MAHAKAMA KUU TANGA YAZINDUA MIFUMO YA KURAHISISHA UPATIKANAJI WA HAKI

Na Amina Ahmad –Mahakama Kuu Tanga

Jaji Mfawidhi wa Mahakama Kuu ya Tanzania kanda ya Tanga Mhe. Imani Aboud, amezindua mfumo wa kielekitroniki wa kuhifadhi taarifa na nyaraka mbali za maktaba (E-Library) pamoja na mfumo wa matangazo kwa njia ya kielekroniki (Public address system) utakaotumika kuwatangazia wadaawa na wadau huduma mbalimbali zitolewazo Mahakamani.

Kufuatia uzinduzi huo, ni dhahiri kuwa sasa Mahakama ya Tanzania imedhamiria kuingia kwenye matumizi ya Teknolojia ya Habari na Mawasiliano (TEHAMA) katika shughuli zake ili kurahisisha suala zima la upatikanaji wa haki kwa wakati.

Akizindua mifumo hiyo, Jaji Aboud alisema mradi wa maboresho ya Maktaba ya Mahakama kuu ulikamilika Julai 13 mwaka huu baada ya kufanyiwa ukarabati mkubwa ulioanza mwezi Juni 2018 ambapo mradi huu umewezesha kuanzishwa kwa mfumo wa E- Library unaosajili aina zote za vitabu na nyaraka mbalimbali zinazopokelewa Maktaba.

Kupitia mfumo mpya wa maktaba, orodha au idadi ya vitabu vinavyopatikana ndani ya Maktaba hiyo na sehemu ambapo vitabu hivyo vimehifadhiwa huweza kuonekana ikiwa ni pamoja na taarifa na tarehe ya  kuazima kitabu na siku ya  kurudishwa.

Kuhusu mfumo wa matangazo kwa njia ya kielekroniki, Jaji Aboud alisema  Mfumo huo utawasaidia wananchi wanaofika Mahakamani kufahamu kinachoendelea wakati wakisubiria kuitwa kwenye vyumba vya mashauri muda ukifika.

Aidha, matangazo ya kuitwa kwenye vyumba vya mashauri yatakuwa yakitolewa na wasaidizi wa kumbukumbu kupitia simu maalum kumi (10) zilizofungwa kwenye ofisi zao na  kuwafikia wadaawa wanaosubiria kwenye ukumbi maalum (waiting shade) na washtakiwa wanaohifadhiwa kwenye vyumba vya Mahabusu kupitia vipaza sauti vya kisasa.

Katika Mfumo huu zimewekwa simu 10 za kutangazia zilizofungwa katika kila Ofisi ya katibu muhtasi wa Jaji, Ofisi za Masjala na Ofisi za Makatibu Muhtasi wa Mahakimu. Pia vimefungwa vipaza sauti vitatu (3) vya kuwatangazia wadaawa wanaoketi kwenye ukumbi wa kusubiria kuitwa shaurini na washtakiwa wanaohifadhiwa vyumba vya Mahabusu.

  Afisa Tehama wa Mahakama Kuu ya Tanzania kanda ya Tanga, Amina Ahmad  akimuelezea Jaji Mfawidhi wa Mahakama kuu ya Tanzania Kanda ya Tanga Mhe. Iman Aboud na watumishi wengine wa Mahakama jinsi mfumo wa E-Library unavyofanya kazi wakati wa uzinduzi.

 Jaji Mfawidhi wa Mahakama kuu ya Tanzania Kanda ya Tanga Mhe. Iman Aboud akikata utepe kuashiria uzinduzi wa Maktaba ya kielekitroniki iliyoanzisha na kanda ya Tanga.

 Afisa Tehama wa Mahakama Kuu ya Tanzania kanda ya Tanga, Amina Ahmad  akifafanua kuhusu mfumo wa E-Library.

Muonekano halisi wa E-Library ya Mahakama Kuu ya Tanzania kanda ya Tanga.