JAJI MKUU WA AUSTRALIA YA KUSINI AWASILI NCHINI KWA ZIARA YA SIKU TATU.

1   Jaji Mkuu wa Australia Kusini, Mhe. Christopher Kourakis (katikati), akiongea jambo na Jaji Mkuu wa Tanzania, Mhe. Mohamed Chande Othman katika ofisi ya Mhe. Jaji Mkuu wa Tanzania, Mhe. Jaji Kourakis yupo nchini kwa ziara ya siku tatu lengo likiwa ni kujenga ushirikiano katika utendaji wa Mahakama. Kushoto ni Bi. Emma Gorman, Katibu wa Jaji Mkuu wa Australia Kusini.

   Jaji Mkuu wa Australia Kusini akisoma kitabu kinachohusu Chama cha Majaji Wanawake Tanzania alipotembelea ofisini kwa Mwenyeji wake ambaye ni Jaji Mkuu wa Tanzania, Mhe. Mohamed Chande Othman.

    Mtendaji Mkuu wa Mahakama ya Tanzania, Bw. Hussein Kattanga (katikati), Bi. Katarina Revocati (wa kwanza kulia),  wakiwa kikao cha mazungumzo kati ya Jaji Mkuu wa Tanzania pamoja na Jaji Mkuu wa Australia Kusini mapema tarehe 05.10.2016.

    Jaji Mkuu wa Tanzania, Mhe. Mohamed Chande Othman akisisitiza jambo katika mazungumzo baina yake na Jaji Mkuu wa Australia Kusini, Mhe. Christopher Kourakis.

        Wakiendelea na mazungumzo.

     Jaji Mkuu wa Tanzania, Mhe. Mohamed Chande Othman akizungumza jambo mbele ya baadhi ya Wahe.Majaji wa Mahakama ya Rufani na Watendaji wa Mahakama, katika mkutano huo, Mhe. Jaji Mkuu wa Australia Kusini . Katika mkutano huo Mhe. Jaji Mkuu wa Australia ya Kusini pia  alizungumza na  Majaji hao masuala mbalimbali yahusuyo Mahakama.

     Jaji Mkuu wa Tanzania, Mhe. Mohamed Chande Othman (katikati), Jaji Mkuu wa Australia Kusini, Mhe. Christopher Kourakis (wa pili kushoto) wakiwa katika picha ya pamoja na baadhi ya Majaji wa Mahakama ya Rufani mara baada ya kuzungumza nao.

    Jaji Mkuu wa Tanzania, Mhe. Mohamed Chande Othman (katikati), Jaji Mkuu wa Australia Kusini, Mhe. Christopher Kourakis (wa pili kushoto) wakiwa katika picha ya pamoja na baadhi ya Majaji wa Mahakama ya Rufani na Watendaji wa Mahakama ya Tanzania.

J  Jaji Mkuu wa Australia Kusini, Mhe. Christopher Kourakis akisisitiza jambo alipokuwa katika mkutano wa pamoja kati yake, Jaji Mkuu wa Tanzania pamoja na waandishi wa habari,katika mkutano huo alizungumzia juu ya umuhimu wa maboresho ya Mahakama pamoja na kupeana uzoefu juu ya masuala ya Mahakama baina ya nchi hizo mbili.

    Jaji Mkuu wa Tanzania, Mhe. Mohamed Chande Othman akizungumza jambo katika Mkutano na Waandishi wa Habari, wa kwanza kushoto ni Jaji Mkuu wa Australia Kusini, Mhe. Christopher Kourakis na kulia ni Msajili Mahakama ya Rufani, Mhe. John Kahyoza.

1      Baadhi ya Waandishi wa Habari wakiwa katika mkutano huo.

   Waandishi wa Habari na baadhi ya Maafisa wa Mahakama wakiwa katika mkutano    huo.

Msajili, Mahakama Kuu ya Tanzania, Mhe. Ilvin Mugeta akitoa ufafanuzi juu ya shughuli mbalimbali za kimasjala pindi Jaji Mkuu wa Australia Kusini alipotembelea Masjala hiyo ya wazi iliyopo Mahakama Kuu, Kanda ya Dar es Salaam.

 Msajili, Mahakama Kuu ya Tanzania, Mhe.Ilvin Mugeta akimuonyesha Jaji Mkuu wa  Australia Kusini, Mhe. Christopher Kourakis sehemu ya Mapokezi ya Mahakama Kuu ambapo watu wenye kesi mbalimbali hupata msaada wa nini cha kufanya kuhusiana na taratibu za Kimahakama, wa kwanza kushoto ni Jaji Kiongozi wa Mahakama Kuu ya Tanzania, Mhe. Ferdinand Wambali.

Jaji Kiongozi wa Mahakama Kuu ya Tanzania, Mhe. Ferdinand Wambali akifafanua kitu walipokuwa katika moja ya kumbi za Mahakama Kuu, Kanda ya Dar es Salaam.

 Jaji Kiongozi akiongeza jambo na baadhi ya Majaji wa Mahakama Kuu ya Tanzania walipokuwa kwenye Mkutano pamoja na Jaji Mkuu wa Australia Kusini, Mhe. Christopher Kourakis.

      Jaji Mkuu wa Australia Kusini, Mhe. Christopher Kourakis (katikati), Jaji Kiongozi     wa Mahakama Kuu ya Tanzania, Mhe. Ferdinand Wambali wakiwa katika picha ya pamoja na Wahe.Majaji wa Mahakama Kuu mara baada ya mazungumzo.

TEKNOLOJIA YA KISASA KUTUMIKA KUENDESHA MASHAURI MAHAKAMANI
 Na Lydia Churi- Mahakama 

Mahakama ya Tanzania inakusudia kushirikiana na Mahakama ya Australia ya Kusini katika teknolojia za kuendesha mashauri mahakamani ili kutekeleza jukumu lake la msingi la kutoa Haki sawa kwa wote na kwa wakati.

Akizungumzia ziara ya Jaji Mkuu wa Australia ya Kusini Mheshimiwa Christopher Kourakis iliyoanza leo nchini, Jaji Mkuu wa Tanzania Mheshimiwa Mohamed Chande Othman amesema ziara ya kiongozi huyo inalenga kuimarisha na kujenga ushirikiano katika maeneo matatu likiwemo eneo la teknolojia ya kuendesha mashauri mahakamani.

Alisema Australia ya Kusini inaendesha mashauri mahakamani kwa kutumia teknolojia ya kisasa hivyo Mahakama ya Tanzania haina budi kuhama kutoka mifumo ya kuendesha mahakama kwa mkono kwenda kwenye teknolojia ya kidijiti.

Alisema Mahakama inakusudia kuwapeleka wasajili na watendaji wa mahakama nchini Australia ya Kusini ili wakajifunze mifumo hiyo kwa ajili ya kuanza kuitumia kuendeshea mahakama za Tanzania. 

Aliyataja maeneo mengine ya ushirikiano kuwa ni eneo la utoaji wa mafunzo kwa Majaji, Mahakimu na Wasajili wa Mahakama ya Tanzania huku akisema eneo la tatu ni la namna ya kuanzisha Kada mpya ya Wapiga Chapa Maalum wa Mahakama watakaokuwa wakitumia mashine ndogo inayochapa wakati mashauri yakiendelea Mahakamani.

Akiielezea kada hiyo mpya, Jaji Mkuu alisema itawezesha kupatikana kwa nakala za mashauri ndani ya siku moja na kwamba watumishi hao ni tofauti na makatibu Muhtasi ambapo mishahara yao itakuwa ni mikubwa kuliko ile ya Makatibu Muhtasi.

Naye Jaji Mkuu wa Australia ya Kusini alisema Mahakama za nchini kwake zinaendesha mashauri kwa kutumia teknolojia ya kisasa ya kidijiti hivyo nchi yake itashirikiana na  Tanzania ili nayo iweze kuendesha mashauri mahakamani kwa kutumia teknolojia ya kisasa.

 Akizungumzia kuhusu adhabu ya kifo kwa watuhumiwa wa kesi za mauaji nchini Australia ya Kusini, Mheshimiwa Kourakis alisema adhabu hiyo iliondolewa kutokana na sababu mbalimbali zikiwemo msukumo wa Haki za Binadamu.

 Alisema nchi yake pia ina mfumo ambapo endapo mtuhumiwa wa mauaji atakiri kosa ndani ya wiki sita basi atapunguziwa adhabu yake kwa asilimia 40. Aliongeza kuwa adhabu ya kifo nchini kwake ni kifungo cha maisha na endapo atakiri kosa atapunguziwa adhabu. Kiwango cha chini cha adhabu ya kifo ni kifungo cha miaka 20 jela.

Jaji Mkuu wa Australia ya Kusini leo ameanza ziara ya kikazi ya siku tatu nchini ambapo ametembelea Mahakama ya Rufaa na Mahakama Kuu na pia anatarajia kutembelea Mahakama ya Zanzibar.