TANZANIA KUWA MWENYEJI WA MKUTANO CHAMA CHA MAJAJI NA MAHAKIMU WA JUMUIYA YA MADOLA

Na Lydia Churi-Mahakama

Tanzania kwa mara ya kwanza inatarajiwa kuwa mwenyeji wa Mkutano wa mwaka wa Chama cha Majaji na Mahakimu wa Jumuia ya Madola ambao utafunguliwa na Makamu wa Rais wa Jamhuri ya Muungano wa Tanzania Mhe. Samia Suluhu Hassan Septemba 25 mwaka huu jijini Dar es Salaam.

Jaji Mkuu wa Tanzania Mhe. Prof. Ibrahim Hamis Juma aliwaambia waandishi wa habari kuwa mkutano huo wa siku tatu ni wa kihistoria kwa kuwa Tanzania itakuwa mwenyeji kwa mara ya kwanza tangu kuanzishwa kwa umoja huo wa Majaji na Mahakimu mwaka 1970.

Mkutano huo wenye maudhui “Mahakama Madhubuti, inayowajika na Jumuishi” unalenga kuwajengea uelewa Majaji na Mahakimu kuhusiana na masuala ya uhuru wa mahakama, mikataba ya kimataifa, maendeleo ya kisheria, upatikanaji wa huduma ya haki, na maendeleo ya mahakama na changamoto zake katika kusikiliza mashauri.

Aidha Prof. Juma alizitaja mada zitakazowasilishwa kwenye Mkutano huo kuwa ni mada kuhusiana na masuala ya ugaidi, dhima ya wajibu wa Mahakama kwenye menejimenti ya wanyamapori, kuboresha taratibu za kimahakama, namna ya kukabiliana na ucheleweshwaji wa mashauri na wajibu wa mahakama katika kusikiliza mashauri ya biashara haramu ya wanyamapori.

Kwa mujibu wa Jaji Mkuu wa Tanzania, mada nyingine zitakazojadiliwa wakati wa mkutano huo ni pamoja na rushwa mahakamani, uboreshaji wa maslahi ya watumishi wa mahakama na mazingira ya kazi, namna bora ya kushughulika na maoni ya wanasiasa, vyombo vya habari na ukosoaji dhidi ya Mahakama.

Katika mkutano huo, jumla ya Majaji wakuu kumi na tatu (13) watahudhuria ambao watatoka katika nchi za Papua New Guine, Jersey,Guyana, Uganda, Malawi, Turks Caicos Islands, Swaziland, Lesotho, Zanzibar, Tanzania, Msumbiji, Kenya na Namibia. Wakati huo huo Tanzania itawakilishwa na wajumbe 50 ambao ni Majaji na Mahakimu kutoka Tanzania bara na visiwani.

Mkutano huo pia utahudhuriwa na watu mashuhuri sita ambao ni Marais na Majaji waandamizi wa Mahakama za juu na Rufaa kutoka nchi za Australia, Afrika Mashariki, Pakistan na Zambia. Washiriki wengine ni Mahakimu na Majaji kutoka nchi mbalimbali za Jumuiya ya madola.

Jaji Mkuu alisema kuwa mkutano huu ni muhimu kwa Mahakama ya Tanzania na Serikali kwa ujumla kwa kuwa Majaji na Mahakimu watapata fursa ya kujengewa uwezo na kupata uzoefu kutokana na mada zitakazojadiliwa ambazo nyingi zina umuhimu mkubwa kwa Tanzania ya leo ikiwemo mada ya ugaidi na maliasili na wanyamapori.

Alisema Mkutano huo utatoa fursa kwa nchi kujitangaza kiutalii na vivutio vingine pamoja na kukuza biashara na kuongeza kipato pamoja na mahakama kujitangaza ndani nan je ya nchi kuhusian ana shughuli zake, mafanikio iliyoyapata kupitia maboresho yanayoendelea na Mpango Mkakati wa miaka mitano 2015/16-2019/20.

Wajumbe wa mkutano huo pia watapata fursa ya kutembelea visiwa vya Zanzibar kama sehemu ya Jamhuri ya Muungano wa Tanzania, kama nafasi ya kuonyesha umoja na mshikamano wa watanzania.

Hadi sasa washiriki wapatao 354 wameshathibitisha kushiriki mkutano huo huku baadhi wakiwa wameshawasili. Nchi hizo ni Uingereza, Australia, Kanada, Uganda, Kenya, Scotland, Ushelisheli, Jersey, Guyana na Ghana. Nchi nyingine ni Trinidad&Tobago, Nigeria, Afrika ya Kusini, na Tanzania.  

Nchi nyingine ni Cayman Islands, Marekani, Gambia, Bermuda, Papua New Guine, Lesotho, Malawi, Bahamas, Malasysia, Wales, Turks & Caicos, Sri Lanka, Singapore, New Zealand, India, Rwanda, Burundi, Sudani ya Kusini na Cameroon. Nyingine ni Botswana, Zanzibar, Zambia, Mauritius, Brazil, Msumbiji, Swaziland, na Namibia.      

Mkutano wa mwisho wa Chama cha Majaji na Mahakimu wa Jumuiya ya Madola ulifanyika mwaka jana nchini Guyana ambapo Mahakama ya Tanzania ilituma wawakilishi kushiriki mkutano huo.

Wakati huo huo, Jaji Mkuu wa Tanzania amesema Mahakama ya Tanzania iko huru kimfumo na inafanya kazi zake kwa uhuru na kwa uwazi kuliko mhimili mingine na kuwa changamoto iliyopo ni mtazamo wa jamii juu ya Mahakama. 

Jaji Mkuu wa Tanzania Mhe. Prof. Ibrahim Juma akizungumza na Waandishi wa Habari kuhusu Mkutano wa Chama cha Majaji na Mahakimu wa Jumuiya ya Madola utakaofanyika kwa mara ya kwanza nchini Tanzania kuanzia Septemba 25-27, 2017. Kushoto ni Jaji Kiongozi waMahakama Kuu ya Tanzania Mhe. Ferdinand Wambali na kulia ni Rais wa Chama cha Majaji na Mahakimu wa Tanzania Mhe.Jaji Ignas Kitusi.Mhe. Jaji Mkuu ameongelea juu ya Mkutano Mkuu wa Chama cha Majaji na Mahakimu wa Jumuiya ya Madola unaotarajiwa kuanza rasmi, Septemba 25, 2017 katika Ukumbi wa Mikutano wa BOT.

Jaji Kiongozi-Mahakama  Kuu ya Tanzania-Mhe. Ferdinand Wambali akizungumza na Waandishi wa Habari katika Mkutano huo uliofanyika Septemba 21, Katika Ukumbi wa Maktaba-Mahakama ya Rufani (T).

Sehemu ya Waandishi wa Habari wakimsikiliza Mhe. Jaji Mkuu.

(Picha na Mary Gwera, Mahakama)