TANZANIA YAENDELEA KUWA KISIWA CHA AMANI KWA KUFUATA UTAWALA WA SHERIA NA KUJALI HAKI ZA BINADAMU

Na  Prisca  Libaga, Maelezo, na Catherine Francis, Mahakama Kuu Arusha

 Makamu wa Rais wa Jamhuri ya Muungano wa Tanzania, Mhe. Samia Suluhu Hassan amesema Serikali ya Tanzania imeendelea kuwa kisiwa cha amani na  utulivu kutokana na kufuata utawala wa sheria na kujali haki za binadamu.

 Akizungumza kwa niaba ya Rais, Mhe. Dkt John Pombe Magufuli katika hafla ya

 kuapishwa kwa Majaji watatu wapya wa Mahakama ya Afrika ya Haki za Binadamu (AFCHPR), jana jijini Arusha,  Makamu wa Rais alisema Tanzania itaendelea kuwa mfano wa kuigwa dhidi ya mataifa mengine kutokana na kujali haki za binadamu.

 “Tumejitahidi kuifanya Tanzania kuwa ni mfano wa kuigwa na nchi zingine katika  haki za binadamu na ndiyo maana hali ya amani na utulivu imeendelea kuwepo kwa kuwa tumekuwa tukifuata utawala wa sheria,”alisema.

 Alisema mbali na Serikali ya Tanzania kukubali kutoa jengo linalotumiwa na Mahakama hiyo kuendeshea kesi zake, pia imeendelea kutoa misaada mbalimbali ikiwemo kiwanja kwa ajili ya kujenga jengo lake la kudumu.

“Katika kuonyesha tunathamini Mahakama hii, hata watendaji wetu wamekuwa wakitembelea mara kwa mara Mahakama hii, na hivi majuzi tu hapa Mwanasheria Mkuu  na Mwendesha mashtaka Mkuu wa Serikali walitembelea Mahakama hii na kufanya mazungumzo na Rais, natumaini na viongozi wengine katika nchi nyingine na wao watafanya hivyo,”alisema.

 Kwa upande wake Rais wa Mahakama hiyo Jaji Mhe. Sylvain Ore aliwakaribisha Majaji watatu walioteuliwa katika Mahakama hiyo na kuwataka kutenda haki katika kutoa maamuzi bila kufanya upendeleo wowote.

 Alisema majaji hao walichaguliwa katika mkutano wa Umoja wa Mataifa uliofanyika hivi karibuni mjini Nouakchott nchini Mauritania kufuatia kupendekezwa na nchi zao baada ya majaji watatu waliokuwa wakihudumu mahakamani hapo kustaafu.

 Majaji waliokula kiapo jana ni pamoja na Jaji Imani Daudi Aboudi wa Tanzania

aliyechukua nafasi ya Jaji Solomy Balungi Bossa wa Uganda ambaye aliachia nafasi hiyo baada ya kuteuliwa kuwa Jaji wa Mahakama ya kimataifa ya Haki za binadamu (ICC).

 Wengine waliokula kiapo ni Jaji Stella Isibhakhomen Anukam wa Nigeria na Jaji

 Blaise Tchikaye wa Kongo ambao kwa pamoja wamechukua nafasi za majaji Gerald Niyungeko kutoka Burundi pamoja na Jaji El Hdji Guisse kutoka Senegali ambao wamestaafu baada ya kutumikia Mahakama hiyo kwa vipindi viwili vya miaka sita.

 Awali akitoa salamu katika hafla hiyo, Mwenyekiti wa bodi ya Umoja wa Afrika inayoshughulikia masuala ya rushwa, Dkt Begoto Miarom alisema rushwa ni janga la kimataifa ambalo limekuwa likififisha uchumi wa nchi nyingi barani humu.

 Alisema pamoja na changamoto nyingi za mapambano dhidi ya rushwa, bado

 ushirikiano wa hali ya juu unahitajika kutoka kwa wakuu wa nchi za umoja wa Afrika katika kukabiliana na tatizo hilo.

 Kwa upande wake Jaji mpya mteule kutoka Tanzania Jaji Imani Aboud alisema

 kuteuliwa kwao sasa kumefanya Majaji wanawake wa Mahakama hiyo kufikia sita huku wanaume wakiwa watano jambo ambalo amesema ni faraja kwao na kwamba hiyo inaonyesha namna jinsia inavyozingatiwa katika Mahakama hiyo.

 Makamu wa Rais wa Jamhuri ya Muungano wa Tanzania, Mhe. Samia Suluhu Hassan akiwa pamoja na Rais wa Mahakama ya Afrika na Haki za Binadamu Mhe. Jaji Sylvain Ore.

  Pichani ni Mhe. Jaji Iman Aboud wa Mahakama Kuu ya Tanzania aliyeapishwa kuwa Jaji wa Mahakama ya Afrika na Haki za Binadamu.

   Majaji walioapishwa, kushoto ni Mhe. Jaji Blaise Tchikaya  kutoka Kongo, katikati ni Mhe. Jaji Stella Anukam kutoka Nigeria na kulia ni Mhe. Jaji Iman Aboud kutoka Tanzania.

    Makamu wa Rais wa Jamhuri ya Muungano wa Tanzania, Mhe. Samia Suluhu Hassan akizungumza katika hafla hiyo ya Uapisho.

Makamu wa Rais wa Jamhuri ya Muungano wa Tanzania, Mhe. Samia Suluhu Hassan akiwa pamoja na Waziri wa Mambo ya Nje na Ushirikiano wa Kimataifa, Mhe. Augustine Mahige katika hafla hiyo.

   Makamu wa Rais wa Jamhuri ya Muungano wa Tanzania, Mhe. Samia Suluhu Hassan akipokea zawadi kutoka kwa Rais wa Mahakama ya Afrika na Haki za Binadamu, Mhe. Jaji Sylvain Ore.

Majaji wa Mahakama ya Afrika na Haki za Binadamu wakiwa katika picha ya pamoja na Makamu wa Rais wa Jamhuri ya Muungano wa Tanzania, Mhe. Samia Suluhu Hassan.

Makamu wa Rais  (katikati)  akiwa katika picha ya pamoja na  Majaji wa Mahakama ya Afrika.