MAHAKAMA YA TANZANIA YASHIKA NAFASI YA TATU KATIKA TAASISI ZA SERIKALI.

Na Magreth Kinabo
Mahakama ya Tanzania imeshika nafasi ya tatu katika daraja  lililohusisha   taasisi za serikali  zinazotoa huduma zilizoshiriki  kwenye  Maonyesho ya  41 ya  Biashara ya Kimataifa yanayoendelea  katika Viwanja  vya  sabasaba  vya  Mwalimu Julius Nyerere jijini Dar es Salaam, vilivyoko Barabara ya Kilwa.

Washindi wa Maonesho hayo walitangazwa wakati wa uzinduzi rasmi wa Maonesho  uliofanywa na Rais wa Jamhuri ya Muungano wa Tanzania Mhe. Dkt. John Pombe Magufuli  leo katika viwanja vya sabasaba.

Aidha, katika Maonesho hayo, nafasi ya kwanza ilishikwa  na  Mamlaka ya  Vitambulisho  vya Taifa (NIDA).

Akizungumzia kuhusu ushindi wa nafasi hiyo, kwa Mahakama  ya Tanzania, Mmoja wa Waoneshaji kwenye Banda la Mahakama ya Tanzania, ambaye ni  Naibu Msajili  wa Mahakama Kuu Kitengo cha  Ardhi,  Mhe. Joachim Tiganga, alisema  siri ya ushindi huo ni kitendo cha mahakama kujipanga  kuanzia  Mahakama za  Mwanzo  hadi  Mahakama  ya Rufani.

Aliongeza  kwamba jambo lingine lililosaidia ushindi huo,  ni   Mahakama kujipanga  pamoja  na  Divisheni  zake zote nne yaani  Mahakama Kuu  Divisheni ya  Ardhi, Mahakama  Kuu  Divisheni ya  Biashara, Mahakama Kuu Divisheni  ya Makosa  ya  Rushwa na Uhujumu Uchumi na Mahakama Kuu Divisheni ya Kazi.  

"Tuna pia  wawakilishi wa Mahakama za Mikoa,  Mahakama za Wilaya  na Mahakama ya Hakimu Mkazi  Kisutu, iliyopo jijini Dar es Salaam. Tuna vitengo pia , ambavyo ni  Kitengo cha  Usuluhishi cha Mahakama Kuu, Kitengo  cha Mirathi, Kitengo cha  Usimamizi  wa  Maboresho  ya   Mahakama, Kitengo cha Utawala  na Utumishi, Kitengo cha TEHAMA  na  Kurugenzi  ya   Malalamiko na Maadili, alifafanua Mhe. Tiganga.

Aliongeza kwamba  jambo lingine lililochangia ushindi huo,  ni kuwepo kwa taarifa  sahihi  kwenye kumbukumbu za Mahakama ya Tanzania.

“ Tumemwezesha kila mtu  yoyote  mwenye shida anawe za  kupata majibu ya hoja  yake  katika Banda la Mahakama ya Tanzania , Mfano  Mfumo  wa Kusajili  kesi Kielekroniki. Kila  banda  linasimamiwa  na mtu  nafasi  ya weledi wa kutosha  na TEHAMA, na Mkurugenzi ” alisisitiza Tiganga.

Wadau  wanaoshiriki katika  banda la  Mahakama ya Tanzania, ni Chama   cha Mawakili Tanzania(TLS), Chuo cha Mahakama Lushoto, Chama cha Majaji Wanawake  (TAWJA), Tume  ya  Kurekebisha Sheria  na Kamisheni ya Usuluhishi.    



Msajili wa Mahakama  ya Rufani Tanzania, Mhe. John Kahyoza  akizungumza  na Afisa Kumbukumu Victor  Bashaka  kutoka  Mahakama Kuu  Divisheni ya Kazi  katika banda la   Mahakama ya Tanzania lililopo  kwenye  Maonyesho  ya 41 ya Biashara ya Kimataifa yanayoendelea  katika  Viwanja  vya  sabasaba  vya  Mwalimu Julius Nyerere jijini Dar es Salaam.

Afisa TEHAMA wa Mahakama Kuu ya Tanzania, Ahmed  Mbilinyi akifafanua masuala kuhusu taaluma  hiyo kwa baadhi ya wananchi waliotembelea  banda la Mahakama ya Tanzania, Kitengo cha TEHAMA. 
 

  Naibu Msajili wa  Mahakama  Kuu  Kanda ya Dar es Salaam inayojumuisha mikoa ya  Dar es Salaam, Pwani na Morogoro,  Mhe. Ruth Betwel Massam.   akifafanua kuhusu shughuli za zinazofanywa na kanda hiyo kwa   mwananchi, Theresia Mlay (aliyesimama), kwenye Maonyesho  ya 41 ya  Biashara  ya Kimataifa yanayoendelea  katika Viwanja  vya  sabasaba  vya  Mwalimu Julius Nyerere jijini, Dar es Salaam.

Hakimu Mkazi wa Mahakama ya Wilaya ya Kinondoni, Hanifa Mwingira akiwaelezea  baadhi ya wananchi kuhusu  namna ya kuandika wosia katika banda la   Mahakama ya Tanzania lililopo   kwenye  Maonyesho  ya Biashara ya Kimataifa yanayoendelea  katika  Viwanja  vya  sabasaba  vya  Mwalimu Julius Nyerere jijini Dar es Salaam.

Msajili wa Mahakama  ya Rufani  Tanzania Mhe. John Kahyoza  akisaini kitabu mara baada ya kuwasili katika banda la  Mahakama ya Tanzania lililopo kwenye  Maonyesho  ya 41 ya  Biashara  ya Kimataifa yanayoendelea  katika Viwanja  vya  sabasaba  vya  Mwalimu Julius Nyerere jijini, Dar es Salaam anayemtazama  ni Naibu Msajili wa  Mahakama  Kuu  Kanda ya Dar es Salaam, Mhe. Ruth Betwel Massam.