MKUTANO WA KIMATAIFA WA JINSIA NA MAHAKAMA WAFUNGWA RASMI NA WAZIRI WA KATIBA NA SHERIA

Na Lydia Churi-Arusha

Waziri wa Katika Katiba na Sheria Mhe. Prof. Palamagamba Kabudi amesema Mahakama katika bara la Afrika zina jukumu kubwa la kuhakikisha kuwa haki za wanawake zinalindwa.

Akifunga Mkutano wa Kimataifa wa siku tatu wa Jinsia na Haki leo jijini Arusha, Prof. Kabudi amesema pamoja na Mahakama hizo kulinda haki za Wanawake, pia zina mchango katika kuhakikisha kuwa Sheria zinazotungwa katika zinalenga katika kuufikia usawa wa kijinsia.

Aidha, Waziri wa Katiba na Sheria amesema kupitia mkutano huo, imefahamika kuwa endapo Majaji pamoja na Mahakama kwa ujumla zitatoa kipaumbele kwenye  kesi zinazohusu masuala ya kijinsia ni wazi kuwa usawa wa kijinsia utafikiwa katika nchi za bara la Afrika. 

Prof. Kabudi alizishauri Mahakama hizo kutoa kipaumbele kwenye kesi zinazohusu masuala ya kijinsia ikiwemo unyanyasaji na ukandamizaji dhidi ya wanawake na kufuatwa kwa taratibu za kimahakama ili kulinda hadhi na utu wa Mwanamke.

Alisema majadiliano ya kina ya mkutano huo yamebainisha kuwa wanawake na wasichana hasa katika nchi za Afrika, kusini mwa Jangwa la Sahara bado wanakabiliwa na unyanyasaji wa kijinsia ikiwemo kupigwa na kuteswa na wenzi wao pamoja na kubakwa. Aliongeza kuwa kinachosikitisha zaidi ni kuwa hata wale wanaume wanaohusika na vitendo hivi hawaadhibiwi au wachache wanaoadhibiwa hupewa adhabu ndogo isiyolingana na kosa walilolitenda.

Alisema Mahakama za Afrika zinapaswa kuwa ni sehemu ya mageuzi yatakayofikia kwenye usawa wa kijinsia kwa wanawake na wasichana kwa kutoa mawazo yatakayochangia katika kuinua hadhi na utu wa mwanamke.

Prof. Kabudi alisema Serikali pamoja na Mihimili mingine imefanya jitihada za makusudi katika kupambana na vitendo vya ukatili, unyanyasaji na ukandamizaji dhidi ya wanawake hivyo juhudi hizo zinapaswa kupongezwa.

Aliishukuru na kuipongeza Benki ya Dunia pamoja na Mahakama ya Tanzania kwa kuandaa Mkutano huo muhimu na wa kihistoria katika bara la Afrika  ambao umeonyesha kuwa maendeleo ya kweli hayatapatikana  bila ya kuwepo kwa usawa wa kijinsia.

Alisema Serikali ya Tanzania itayafanyia kazi mapendekezo yaliyotolewa kwenye mkutano huo na kujipanga namna ya kutekeleza kwa manufaa ya Tanzania pamoja na nchi nyingine za Afrika kwa ujumla. 

Wakati huo huo, Jaji Mkuu wa Tanzania Mhe. Prof. Ibrahim Hamis Juma amewashukuru wajumbe wa Mkutano huo kwa kufika na kutoa mchango wao mkubwa wa mawazo utakaowezesha kufikiwa kwa maendeleo ya kiuchumi yatakayotokana na kufikiwa kwa usawa wa kijinsia.

Jaji Mkuu pia aliishukuru Benki ya Dunia kupita Makamu wa Rais wa Benki hiyo, Sandie Okoro kwa kuandaa Mkutano wa Jinsia na Mahakama kwa nchi za Afrika.  

Mkutano wa kimataifa wa siku tatu wa jinsia na Mahakama ulihudhuriwa na viongozi mbalimbali wa sekta ya Sheria kutoka nchi mbalimbali wakiwemo Majaji Wakuu 12, Majaji wa Mahakama za Juu (Supreme Court),  Majaji wa Mahakama ya Rufani, Majaji wengine pamoja na wanasheria mbalimbali kutoka nchi 51 za bara la Afrika.  

Waziri wa Katiba na Sheria pamoja , Mhe. Jaji Mkuu wa Tanzania  pamoja na Washiriki wengine wa Mkutano huo wakiimba wimbo wa Taifa kabla ya Mhe. Waziri kufunga rasmi Mkutano huo.

Waziri wa Katiba na Sheria, Mhe. Prof. Palamagamba Kabudi akitoa hotuba yake ya kufunga Mkutano wa Jinsia na Mahakama Afrika, Mkutano huo wa siku tatu (3) ulianza rasmi Juni 11.

Jaji Mkuu wa Tanzania, Mhe. Prof. Ibrahim Hamis Juma akitoa maneno ya utangulizi kabla ya kumkaribisha rasmi Mhe. Waziri kufunga rasmi mkutano huo, Mhe. Jaji Mkuu ameishukuru Benki ya Dunia ambayo imeshirikiana kwa karibu na Mahakama kufanikisha Mkutano huo, vilevile amewashukuru Wajumbe wote kwa ujumla wao kushiriki katika Mkutano.

 Sehemu ya Washiriki wakiwa katika Mkutano huo.

Jaji Mkuu wa Tanzania, Mhe. Prof. Ibrahim Hamis Juma akiteta jambo na Makamu wa Rais wa Benki ya Dunia, Dkt. Sandie Okoro.

Jaji Kiongozi wa Mahakama Kuu ya Tanzania, Mhe. Dkt. Eliezer Feleshi  pamoja na baadhi ya Majaji wengine waliohudhuria katika Mkutano huo.

Jaji wa Mahakama Kuu, Kanda ya Mwanza, Mhe. Joaquine Demello akikabidhi zawadi ya Kitenge cha Chama cha Majaji Wanawake Tanzania (TAWJA) kwa Waziri wa Katiba na Sheria, Mhe. Prof. Palamagamba Kabudi.

Jaji wa Mahakama Kuu, Kanda ya Mwanza, Mhe. Joaquine Demello akikabidhi zawadi ya Kitenge cha Chama cha Majaji Wanawake Tanzania (TAWJA) kwa Makamu wa Rais wa Benki ya Dunia, Dkt. Sandie Okoro.

Jaji wa Mahakama Kuu, Kanda ya Mwanza, Mhe. Joaquine Demello akikabidhi zawadi ya Kitenge cha Chama cha Majaji Wanawake Tanzania (TAWJA) kwa Mkuu wa Mkoa wa Kilimanjaro, Mhe. Anna Mghwira.

(Picha na Mary Gwera, Arusha)