KAIMU JAJI MKUU WA TANZANIA AZINDUA JENGO LA MAHAKAMA KUU KANDA YA MBEYA

  Kaimu Jaji Mkuu wa Tanzania Mhe. Prof. Ibrahim Hamis Juma akizungumza wakati wa hafla ya uzinduzi wa jengo la Mahakama Kuu kanda ya Mbeya. Jengo hilo lilifanyiwa ukarabati Mkubwa uliogharimu zaidi ya shilingi bilioni 3.4 za kitanzania. Kazi ya ukarabati huo ilifanywa kwa ushirikiano kati ya Mahakama ya Tanzania na Benki ya Dunia ikiwa ni utekelezaji wa Mpango Mkakati wa miaka mitano (2015/2016-2019/2020) wa Mahakama

 Jaji Kiongozi wa Mahakama Kuu ya Tanzania Mhe. Ferdinand Wambali akiwasisitiza Watumishi wa Mahakama pamoja na Wananchi kufurahia tendo la Uzinduzi wa Mahakama wakati wa hafla ya uzinduzi wa jengo hilo la Mahakama Kuu kanda ya Mbeya.

   Kaimu Jaji Mkuu wa Tanzania Mhe. Prof. Ibrahim Hamis Juma akishangilia baada ya kukata utepe kuzindua jengo la Mahakama Kuu kanda ya Mbeya.

 Kaimu Jaji Mkuu wa Tanzania Mhe. Prof. Ibrahim Hamis Juma akioneshwa mfumo wa Mawasiliano uliofungwa kwa ajili ya ufuatiliaji wa Mashauri Mahakamani.

 Baadhi ya Majaji pamoja na wageni wengine waalikwa wakiangalia mfumo wa Mawasiliano kwa njia ya Video (video conferencing) unavyofanya kazi. Katika uzinduzi huo, Kaimu Jaji Mkuu alizungumza na Waziri wa katiba na Sheria moja kwa moja akiwa mjini Dodoma. Mfumo huo umewekwa kwa ajili ya kurahisisha usikilizaji wa mashauri pamoja na kupunguza mlundikano wa mashauri Mahakamani.

  Kaimu Jaji Mkuu wa Tanzania Mhe. Ibrahim Hamis Juma akizungumza na Waziri wa katiba na Sheria Mhe. Prof. Palamagamba Kabudi kupitia mfumo wa  Mawasiliano kwa njia ya Video -video conferencing, (haupo pichani) wakati wa uzinduzi wa jengo la Mahakama Kuu kanda ya Mbeya.

Kikundi cha kwaya maalum ya Watumishi wa Mahakama kanda ya Mbeya kikiingia kutumbuiza wakati wa sherehe za uzinduzi wa wa jengo la Mahakama Kuu kanda ya Mbeya.

Kiongozi wa Dini ya kikristo wa Dhehebu la Anglican akiwakilisha viongozi wengine wa kikristo katika kuombea jengo la Mahakama Kuu kanda ya Mbeya lililozinduliwa na Mhe. kaimu Jaji Mkuu wa Tanzania Prof. Ibrahim Hamis Juma jijini Mbeya.   

Kiongozi wa Dini Kiislamu akiomba dua kwa ajili ya jengo la Mahakama Kuu kanda ya Mbeya lililozinduliwa na Mhe. kaimu Jaji Mkuu wa Tanzania Prof. Ibrahim Hamis Juma jijini Mbeya.   

KITUO JUMUISHI CHA UTOAJI HAKI CHAZINDULIWA MBEYA

Na Lydia Churi-Mahakama Mbeya

Kaimu Jaji Mkuu wa Tanzania Mhe. Prof. Ibrahim Hamis Juma amezindua jengo la Mahakama kuu ya Tanzania kanda ya Mbeya ambayo inakuwa ni Mahakama kuu ya kwanza nchini kufanya kazi kama kituo jumuishi cha utoaji wa huduma za Mahakama.

Jengo la Mahakama Kuu ya Mbeya lilifanyiwa ukarabati mkubwa ambapo baada ya kukamilika kwa ukarabati huo, hivi sasa jengo hilo linajumuisha pia ofisi za wadau wa mahakama wakiwemo  Polisi, Magereza, na Ustawi wa Jamii ili kurahisisha kazi ya utoaji haki.

Akizindua jengo hilo mwishoni mwa wiki jijini Mbeya, Kaimu Jaji Mkuu alisema maboresho ya jengo hilo ni hatua ya utekelezaji wa Mpango Mkakati wa miaka mitano (2015/16-2019/20) wa Mahakama ya Tanzania ambao moja ya nguzo zake ni kusogeza huduma za mahakama karibu zaidi na wananchi.  

Alisema pamoja na kuboreshwa kwa huduma za mahakama bado wananchi watapenda kuona wanahudumiwa na watumishi wanaofuata maadili ya kazi zao hivyo aliwataka watumishi wa mahakama nchini kuhakikisha wanatekeleza wajibu wao ipasavyo kwa kutanguliza mbele utu.

Kaimu Jaji Mkuu alisema kuzinduliwa kwa jengo hilo ni ishara kuwa mahakama ya Tanzania inabadilika na kuachana na ujenzi wa kizamani wa majengo yake ambapo alisema sasa Mhimili huo unajenga majengo yanayozingatia matumizi ya teknolojia ya habari na mawasilianoa (TEHAMA) pia ambayo yatatoa nafasi kwa wadau wa Mahakama kuweka ofisi zao ili kurahisisha suala la utaoji haki.  

Aidha, Jaji Mkuu ameiomba serikali kutenga fedha kwa ajili ya uanzishwaji wa mahakama pale inapoanzisha maeneo mapya ya kiutawala zikiwemo wilaya na mikoa ili kuisaidia mahakama kuendelea kusogeza huduma zake karibu zaidi na wananchi.

Aliwaomba Wakuu wote wa mikoa nchini pamoja na wakuu wa wilaya kuwa sehemu ya maboresho ya Mahakama kwa kuwa wanategemewa kuratibu ustawi wa maendeleo ya wananchi hivyo basi viongozi hao hawana budi kusimamia ipasavyo suala la amani kwa kutatua migogoro katika jamii.

Kaimu Jaji Mkuu pia aliishukuru Benki ya Dunia kwa mchango wake katika ujenzi wa mahakama nchini. Alisema hivi sasa Taasisi hiyo imetoa wazo la kuanzishwa kwa Mahakama zinazotembea (Mobile Courts ili kutimiza azma yake ya kusogeza karibu huduma za mahakama kwa wananchi.  

Jengo la mahakama Kuu kanda ya Mbeya lilianza kufanyiwa ukarabati Februari 2016 na kukamilika mwezi Aprili mwaka huu uliogharimu zaidi ya shilingi bilioni 3.4 ikiwa ni pamoja na kufungwa kwa mifumo ya kisasa (video conferencing) ili kurahisisha utendaji kazi na kumaliza mashauri kwa wakati.