MFUMO WA KUHIFADHI NA KUFUATILIA MAJALADA WA KIELEKTRONIKI WALETA TIJA MAHAKAMA.

Na  Mohamed  Ali

Mahakama Kuu Kanda ya Dar es salaam, imetekeleza mkakati wake wa kuimarisha mfumo wa ufuatiliaji na upatikanaji wa mashauri yaliyoisha, kwa kuanzisha mfumo  wa  Kielektroniki  kwa kuanzisha utunzaji wa  majalada.

Mfumo huo wa Kielektroniki ulioanzishwa ili kuboresha uhifadhi na ufuatiliaji wa majalada yaliyoisha mpaka sasa utendaji kazi wake umefanikiwa kwa kiasi kikubwa.

 Akizungumza kwa  Niaba ya Mtendaji Mkuu wa Mahakama Kuu ya Tanzania, Bw. Hussein  Kattanga, Afisa Utumishi wa Mahakama Nkurumah Katangira alisema mfumo huo wa utunzaji wa majalada ulizingatia aina za mashauri mf. Kesi za madai na jinai, vilevile kwa kuzingatia miaka mf. Kesi za madai za mwaka 2003 hadi  mwaka 2007, ili kurahisisha upatikanaji wake pindi yanapohitajika.

Limefanyika zoezi la kuyachambua majalada, kuyaorodhesha na hatimaye kuyaingiza katika mfumo wa kompyuta na kasha majalada hayo kuhifadhiwa stoo.

Aliongeza kwa kusema jumla ya maboksi 2104 yenye majalada yamehifadhiwa stoo pia maboksi 1030 yenye majalada ya muda yamehifadhiwa kwenye kontena.

Mfumo wa excel umetengenezwa ili kurahisisha upatikanaji wa majalada hivyo kitengo cha TEHAMA Mahakama Kuu Kanda ya Dar es salaam kwa pamoja walipendekeza mfumo huo uitwe ‘ARCHIVE FILES TRACKING SYSTEM’, alisema Katangira.

Akiongelea mafanikio ya mfumo huo Naibu Msajili wa Mahakama Kuu Kanda ya Dar es salaam Mhe. Ruth Massam alisema mfumo huo, umerahisisha utafutaji wa majalada kwakuwa sasa yanapangwa kwa kuzingatia miaka, aina ya kesi na namba ya kesi, pia umesaidia kujua idadi ya majalada ambayo yaliisha na hayaonekani kwa wakati.

Aidha mafanikio ya mfumo ni pamoja na kupunguza malalamiko juu ya upotevu wa majalada hasa yale ya muda mrefu lakini pia mfumo umerejesha imani ya wananchi  kwa Mahakama.

Pamoja na kufanikiwa kwa mfumo huo kwa zaidi ya 90% Katangira alikiri kukabiliwa na changamoto chache ikiwemo uelewa mdogo wa watumishi juu ya matumizi ya kompyuta pamoja na kukata kwa mtandao wa intaneti mara kwa mara hivyo kuzorotesha utendaji kazi wa mfumo huo.

Aidha kutokurejeshwa kwa majalada pindi yanapotoka stoo kwa ajili ya matumizi mbalimbali.

Afisa  Utumishi wa Mahakama Kuu ya Dar  es Salaam, Nkurumah  Katangira(aliyevaa shati la bluu) akitoa  taarifa  ya utekelezaji  wa  Maboresho  ya  Mfumo  wa Kuhifadhia  na  kufuatilia  majalada  ya mashauri   yaliyoisha  kwa kutumia mfumo  wa kielektroniki  kwa Watumishi  wa Mahakama Kuu  Kanda ya Mbeya.