SERIKALI KUSOGEZA HUDUMA ZA MAHAKAMA KARIBU ZAIDI NA WANANCHI-MWAKYEMBE

Na Lydia Churi-Mahakama

Waziri wa Katiba na Sheria Mhe. Dkt. Harrison Mwakyembe amesema Serikali kupitia Mahakama ya Tanzania iko kwenye mkakati wa kusogeza huduma za mahakama karibu zaidi na wananchi ili kuwapatia haki kwa wakati.

Waziri Mwakyembe ameyasema hayo leo jijini Dar es salaam wakati akikagua maendeleo ya ujenzi wa jengo la Mahakama ya Mwanzo Kigamboni linaloendelea kujengwa kwa kutumia teknolojia ya gharama nafuu ya Moladi.

Alisema kuwa mpango wa Serikali ni kujenga Mahakama nyingi katika ngazi zote na hasa Mahakama za Mwanzo ambazo zinatakiwa kuwepo kwenye kila kata hapa nchini. Kwa mujibu wa waziri huyo, idadi ya Mahakama za Mwanzo mpaka ni 960 tu wakati kuna kata zaidi ya 3000.

Akizungumzia kasi ya upunguzaji wa mlundikano wa kesi mahakamani, Waziri Mwakyembe alisema Mahakama ya Tanzania kupitia mpango mkakati wake wa miaka mitano inalenga kupunguza idadi ya kesi za zamani zilizopo kwenye mahakama mbalimbali nchini.

“Alisema asilimia 60 ya kesi zilizopo kwenye mahakama zetu ni zile za zamani na kwa sasa tumefanikiwa kuzipunguza kesi hizi na kubaki asilimia 15 tu”, alisema Waziri huyo.

Kuhusu suala la rushwa mahakamani, Mhe. Mwakyembe alisema Wizara yake iko kwenye mapambano makali dhidi ya vitendo hivyo ambapo hivi karibuni imepeleka bungeni Muswada wa Sheria ya kumlinda mtoa taarifa ili wananchi wengi zaidi waweze kutoa taarifa za vitendo hivyo bila hofu yoyote juu ya usalama wao. 

Naye Mbunge wa Kigamboni Mhe. Faustine Ndungulile ambaye pia alifuatana na Waziri Mwakyembe katika ukaguzi wa jengo la mahakama aliishukuru Mahakama ya Tanzania kwa kujenga mahakama ya kisasa Kigamboni ambayo itasaidia kusogeza karibu huduma za mahakama hasa kwa wananchi wanaoishi pembezoni mwa Kigamboni.

Akitolea mfano wananchi wa eneo la Pemba Mnazi ambalo lipo umbali wa zaidi ya kilometa 70 kutoka mahali inapojengwa Mahakama hiyo kuwa sasa wataweza kujua haki zao kupitia huduma zinazotelewa na mahakama.

Alisema wananchi wa jimbo la Kigamboni wanakabiliwa na changamoto kadhaa zikiwemo zile za mashauri kusikilizwa kwa muda mrefu, na vitendo vya rushwa kwa baadhi ya watumishi wa Mahakama wasio waaminifu. 

Jengo la Mahakama ya Mwanzo Kigamboni linalojengwa kisasa zaidi na kwa kutumia teknolojia yenye gharama nafuu linatarajiwa kukamilika ifikapo Februari mwakani. 

Waziri wa Katiba na Sheria Mhe. Dkt. Harrison mwakyembe (Kushoto) akizungumza na Mbunge wa Kigamboni Mhe. Faustine Ndunguulile wakati walipotembelea Mahakama ya Mwanzo ya Kigamboni ili kukagua ujenzi wa Mahakama hiyo jana jijini Dar es salaam

Mtendaji wa Mahakama Kuu ya Tanzania Ndugu Solanus Nyimbi akimwelezea jambo waziri wa Katiba na Sheria Mhe. Dkt. Harrison Mwakyembe wakati alipotembelea Mahakama ya Mwanzo ya Kigamboni ili kukagua ujenzi wa Mahakama hiyo jana jijini Dar es salaam. Kulia ni Mbunge wa jimbo la Kigamboni Mhe. Faustine Ndungulile.

 Waziri wa Katiba na Sheria Mhe. Dkt. Harrison mwakyembe akielezea jambo wakati alipotembelea Mahakama ya Mwanzo ya Kigamboni ili kukagua ujenzi wa Mahakama hiyo jana jijini Dar es salaam mwenye shati la kijani ni Mbunge wa Kigamboni Mhe. Faustine Ndungulile.