FUATENI MAADILI NA KUTOA HUDUMA BORA-JAJI MKUU

FUATENI MAADILI NA KUTOA HUDUMA BORA KWA WANANCHI-JAJI MKUU WA TANZANIA

Na Lydia Churi-Mahakama, Mbeya

Watumishi wa Mahakama ya Tanzania wametakiwa kufuata maadili ya kazi, kwa kuongeza nidhamu na kutoa huduma bora kwa wananchi wanaofika kutafuta haki katika mahakama mbalimbali nchini ili kuongeza imani ya juu ya utendaji wa mahakama.

Akizungumza na watumishi wa ngazi zote wa Mahakama Kuu kanda ya Mbeya, Jaji Mkuu wa Tanzania Mhe. Mohamed Chande Othman amesema Mahakama ni chombo kinachotoa huduma hivyo watumishi hao hawana budi kutoa huduma bora kwa wananchi ambao ndiyo wateja wao.

Aliwataka watumishi hao kushughulikia malalamiko ya wananchi yanayoletwa mahakamani na kuyapatia ufumbuzi ili kuzimaliza kero na hoja mbalimbali zinazoelekezwa kwenye taasisi hiyo.

Aliongeza kuwa pamoja na watumishi kutoa huduma bora, mahakama itahakikisha inaboresha mazingira ya kazi kwa watumishi hao.

Alisema Mahakama ya Tanzania inafanya maboresho ya huduma zake ambapo tayari imeanza kukarabati majengo yaliyo katika hali mbaya na kujenga majengo mapya hasa ya mahakama za Mwanzo na wilaya ikiwa ni pamoja na  kuongeza idadi ya watumishi wa kada mbalimbali.

Kwa mujibu wa Sheria, kila wilaya inapaswa kuwa na mahakama ya wilaya. Kwa upande wa Mahakama za Mwanzo, zipo 960 tu wakati mahitaji ni kuwa na mahakama za mwanzo katika kila kata ambapo kuna  kata zaidi ya 3000 nchi nzima.

Jaji alisema mahakama ya Tanzania tayari imeanza ujenzi wa mahakama za mfano kumi za wilaya zinazojengwa kwa kutumia teknolojia rahisi, ya muda mfupi na yenye gharama nafuu. Mahakama hizo ziko mbioni kukamilika.

Naye Jaji Mfawidhi wa Mahakama Kuu kanda ya Mbeya Mhe. Noel Chocha alisema kasi ya upunguzaji wa mlundikano wa mashauri katika Mahakama za Mwanzo zilizoko kanda ya Mbeya ni nzuri kwa kuwa mashauri yaliyobaki mahakamani ni 670 tu yenye umri wa siku moja mpaka miezi sita mahakamani. Jumla ya mashauri 12,448 yamemalizika katika mahakama za Mwanzo.

Alisema changamoto katika kanda yake ni ufinyu wa fedha inayotengwa kwa ajili ya kuendesha mashauri hali inayoweza kudumaza mfumo wa wa utoaji haki katika kanda yake.

Alisema hadi sasa, Mahakama Kuu kanda ya Mbeya inayo mashauri 177 ya madai, 398 yanayohusu migogoro ya Ardhi na 394 ni mashauri ya jinai.

Jaji Mkuu wa Tanzania leo amehitimisha ziara ya siku mbili kwa Mahakama Kuu kanda ya Sumbawanga pamoja na kanda ya Mbeya ambapo alikagua shughuli za Mahakama kwenye kanda hizo.