania Mheshimiwa Kassim Majaliwa amezitaka Taasisi za serikali kuiga mfano wa Mahakama ya Tanzania katika kuwapatia wananchi huduma bora na kwa wakati.

Akizindua Mpango Mkakati wa miaka mitano pamoja na Mradi wa Maboresho ya huduma za Mahakama, Waziri Mkuu ameipongeza Mahakama ya Tanzania kwa kufanikisha uandaaji wa Mpango Mkakati unaolenga katika kuimarisha Utawala bora, Upatikanaji na utoaji wa haki kwa wakati pamoja na kuimarisha imani kwa wananchi na Ushirikishwaji wa wadau katika shughuli za mahakama.

Alisema Mpango Mkakati wa Mhimili huu si tu kwamba ni muhimu kwa Mahakama bali pia ni muhimu kwa Serikali na watanzania wote kwa ujumla kwa kuwa umelenga katika kuboresha huduma zinazotolewa na Mahakama katika ngazi zote nchini na kuzisogeza karibu na wananchi.

Waziri Mkuu alisema azma ya Mahakama ya kuandaa Mpango Mkakati inakwenda sambamba na malengo ya Serikali ya kudhamiria kuimarisha mfumo wa utoaji haki kwa kufanya maboresho katika utendaji wa vyombo vya maamuzi ikiwemo Mahakama.

Aidha, Waziri Mkuu ameishukuru Benki ya Dunia kwa kukubali kuikopesha Tanzania kiasi cha shilingi bilioni 141 zitakazosaidia kuboresha Huduma za Mahakama katika kipindi cha miaka mitano. Aliihakikishia Benki ya Dunia kuwa Serikali kupitia Mahakama itatumia fedha hizo kwa uangalifu na uaminifu ili kufikia malengo yaliyokusudiwa.

Naye Jaji Mkuu wa Tanzania, Mheshimiwa Mohamed Chande Othman amesema Mahakama ya Tanzania imejipanga kuhakikisha inaongeza idadi ya mahakama zake ili kuondokana na tatizo la upungufu wa mahakama katika ngazi zote.

Akizungumza wakati wa uzinduzi wa Mpango Mkakati wa Miaka mitano wa Mahakama ya Tanzania na Mradi wa Maboresho ya Huduma za Mahakama, Jaji Mkuu alisema katika kipindi cha miaka mitano, Mahakama inatarajia kujenga majengo ya mahakama Kuu 5 hadi 7 ili kupunguza umbali wa upatikanaji wa huduma hiyo kwa mikoa isiyo na Mahakama Kuu.

Aliitaja mikoa isiyokuwa na Mahakama kuu kuwa ni Lindi, Katavi, Geita, Simiyu, Njombe, na Songwe. Mingine ni pamoja na Singida, Manyara, Pwani na Morogoro.  Aliongeza kuwa kati ya mikoa 25 ya Tanzania Bara ni mikoa 14 tu ndiyo yenye Mahakama kuu mpaka sasa.

Kwa upande wa Mahakama za wilaya, mahakama itakuwa na uwezo wa kujenga mahakama kati ya 30-40, mahakama za hakimu Mkazi kati ya 5-8 na aina mbalimbali za mahakama za Mwanzo kati ya 70-100 katika kipindi cha mwaka mmoja kwa kutumia teknolojia ya ujenzi ya kisasa.

Akizungumzia upatikanaji na utoaji wa haki kwa wakati, Jaji Mkuu alisema hadi kufikia Agosti 30, mwaka huu. Mahakama kwa ngazi zote , imefanikiwa ndani ya miaka mitatu kufikia lengo la kuwa na mashauri asilimia 80 ya mashauri yenye umri unaokubalika kimataifa wa kati ya miezi 6-24.

Alisema, katika mwaka wa fedha wa 2016/2017 mahakama inalenga kuondoa mashauri yote ya zaidi ya miezi 3-6 kwa Mahakama za Mwanzo, Wilaya na zile za Hakimu Mkazi (Mkoa) ili kuwa na asilimia 90 ya mashauri yote yaliyoko kwenye ngazi hizo za Mahakama yawe ndani ya miezi 3-6. Aliongeza kuwa nguvu nyingi inaelekezwa huko kwa kuwa ndiko kwenye watanzania zaidi ya asilimia 80.

Mpango Mkakati wa Mahakama ya Tanzania ni mwongozo wa kuhakikisha mikakati ya Taasisi inatekelezwa ili kufikia Dira ya Mahakama yenye lengo kuu la kuifanya Mahakama iendelee kutoa huduma zinazolenga upatikanaji wa haki sawa kwa wote na kwa wakati.

Mpango huu utatekelezwa Katika kipindi cha miaka mitano 2015/16- 2019/2020 kwa kufuata nguzo tatu ambazo ni Utawala na Menejimenti bora ya Rasilimali, Upatikanaji na utoaji wa Haki kwa wakati na kuimarisha imani ya Jamii na Ushirikishaji wa wadau katika shughuli za Mahakama.