WATUMISHI WA MAHAKAMA PWANI WAPONGEZWA

Na Rashidi Haji-Mahakama Kibaha

Watumishi wa Mahakama ya Hakimu Mkazi Mkoa wa Pwani na Mahakama ya Wilaya ya Kibaha wamepongezwa kwa kuendelea kulitunza vizuri jengo jipya walilokabidhiwa hivi karibuni na kulitumia kama chachu ya kuwafanya waongeze juhudi katika utendaji kazi.  

Akizungumza na watumishi hao wakati wa ziara yake ya kikazi katika Mkoa wa Pwani, Jaji Mfawidhi wa Mahakama Kuu kanda ya Dar es salaam Mhe. Lugano Mwandambo alisema ni vizuri jengo hilo likatunzwa ili lidumu na kuwasaidia wananchi katika kupata haki zao.

 

 Jaji Mfawidhi wa Mahakama Kuu kanda ya Dar es salaam Mhe. Lugano Mwandambo akizungumza na watumishi wa Mahakama ya Hakimu Mkazi mkoa wa Pwani na Mahakama ya Wilaya ya Kibaha alipofanya ziara ya kikazi katika mkoa wa Pwani.

 

Katika ziara yake aliyoambatana na Msajili wa Mahakama hiyo pamoja na Afisa Utumishi, Jaji Mfawidhi huyo pia alipata nafasi ya kutembelea na kukagua shughuli za Mahakama katika Mahakama zote za Mwanzo zilizopo kwenye  wilaya ya Kibaha.

 

Jengo la Mahakama ya Hakimu Mkazi Mkoa wa Pwani na Mahakama ya wilaya ya Kibaha ni miongoni mwa majengo ya mfano yanayojengwa na Mahakama kwa kutumia teknolojia ya gharama nafuu na ya muda mfupi ijulikanayo kama Moladi.

 

Mahakama nyingine za mfano zinajengwa katika maeneo ya Kinyerezi, Kigamboni, Kawe, Mkuranga, na Bagamoyo. Majengo haya yanatarajiwa kukamilika hivi karibuni.   

 

Aidha, ujenzi wa majengo haya unalenga katika kusogeza huduma za Mahakama karibu zaidi na wananchi na kurahisisha upatikanaji wa haki kwa wakati ambao ndiyo jukumu la msingi la kikatiba la Mahakama ya Tanzania.

 

Jengo la Mahakama lililoko mjini Kibaha lilizinduliwa rasmi Septemba mwaka jana na Waziri Mkuu wa Jamhuri ya Muungano wa Tanzania Mhe. Kassim Majaliwa wakati akizindua Mpango Mkakati wa Miaka mitano (2015-2020) wa Mahakama ya Tanzania pamoja na Maboresho ya Huduma za Mahakama.  

 Watumishi wa Mahakama ya Hakimu Mkazi Pwani na wa Mahakama ya wilaya ya Kibaha wakimsikiliza Jaji Mfawidhi wa Mahakama Kuu Kanda ya Dar es Salaam Mhe. Lugano Mwandambo(hayupo pichani) akizungumza nao alipofanya ziara mkoa wa Pwani hivi karibuni. 

Hakimu Mkazi Mfawidhi wa Mahakama ya Hakimu Mkazi Pwani Mhe. Elizabeth Nyembele akimkaribisha Jaji Mfawidhi wa Mahakama Kuu kanda ya Dar es salaam Mhe. Lugano Mwandambo ili azungumze na watumishi wa Mahakama ya Hakimu Mkazi mkoa wa Pwani na Mahakama ya Wilaya ya Kibaha

Jaji Mfawidhi wa Mahakama ya Kuu kanda ya Dar es salaam Mhe. Lugano Mwandambo (wa tatu kulia mbele) akiwa katika picha ya pamoja na  Watumishi wa Mahakama wa Mkoa wa Pwani akiwa kwenye ziara ya kikazi mkoani humo.