MAADHIMISHO YA WIKI YA SHERIA NCHINI KUANZA JANUARI 28, MWAKA HUU.

Na Mary Gwera,

Mahakama ya Tanzania

KAIMU Jaji Mkuu wa Tanzania, Mhe. Prof. Ibrahim Juma amewataka wananchi wote nchini kutembelea katika Maonyesho ya Wiki ya Sheria 2017, ili kuwawezesha kupata utatuzi na uelewa zaidi juu ya masuala mbalimbali ya kisheria.

Alisema hayo mapema leo Januari 26, 2017 katika Ukumbi wa Maktaba, Mahakama ya Rufani (T), Dar es Salaam alipokuwa akiongea na Waandishi wa Habari juu ya kuanza rasmi kwa Maonyesho ya Wiki ya Sheria nchini yatakayoanza rasmi Januari 28, 2017 hadi Februari 01, 2017.

Alisema kuwa Maonyesho haya yatafunguliwa rasmi Februari, 29 mwaka huu kwa matembezi maalum yatakayoongozwa na Rais Mstaafu wa awamu ya pili, Mhe. Alhaji Ali Hassan Mwinyi na kuongeza kuwa kilele cha wiki ya Sheria na Siku ya Sheria nchini kitahitimishwa Februari 02, ambapo, Rais wa Jamhuri ya Muungano wa Tanzania, Mhe. Dkt. John Pombe Magufuli atakuwa Mgeni Rasmi.

“Kama sehemu ya Maadhimisho hayo, Mahakama ya Tanzania itatoa elimu ya Sheria, elimu hii itatolewa sehemu mbalimbali nchini kote ambapo watakuwepo Wataalam wa Sheria wakiwa tayari kuwahudumia wananchi,” alisema Mhe. Kaimu Jaji Mkuu.

Aliongeza kuwa katika kufanikisha maadhimisho haya, Mahakama kama mwenyeji wa shughuli hii itakuwa ndio Mratibu Mkuu wa kuhakikisha kuwa lengo na madhumuni ya kuanzisha elimu ya sheria yanafanikiwa ipasavyo, kwa kuwashirikisha wadau wengi wanaojihusisha na masuala ya Sheria.

Aliwataja wadau hao kuwa ni Mahakama yenyewe kama mwenyeji, Tume ya Utumishi wa  Mahakama, Mahakama Kuu Zanzibar, Ofisi ya Mwanasheria Mkuu wa Mahakama (AGC), Ofisi ya Mkurugenzi wa Mashitaka (DPP), Mkemia Mkuu wa Serikali, Chuo cha Uongozi wa Mahakama IJA, Mkuu wa Kitivo cha Sheria, Chuo Kikuu Huria, Tume ya Haki za Binadamu na Utawala Bora.

Wengine ni Tume ya Kurekebisha Sheria , Taasisi zinazotoa msaada wa Kisheria (Legal Aid), TAKUKURU (PCCB), Polisi, Magereza, Msajili, Mabaraza ya Ardhi, TLS, Tume ya Kurekebisha Sheria, RITA, TAWJA, TAWLA, Sekretarieti ya Msaada wa Sheria, Tume ya Ususluhishi na Uamuzi (CMA), `Tanzania Network of Legal Aid Provider (TANLAP)`, Legal Aid and Human Centre na NHIF.

Kwa upande wake, Jaji Kiongozi Mahakama Kuu ya Tanzania, Mhe. Ferdinand Wambali alisema kuwa lengo kuu la Maonyesho hayo ni kujenga zaidi imani ya wananchi na wadau juu ya Mahakama.

“Maonyesho ambayo lengo lake kuu ni kurejesha imani ya wananchi dhidi ya Mahakama ambayo ni nguzo mojawapo katika Mpango Mkakati wa miaka mitano wa Mahakama ya Tanzania, hivyo basi hii ni sehemu ya utekelezaji wa Mpango huo,” alisisitiza Mhe. Wambali.     

Mhe. Jaji Kiongozi aliongeza kuwa katika maonyesho hayo wananchi watapatiwa pia elimu juu ya utatuzi wa migogoro kwa njia mbadala (ADR).

Naye, Msajili Mkuu, Mahakama ya Tanzania, Mhe. Katarina Revocati alizitaja huduma zitakazotolewa kuwa ni pamoja na Taratibu za ufunguaji mashauri katika ngazi mbalimbali za Mahakama, kuanzia Mahakama za Mwanzo hadi Rufaa.

Huduma nyingine ni Taratibu za Kesi za Mirathi, taratibu za dhamana, Taratibu za Rufaa, ndoa na talaka, Taratibu za kupokea na kushughulikia malalamiko na Msaada wa Kisheria (Legal Aid).

Mahakama ya Tanzania huadhimisha Siku ya Sheria nchini kila mwaka ambayo inaashiria mwanzo wa shughuli za Mahakama kwa mwaka husika, maudhui ya Maadhimisho ya Wiki ya Sheria na Siku ya Sheria nchini kwa mwaka huu ni ‘Umuhimu wa Utoaji Haki kwa wakati kuwezesha Ukuaji wa Uchumi.’                                                  

Kaimu Jaji Mkuu wa Tanzania, Mhe. Profesa Jaji Ibrahim  Juma (katikati) akizungumza na waandishi wa habari (hawapo pichani) leo  kuhusu Maadhimisho ya Wiki ya Sheria nchini yatakayoanza Januari 28, mwaka huu yanayoashiria kuanza kwa  Mwaka  wa  Mpya wa Shughuli za Mahakama   yatakayofanyika katika viwanja vya Mnazi Mmoja jijini Dar es Salaam. Maadhimisho  hayo  yatazinduliwa  Januari 29, mwaka huu kwa matembezi ya hiari na  kilele chake  kitakuwa  Januari 2,mwaka huu. Kushoto ni Jaji Kiongozi, Mhe. Ferdinand Wambali na (kulia) ni Msajili Mkuu wa Mahakama ya Tanzania, Mhe. Katarina Revocati.

Jaji Kiongozi, Mhe. Ferdinand Wambali (kushoto)  akifafanua jambo kuhusu shughuli mbalimbali  zinazofanywa na Mahakama ya Tanzania na (kulia) ni Kaimu Jaji Mkuu, wa Tanzania, Mhe.Profesa Jaji Ibrahim   Juma.

Msajili Mkuu wa Mahakama ya Tanzania, Mhe. Katarina  Revocati (kulia) akizungumza  jambo na baadhi ya  waandishi  wa habari  (hawapo pichani) kuhusu  Maadhimisho  ya Wiki ya Sheria   nchini na  Kaimu Jaji Mkuu,  Jaji Mkuu wa Tanzania, Mhe.Profesa Jaji Ibrahim  Juma (katikati) na (kushoto ) ni Jaji Kiongozi, Mhe. Ferdinand Wambali.